17
Tapi Nîmtapowasî Kaan Yakro. Kir̂wan Ow, Ero Ke Cma Re Ow Mukurunpesî, Kesî Kaan Ya
1 Apa kah yawno, omtapotarî cma re mencesî. Kir̂wan̂he kehtopo poko tan kîmtapowasî. Ero ke omtapotarî ponaro cma re masî cemarontanî ro me exirî ke omtarî.
2 Kir̂wan̂he oyehtopo yenpon̂e me esko awakrono me oyexirî ke. Takîhso oyehtopo yenîn̂e me esko.
3 Oropotarî meen̂e, Kir̂wan̂he nai ham, kachome awya. Kosope rma mîmokye oropotarî yenso, yuhnaw oyehtopo yenso ha. Kicicme oyehtopo yenîhra rma mehxe. On wara kan̂e me was oropotaw, Kicicme yîmtapotan me ro mak wasî, kan̂e me ha.
4 On wara wasî tooto komo yehtopo poko, waihkano rin̂e komo yehtopo yaw roro exihra wasî. Ero wara wasî amtapotarî ponaro oyexirî ke mak.
5 Awesamarî yaw mak ketar̂asî etowîn me ro mak. Turai kahra nas ohtarî.
6 Awakro kîmtapowas Apa yiixe oyehtopo poko. Ero wa wîîkes awya oyeyukn̂e me awexirî ke. Ero ke omtapotarî cma re mencesî.
7 Kîîxatî xa Amoro Apa. Ero wa awehtopo enpoko apona enîn̂e komo ya eserepokachome so apoko. Noro yipu komo kurunpen̂e Amoro. Awamorî ke rma mukurunpesî, kaari ke. Ero ke rma noro yipu yar̂ma xatî komo ehn̂anmeko. Ero wa esko Apa.
8 Ow ewyomak Apa. Awewru yatho rma mewyomesî ero wara rma ow ewyomakî. Awaporî yawarpan yaw ow eyamko.
9 Kicicitho komo oyemetanmekyaxe. Owaika xatî komo meero omamcexe okwe. Ero ke cma re ow meyamyasî.
10 On wara marha naxe noro yipu komo, tîropotarî komo nahruyaxe kîpînîn yawra cehtome so. Cehcoyoponkacho poko nîmtapowaxe kica.
11 Owenatîketken̂e ooxatî pîn komo. Oroto tak omamcexe mehxarpa. Oyentîkexe tak oyar̂machome roowo pona.
12 Reaw wara naxe twotohton̂em wara. Tootî wapantaw cetamrusom wara naxe kopi. Ero wa naxe kicicme cehsom komo Apa opoko.
13 Ero ke piiri awomko Amoro. Porohkano tak cirko. Akaciparan ke ar̂mano cirko owaikara ehtome so. Ero wa kicicitho komo ar̂mak Apa.
14 On wara naxe n̂examro, tan roowo po mak cepethîrî komo nahsîyaxe. N̂examro ropotarî rma re marîhcesî anmîthîrî ke, cepethîkem ke. Yîmxîkrî komo mîmyasî yîwya so cerepore ehtome so. Cemyawnonhîrî komo nînomyaxe mak tîmxîkrî komo yemyawno me. Noro yipu komo porohkakî owaparî me mokyataw so.
15 Owî reha awewru tak ween̂as amn̂e. Kir̂wanî ro me tak wasî ero yimaw. Cerepore xa wasî opakache amn̂e awara tak oyexirî ke. Ero wara was amn̂e Apa.