Waano yaan̂e n̂enîrî on. Tapi wanorî on Kporin komo n̂entarî me tî naar̂akn̂e on waano Kporin komo ya tukurunpetîkache. Noro waparî komo mokuhra takî tî xakn̂e, Sawru pen meero takî tî mokuhra xakn̂e noro waparî me. Ero yimaw on n̂iir̂akn̂e waano. Kaan yakro tî nîmtapowakn̂e waano me. On wara tî kekn̂e,

1 Aaxe was Apa, okariton̂e xa Amoro.

2 On wara xa wîîkes awehtopo poko, toopu warai Mîk Kporin komo porin warai. Pona oyececetotopo Mîk ha. Owacan warai marha Mîk ha yahcono warai. Ponaro xa oyehtopo Mîk ha, okariton̂e me marha nasî. Ero ke Noro pona xa ween̂asî. Oyecen̂an warai marha Mîk ha. Paaka meretîtho warai marha Mîk. Ero warai me nasî Kporin komo owya okurun warai me. Omîn warai Mîk ha kawno warai.

3 Kir̂wan Mîk ham okre, kacho mexan xa Mîk Kporin komo. Owaparî komo mokuche Noro yakro kîmtapowasî okurunpetopo poko. Ero ke okurunpesî okre.

4 Ruupu ke oyamxikn̂e wara ween̂akn̂e owaparî komo. Keraswakn̂e xa tak. Kicicme cehsom komo yehtopo ween̂akn̂e tuuna yukmacho wara ro mak, oyopono me.

5 Ewtarî imo yaka oyen̂epen̂e wara ween̂akn̂e n̂examro, oyamxikn̂e komo. Mîîye yawno wara marha wîxakn̂e. Kwaihyasî tan okwe, wîîkekn̂e.

6 Ero wara wîxakn̂e owairî yaro okwe. Ero ke Kporin komo yakro tak kîmtapowakn̂e. Ow akronomatamko Apa, wîîkekn̂e yîwya. Ponaro oyehtopo xa Mîk. Ero ke ero wa wîîkekn̂e yîwya. Tîmîn yaw rma n̂encekn̂e, Ow akronomatamko, kacho owya.

7 Ero yinhîrî roowo tak nîrîrînakn̂e, n̂esewsîyakn̂e marha. Îîpî yapon meero n̂esewsîyakn̂e Kporin komo yîrwonîmrî ke.

8 Wehto yîsîn tak n̂epatakekn̂e Noro yewnarî yai. Wehto n̂epatakekn̂e yîmtarî yai akn̂ino rin̂e oco. Wehto roron xakn̂e oco wehto chew.

9 Kaapu tak wananîyakn̂e roowo pona tîhtotome tak. Awarpan tî xakn̂e Noro tarî yapon me.

10 Keruminî mkahsî tak n̂etakriyakn̂e kaikokoro tîtotome. Tapokem wara xakn̂e ocowo. Ero pono wara rma mokyakn̂e kaikokoro. Ero wara mokyakn̂e Kporin komo.

11 On wara marha xakn̂e Noro, Awarpan xakn̂e ahrun̂e wara. Tuuna yewru rma xakn̂e yîmîn me cicipiyem xa.

12 Noro poturme katpape xakn̂e. Katpape ro mak n̂iir̂akn̂e kaapu. Ero yipu yai rma tak n̂epatakekn̂e tuuna yewru, saraipa tak mokyakn̂e oko. Pepe kekn̂e marha oco.

13 Kporin komo nîmtapowakn̂e kar̂pe ro mak, tarai wara ro mak. Kah yawno mîn n̂esencekn̂e yîmtapotarî. Saraipa mokyakn̂e, pepe kekn̂e marha oco.

14 Tuwuhre warai nar̂mekn̂e waiwî warai tîîxatî pîn komo wotopo. Ero ke tak n̂examro pen n̂akpayakn̂e ro mak. Pepe kacho nar̂mekn̂e pona so mer̂pono pîn. Ero ke n̂examro pen nar̂mekn̂e.

