Waano Yaan̂e N̂enîrî On, Tapi Wanorî.

1 Taa, kah yawno poko tan kîmtapowasî. Kah yawno komo naxe Kaan yehtopo yekatîmn̂e me, kir̂wanî ro me ehtopo yekatîmn̂e me ha. Kaan nakîhtotho amna okre, kan̂e wara naxe.

2 Enmar̂atîxera naxe tîmtapotaxmu wara. Kokmamr̂atîxera marha naxe takîhton̂enhîrî yehtopo yekatîmrî poko.

3 Yîmtapotara rma re naxe, tîtken̂e mak naxe.

4 Miyan komo n̂entarî me rma tko n̂ekatîmyaxe kir̂wan̂he Kaan yehtopo, roowo yenatîtopo pono komo n̂entarî me meero. Kaamo mîn warai Kaan n̂iir̂akn̂e kah yaw rma.

5 On wara nasî kaamo, kar̂pamxan wara rma nasî cipitaxmu wara, tîmîn yai cepatakaxmu wara ha. Karitî wara marha nasî cehcoyoponkaxmu wara cemahcitopo poko. Ero wara nasî kaamo.

6 Kaapu mîtî n̂ixa n̂epatakesî. Miya ro mak cesî kaapu yenatîtopo pona roro. Kaamo nocoronpetho pîn exihra ro mak nasî.

7 Taa, Kaan karitan poko mak hara kîmtapowasî. Kir̂wanî ro xa mîn Kporin komo ya kpanatanmetopo. Kropotarî yakir̂waman̂e mîn ha. Kir̂wan̂he marha nasî pahxan pen komo yehtoponho yakatîmtopo Kporin komo ya. Yaaro xa Kaan yehtopo yekatîmn̂e mîn, akpîn komo yakîhren̂e marha.

8 Yaarono xa mîn ha Kaan ya kpanatanmetopo komo. Kahworen̂e komo mîn ha. Kicicitho ke esumnî ro mîn, Ero wara ehcoko, kacho yîwya. Kîhcamhokan̂e komo marha mîn okre.

9 Kir̂wanî ro xa mîn Kporin komo poko twerî kehtopo, yusmumnî warai ro mak. Ehcamnopînî ro mak mîn ha. Yaarono xa mîn Kporin komo ya kpanaretopo. Kir̂wanî ro me Noro yesenpotopo mîn ha.

10 Tîpîn̂em xa mîn yîmtapotarî, ooru yopono ro mak, akir̂wamaxapu yopono. Mer̂pono pîn exitaw ooru ero yopo xa rma nasî Kaanî mtapotarî tîpîn̂e xa. Tîkporem marha mîn weenu yopono, amichîrî yawno yopono.

11 Otwermacho mîn Kaan ya kpanatanmetopo. Ero yewetîche owya mer̂pora ro mak wahsîyas amn̂e ewetîtopo yepetho.

12 Onoke thakwa ma re n̂een̂a kicicme cehtopo rma tanme ro mak? On wara tko wîîkes awya Apa, nai rma na kicicme oyehtopo esenponî ro. Ero cma re mowyasî kir̂wan̂he xa tak oyehtome.

13 Kicicme marha nasî, Oyanme ro mak tan was ha, kacho. Ero ke ero wa kan̂e mera ro mak ow cirko Apa. Oyantoman̂e me exi xera ro mak wasî ero wa kacho. Ero wa exihnî me oriche awya, Kicicitho mîkro kica, kacho mera tak wasî, Kaan yanwekn̂e mera tak wasî.

14 On wara oyexi xe was Apa, an̂entarî mexan me xa exi xe wasî omtapotarî. Ero wa xa marha exi xe wasî oyesehtînotopo hara, an̂entarî mexan me xa marha. Ero wa wîîkes awya Apa. Toopu warai Amoro, pona oyececetotopo warai. Oyown̂e marha Amoro. Noro yipu xa Amoro Apa.