Waano yaan̂e ro n̂enîrî on, Tapi wanorî

1 On wara was ow, Kporin komo pona ween̂asî. Ero ke ahce kacho on wara mîîketu owya, Miya etoko torowo wara? Îh pona cesî torowo takowerî yaka ero wa etoko, mîîkexe owya. Ahce kacho ero wa mîîketu owya?

2 On wara naxe kicicme cehsom komo, tîkrapan komo n̂ehsaxe. Tuwuhre n̂iir̂axe yaaci yaka. Waiwî yar̂ma xe naxe awarpanaw kir̂wan̂he cexi xatî komo wotohme oko.

3 Mîîmo mapatan yatpîche ahce wa thakwa re mîîmo n̂iir̂atu kir̂wan komo?

4 Tîmîn yaw nasî Kporin komo kir̂wanî ro yaw. Kah yaw nasî Noro yapon. Tooto komo poko cewke rma tko nasî. En̂exa rma ehtopo komo n̂een̂asî yukuknomachome tîwya.

5 Kir̂wan komo yehtopo nukuknomesî Kporin komo. Kicicme cehsom komo xera reha nasî. Waihkano ciri xatî komo xera ro mak nasî.

6 Noro yipu komo yînwakrerî mera ro mak naxe. Pona so xa matko nar̂mesî wehto roron, weeyu yehkuru warai marha nar̂mesî pona so wehto ke etahsîxapu. Ocowo marha n̂ekpesî ocorono xa oco, yipikan̂e komo me. Ero wa so makî thakwa Kaan n̂iir̂asî kicicme cehsom komo.

7 Kir̂wanî ro Mîk Kporin komo. Tpoxwe xa nasî yîwya kir̂wan̂he kehtopo. Kir̂wan̂he kexitaw so Noro yewru yenîn̂e me taxe amn̂e. Ero wa taxe.