15 Tuuna imo rma napaitîkekn̂e arinhîrî me cehso ro. Roowo yecetî komo tak n̂esenpekn̂e. Ero wara miir̂akn̂e Apa, tuuna yein̂e wara mîxakn̂e. Puu mîîkekn̂e awewnarî yaro rma. Kar̂pe ro mak mîîkekn̂e tuuna yen̂epetome. Ero wa miir̂akn̂e Apa.

16 Kah yawno Mîk Kporin komo. En̂exa rma tko n̂etapoyankekn̂e oyanîmtome. Oyanîmyakn̂e weyun kwawnonho.

17 Kar̂pe rma re xatken̂e ooxatî pîn komo, oyopono ro me mak okwe. Kporin komo tko oyar̂mapora xakn̂e yîwya so.

18 Kesemetanmekyakn̂e ro mak okwe. Ero yimaw rma mokyatken̂e ooxatî pîn komo oyar̂maxi. Kporin komo tko oyececekn̂e epîrkara oyehtome.

19 Kir̂wantawno me tak oriyakn̂e Kaan tîn̂enîrî mexan me oyenîrî ke. Oyar̂mapora xakn̂e n̂examro ya.

20 Ero wa oyakronomekn̂e Kporin komo kir̂wan̂he oyexirî ke, kicicme oyehtoponho exihtorî ke ha.

21 On warai ow, Kporin komo yehtopo yaw rorono mak ow. Kicicitho pona etowra ro mak wasî.

22 Yîmtapotarî ponarono xa ow kpanaretopo ponarono ha. Ero wa men ehcoko, kacho cirihra ro mak wîxakn̂e pohnî me.

23 Kicicme meexi kica, kacho pîn me ro mak oyen̂e Noro. Kicicme exihra ro mak wehxe.

24 Kir̂wan̂he oyen̂akn̂e Kporin komo, kicicitho pokono pîn me. Ero ke oyakronomekn̂e, ero wa oyenîrî ke ha.

25 On wara mas Amoro Apa amna poko, miyan komo poko rma. Kîpînîn yawno komo ya mesenpesî yîpînîn yawno me xa marha. Kicicme exihnî mîkro, kacho komo ya mesenpesî kicicme exihnî me hara.

26 Esman me exitaw yîropotarî komo, esman me xa marha mesenpesî yîwya so hara. Kanwekn̂e me exitaw so anarî kom hara, noro yipu komo ya mesenpesî anwekn̂e komo me hara.

27 On wara marha masî, Anarî komo xawyakan mak owî, kan̂e komo poko, yukurunpen̂e me masî. Anarî komo yopono wara cesenposom komo reha miir̂asî yaana pîntho me hara. Ero wara ciino rin̂e Amoro Apa.

28 On wara mas Apa opoko hara, oweyuru potuhton̂e me masî. Awarpanaw oyexitaw ow mîweipes okre. Ponaro oyehtopo xa Amoro. Ero ke ero wara ow makronomesî.

29 Oyakronoman̂e me awexirî ke yaakeno yar̂maxi kîwcesî sowtatu pen yar̂maxi. On wara wîîkesî Noro poko, Oyakronoman̂e Mîk Kaan. Noro xa okaricesî waaca yepore rma oyahronîmtome.

30 On wara marha wîhtînoyasî Kaan yehtopo, kir̂wan̂he mak nasî ahce wa na kiitopo poko. Kir̂wan̂he marha nîmtapowasî, kemîknon̂e pîn me ro mak. Noro ya ketkurunpetaw kecen̂an me nasî. Noro yipu Mîk Kaan.

31 Kaanî ro xa Mîk Kporin komo. Ahto ma re nai anarî hara ponaro kehtopo awya so? Onoke xa toopu warai hara? Pîra, Noro mak toopu warai, ponaro kehtopo kom ha.

