Waano Yaan̂e N̂enîrî On, Tapi Wanorî

1 On wara wîîkes awya Apa, tahwore xa nasî kayaritomo tîkaritorî ke awya. Nahwowasî ro mak apoko tukurunperî ke marha awya.

2 Yiixe ehtopo xa mîmye yîwya. Ero xe cma re wasî, kacho yewyomara mîxakn̂e.

3 Noro yakro esepotpona mîmokyakn̂e. Enîche cepethîkem xa tak mîmyakn̂e yîwya emyawno. Kayaritomo yarokorî miire yîhtîpîrî pona. Ooro ciixapu mîn miire esmanî ro ha.

4 Waipîra cma re ow miir̂asî, kekn̂e awya. Taa, ero wara rma tak miire ham. Waipîn me ro mak miire eroromero.

5 Yiixatî pîn yopono me miire. Takîhsom me cekaiporesom me marha miire, kayaritomo me xa.

6 Ehcamnopînî ro ke mîwakrekn̂e, kir̂wanî ro ke xa. Tahwore ro mak miire amîtwono me cirirî ke awya.

7 Kporin komo pona xa n̂een̂asî kayaritomo. Ahwokan me ro mak nasî tîpînîn yaw rma Kaan yehtopo ponaro cexirî ke, Kyopono ro yehtopo ponaro cexirî ke ha.

8 Ahnoro aaxatî pîn komo mepor̂asî Apa, censo ro. Kaari me tak mahsîyasî awesepantome tak.

9 Wehto yen yawno wara ro mak miir̂asî n̂examro oco. Ermomn̂e wara nasî Kporin komo, tîrwon̂e ermomn̂e wara. N̂ecakyaxe ro mak oco.

10 N̂examro yepamtho pen komo marha mîwaikesî. Roowo pono me exihra tak naxe okwe, tooto chewno me exihra.

11 Awemetanmekî xe re naxe. Ero poko n̂esencexe takrono komo yakro. N̂ehn̂exe makî tko awemetanmetopo poko.

12 N̂examro pen tak mîweken̂emekyasî. Wece so akrapan yehsîrî ke.

13 Kyopono me so tak esko Apa kar̂pe xa awexirî ke. Amna n̂ewanomesî kar̂pe xa awehtopo poko. Ero wa amna nasî.