16
Tapi Wanorî On Kaan Ponaro Mak Wasî Anarî Ponarora, Kesî Tapi
1 On wara wîîkes awya Apa, Kaan Amoro. Okurunpen̂e me xa kîhtînoyasî. Ero ke waipîra cma re ow miir̂asî.
2 On wara wîîkekn̂e Kporin komo ya, Oporin xa Amoro Apa. Oporin mera awexitaw ketaw ha re kir̂wan̂he exihnî me ro mak wasî re okwe, wîîkekn̂e yîwya.
3 Anakir̂wamathîrî komo tanî naxe Apa roowo po. Tahwore xa wasî noro yipu komo yakro oyexitaw okre. Ero wa wasî anakir̂wamathîrî komo poko.
4 Ero warahra reha naxe anarî komo reha. Anarmen komo wece mak cexe n̂examro yohno, ponaro cehtopo komo wece okwe. Tahwokaxmu me makî tko n̂ehtîkexe amn̂e noro yipu komo okwe. On wara naxe ponaro cehtopo komo poko, kamxuku nukmamyaxe n̂examro ya tîmsom me. Ero yipu tîmîhra ro mak was owî reha. Ponaro n̂examro yehtopo yetacira meero wasî.
5 Apa, Oporin xa Amoro. Amoro xa masî oyeken me, oyemyawno me marha, owokru warai me marha. Oyeceton̂e me marha masî ahce wa so na oyexitaw.
6 Kir̂wan on oyeken me wokpamaxapu. Kir̂wanî ro on ahnoro onahsîtho okre.
7 On wara wîîkesî Kporin komo ya, Kir̂wan̂he xa mai ham okre Apa. Mîn hak poko ow mîweronomesî, wîîkesî yîwya. Kosope meero oweronomesî oropotarî rma.
8-9 Kporin komo ponaro wasî eponarononkan me ro mak. Opanaw xa nasî Noro kaari n̂ixa. Ero ke ahwokan me ro mak wasî. Tawake xa matko wasî, kahwowasî ro mak. Ehcamnopîn me oyokoputho meero miir̂as owaipuche.
10 Wehto imo ywawno me n̂expe Noro, kan̂e pîn me ro mak kîhtînoyasî Apa. Ayananî ro xa ow. Ero ke kohnî me ro mak miir̂as oyokoputho owaipuche amn̂e. Ero wa orin̂e me ahtînorî ke owya kahwowasî xa Apa.
11 On wara marha ow miir̂asî, oyesamarî menpesî roro owya waipîn me oyehtopo. Ahyaw roro oyexirî ke tahwore xa wasî. Amîtwono me wasî kaari panaw. Iitono me oyexirî ke cexpore roro wasî expokan me ro mak miya roro. Ero wa wasî.