32 Okariton̂e Mîk Kaan. Noro marha oyehtopo n̂enporitîkesî.

33 Ohtakaricesî marha kooso wara xa owtotome kar̂pe xa. Îîpî meretwo so cececetosom me oriyasî.

34 Waapa yar̂macho poko ohcamhokesî. Oyamorî n̂enpamnoyasî ero poko. Oyapokaricesî krapa yehsîtome owya. Cewaxkem yehsîn̂e me oriyasî, kuripara ciixapu meero.

35 Ow mecen̂anmesî ooxatî pîn komo yopono me oyehtome. Awamorî ke ow mecehcesî kaar̂i ke. Yamorono me mak masî ahce wa na oritopo poko. Ero ke mer̂pono pîn komo yopono me tak ow miir̂e Apa.

36 Esama yaw owcetaw ow makronomekn̂e. Oyesamarî maiwekn̂e takweke okre. Ero wara maiwekn̂e ehrokara oyehtome.

37 Ero ke ooxatî pîn komo wenatho yaw kîwcekn̂e waihkaxi. N̂examro pen waihkatîkache so mak owya kporohyakn̂e.

38 N̂examro pen werewnukyakn̂e ro mak. Awomra xa hara xatken̂e thakwa. Onapikrî me n̂epîrketken̂e.

39 Ow mîkaricekn̂e ar̂mano ritohme owya. Ooxatî pîn komo mar̂mapekn̂e owya. Omamaka cesewnaposom me miir̂akn̂e.

40 Ooxatî pîn pen mîweken̂emekpoi owya. N̂exmro pen waihkai ow.

41 Amna yukurunpetamko, ketken̂e rma re. Exihra thakwa xakn̂e yukurunpen̂e komo. Kporin komo yakro meero nîmtapowatken̂e. Eikura so tko xakn̂e Noro.

42 N̂examro pen yaposokan̂e wara wîxakn̂e. Pin̂ipici me waposokekn̂e roowo pupuntho wara ro mak. Esama yaka ar̂maxaputho wara ro mak wiir̂akn̂e.

43 Ow makronomekn̂e roro Apa cetanwesom me exitaw omaywen komo. Mîk ha maywen̂inho komo kayaritomon me marha ow miir̂akn̂e. On̂enîtho pîn komo rma tak naxe omaywen me.

44 Noro yipu komo tak mokyaxe oyewetîso. Anarî yana komo mîkyam mokyaxe. Omtapotarî yentache rma oyewecaxe yohno.

45 Cerahso mak n̂ecececexe oyepatai. Ceseyamtoponhîrî komo yai so n̂epatakexe cerahso ro mak.

46 Ero ke on wara wîîkesî Kporin komo poko, waipîn me nasî. Oyececetotopo me nasî Noro toopu wara. Okurunpen̂e marha Mîk ha. Ero ke, Kir̂wan̂he xa mai ham okre, kapore nasî yîwya.

47 Noro xa nasî oyepanîn̂e me. Mîk hak yana komo n̂iir̂asî oyewetîn̂e me.

48 Oyar̂mapora nasî ooxatî pîn komo ya. Ero ke on wara wîîkesî yîwya, Apa, owaparî me mohxapu komo yopono me ow miir̂as okre. Cewapatosom komo ya ow owaikapora masî.

49 Ero ke Xenciu komo n̂entarî me kîmtapowasî apoko Apa. Kir̂wan̂he awehtopo poko xa kîmtapowasî. Kir̂wan̂he xa nai ham Kporin komo okre, kacho waar̂asî waano.

50 Tapi ow, kayaritomo me Kporin komo n̂iritho, yînîhkapethîrî ha. Waapa komo yopono me oriyasî Noro. Pahxaro tak oyepamtho komo meero wakresî miya roro yîtîhkan me ro mak. Ero wa xa nasî Kporin komo opoko.