Waano Yaan̂e N̂enîrî On, Tapi Wanorî.

1 On wara wîîkes awya so, awesemetanmekyataw so amtapotarî komo yeyukn̂e me Kporin komo exi xe wasî. Akurunpen̂e komo me exi xe wasî Kaan, ponaro Xako yehtopo ha. Noro yosoke awexirî ke so akurunpen̂e komo me exi xe wasî.

2 Awakronoman̂e komo yen̂epe xe wasî yîwya tîmînî ro yawno rma. Akariton̂e komo yen̂epe xe wasî yîwya, Siaw pono ya.

3 Ahnoro anmîthîrî komo ponaro exi xe wasî. Tawake exi xe wasî apoko so awokuthîrî pun yakn̂iyataw awya so yîwya tîmsom me.

4 Ahce xe so na awexitaw so ero tîmn̂e me exi xe marha wasî. Ehn̂an me awiri xe so marha wasî yîwya, Ero poko cma re wasî, kacho poko awya so. Ero wa exi xe wasî Kporin komo apoko so.

5 Amn̂e amna yukurunpeche tak awya amna nahwowasî xa. Banteira amna nanîmyasî, Kaan yanan amna, kacho. Yiixe awehtopo komo tîmn̂e me exi xe wasî Kporin komo, Ero xe cma re nas amna Apa, ketaw awya so. Ero wa exi xe wasî Kporin komo apoko so.

6 Taa, oroto tak on wara wîîkesî Kaan poko, tînîhkapethîrî kurunpen̂e Mîk ham Kporin komo, wîîkesî. Yîmtapotarî yeyukn̂e me marha wîhtînoyasî. Kah yaw nasî Noro cekenî ro po. En̂exa rma n̂eyukyasî. Kar̂pe cehtopo ke noro nukurunpesî tamorî ke kaari ke.

7 Anarî komo tarara pona mak n̂een̂axe okwe tukurun komo me. Anarî komo n̂een̂axe kawaru pona hara. Kîwyam xa Kporin komo Kaan yosotî ponaro taxe.

8 On wara naxe tarara pona enîn̂e komo amn̂e, kawaru pona enîn̂e komo marha, katuhke so tak naxe, n̂epîrkexe ro mak okwe. Kîwyam xa tawomyaxe piiri. Ar̂man me cecececexe.

9 Apa kah yawno, kayaritomo kurunpen̂e me cma re masî. Awakro amna mtapowataw cma re amna meyukyasî. Ero wa mak wîîkes awya Apa.