Tapi wanorî on.

1 Apa kah yawno, Ahce wa cexitaw amna mahsîya amîn yawno ro me. Îh pono ro Amoro awekenî ro pono. Ahce wa cexitaw amna mahsîya ero pono ro me?

2 On wara Kaan oyeyukyasî, On wara ehcoko ohyawno me awehtome so, kir̂wan me roro ehcoko, takîhso marha. Yaaro tîmtapotaxmu me mak ehcoko aropotaw so meero.

3 Rîîwo yakîhtora marha ehcoko, amîtwono komo emetanmekîra marha ehcoko. Kicicme awakrono komo yehtoponho entara ehcoko.

4 On wara marha ehcoko, Kicicme naxe kica, kan̂e me ehcoko kicicitho komo poko. Kir̂wan komo mîkyam okre, kan̂e me reha ehcoko Kporin komo poko tweeno komo poko. Anarimaw on wara na mîîketu, On wara was amn̂e, yaaro tan wîîkesî towîhnî me ro mak, mîîketu na. Ero yinhîrî awesemetanmetopo me rma na mîhtînoyatu amtapotachonhîrî komo. Wara rma ero yaw roro rma ehcoko etowîn me ro makî.

5 Anarimaw apurantan komo na mîmyatu apoyino komo ya. Wîmyas hara awya amn̂e, kee na noro. On wara kahra ehcoko yîwya, Opurantan poko awehtamci tîmko men owya on yîramanîyataw hara, kahra ehcoko. Anarimaw on wara na natu kicicitho komo kir̂wan yen̂ekapo xe na natu awya so epethîrî pona. Ero yipu ahsîra ro mak ehcoko, tohnaw en̂ekano ritopo yepetho ha. Ero wa ehcoko ohyawno me awehtome so. Ero wara awexitaw so ahwokan me ro mak maxe. Ero wa maxe, kesî Kporin komo owya.