Waano Yaan̂e Ro N̂enîrî On, Tapi Wanorî.

1 On wara kexe akpîra cehsom komo tîropotaw so, Exihra ro mak nasî Kaan, kexe kica. Kicicme ro mak naxe ero wa kan̂e komo. Poxumnî poko ro mak naxe kica. Exihra ro mak nas okwe kir̂wan̂he cehsom.

2 Kah yaw nasî Kporin komo. En̂exa rma keen̂axe so. Miyan komo rma n̂een̂asî. Yuhnari yîhtînon̂e komo n̂epor̂asî, Kaanî yenî xatî kom ha. Noro yipu komo n̂epor̂asî Kaan.

3 Exihra ro mak nasî. N̂etowce mak okwe miyan komo rma. Komxaputho wara ro mak naxe kica. Kir̂wan̂he cehsom exihra ro mak nasî. Cewn̂e n̂hema exihra ro mak nas okwe.

4 Camkî ro mak ma nat ke kicicme ciino rin̂e komo? Oyanan komo yermomn̂e wara naxe okwe. Tuuru nokyaxe ero wa xa marha oyanan komo yermomn̂e wara mak naxe okwe. Kporin komo yakro yîmtapotara naxe okwe yiixe cehtopo komo poko.

5 Noro yipu komo tak n̂eraswaxe ro mak amn̂e kir̂wan komo yakronoman̂e me exirî ke Kporin komo.

6 On wara kexe kicicme cehsom komo yukurumnî komo ya kica, Tohnaw mak mesencexe ahce poko na awesencetaw so, kexe. Kporin komo rma tko nasî yukurunpen̂e komo me.

7 On wara was ow, Ixaw Yana komo kurunpen̂e moku xe ro mak wasî Siaw pono. Noro mokuche tak waapa narîtho me ehxapunhîrî komo tak n̂ekyas hara Kporin komo. Ero yimaw tahwore xa tak n̂ehcowpe Xako Yepamtho komo, Ixaw Yana kom ha. Ero wa n̂ehcowpe.