Waano Yaan̂e Ro N̂enîrî On, Tîyorkaxmu Yakro Taasom, 8 Ke Tawyockem Yakro. Tapi Wanorî On.

1 Apa kah yawno, on wara wîîkes awya, ow akronomakî. Kaan ponarono komo exihnî wara ro mak tak n̂ehtîkexe okwe. N̂ehcamnoyaxe mak okwe kemîknon̂e pînînhîrî pen komo. Kaan ponarono pîn komo mak n̂etîmcexe okwe.

2 Cemaro me mak nîmtapowaxe kica tpoyino komo yakro. Kir̂wan amoro ham okre, kexe rma re yîwya so. Yiixatî pîn me rma tko ero wa kexe.

3 Ero wa kan̂e pen komo tak nîhcamnope amn̂e Kporin komo, cehcoyoponkaxmu pen komo marha.

4 On wara kexe noro yipu komo, Iyoponkano wiir̂asî omtapotarî ke rma. Oyanme ro mak kîmtapowasî. Onoke ma re otwerman̂e me nai ha? kexe kica.

5 On wara tko kesî Kporin komo, Cesemetanmesom komo yemetanmekrî ween̂asî. Emyawnomnî komo mtapotarî marha wencesî, Okwe, okwe, kacho. Ero ke piiri tak kawomyasî yukurunpetome so tak owya. Tukurunpen̂e xe cehsom komo wukurunpesî, kesî. Ero wa kesî Kporin komo.

6 Taa, on wara marha wîîkes ow hara, kir̂wanî ro xa mîn Kporin komo mtapotarî, kicicitho pînî ro mak. Prata wara nasî akir̂wamaxapu wara. On wara prata nakir̂wamexe ciin̂e ro komo, nukuyaxe wehto yen yaw, kawau kahxapu yaw. Yusmunthîrî nowyaxe 7 ro anarimaw kir̂wan̂he xa tak ehtome. Ero wara xa marha nasî Kporin komo mtapotarî hara, prata wara, akir̂wamatîkaxapu wara.

7 Cesemetanmesom komo kurunpen̂e Amoro. Emetanmekî xatî komo yehn̂anmekn̂e me masî miya roro eroromero.

8 Anarimaw so kayaritomo me rma tak n̂ecir̂axe kicicitho komo kica. Ero wa ecir̂ataw so twerîhra ro mak tak n̂etar̂axe kicicme cehsom komo amna chere kica.