Apa kah yawno, on wara wîîkes awya, ahce kacho mooxeno wara mai ha? Ahce kacho meseyamya amna yesemetanmekyataw?

2 On wara naxe kicicme cehsom komo, anarî komo yopono me n̂esehtînoyaxe kica. Ero ke kar̂pen komo n̂epor̂axe emetanmechome. On wara kr̂a wemetanmekyasî, kexe kica. N̂examro xa matko n̂esemetanmecowpe Apa tînîhtînoputhîrî komo yaw roro rma.

3 On wara kexe kicicme cehsom komo, Ow xa oyemyawno wahsîyasî mer̂pora, kexe. Takîhsom xa ham mîkyam, kexe marha cesewakresom ro komo poko. Kicicme so reha nîmtapowaxe Kporin komo poko okwe.

4 Kporin komo yenî xera naxe noro yipu komo, Ow xa takîhsom, kan̂e wara cexirî ke so. Kaan poko esehtînopîra ro mak naxe okwe.

5 Ahce poko so na cexitaw so ehn̂ara rma naxe. Kawno wara mak nîhtînoyaxe awya tpanaretopo Apa, mooxeno wara ro mak. N̂etaporexe mak tîîxatî pîn poko.

6 On wara kexe tîhnaw so, Ahwokan me ro mak wasî. Oyesemetanmetopo oyeporîra ro mak wa nasî, pahxaro meero oyeporîra, kexe.

7 Emapona roro eremkano ritopo poko nîmtapowaxe. Cemaronwaxe roro marha kica. Emetanmekno ritopo poko marha nîmtapowaxe. Kicicitho me ro mak nîmtapowaxe kica.

8 Ewto panaw so wapantono n̂iir̂axe. Peen cheka n̂eseyamyaxe kir̂wanînhîrî pen komo wotohme okwe. En̂epa me mak tînwaikarî komo momokyaxe yukurumnî pen kom ha.

9 Reaw wara naxe oko. Cewtarî yaw n̂ewapancesî reaw. Ero wa xa marha naxe kicicme cehsom kom hara, yukurumnî komo wapancexe emcinotome tak tîmîyen komo warai yaka.

10 Iito tak n̂etamruyaxe roopore xa. Yukurumnî pen komo nar̂mexe kar̂pe cexirî ke so.

11 On wara kexe emetanmekn̂enhîrî komo tîhnaw so, Twen̂ekarî mak nasî Kaan owya emetanmekno ritoponho poko. Oyehtoponho yenîhra ro mak nasî, kexe kica.

12 Ero ke on wara wîîkes awya, Kaan xa Amoro Apa. Piiri tak awomko. Apockantakî, yukurumnî pen komo akronomakî. Yîtwen̂ekarîntara cma re masî noro yipu komo poko.

13 Ahce wa cexirî ke Kaan nîwîrîyaketu kicicme cehsom komo? Ahce kacho on wara ketu, Oyen̂ekara ro mak nasî Kaan, ketu?

14 Kicicme n̂examro yehtopo rma tko wa meen̂as Apa. Ahwokano rirî yîwya so meen̂asî, emetanmekno rirî marha. Ero wa exirî komo wa yenîn̂e me masî emetanmexapu komo yepantome tak. Tukurunpen̂e me ahtînoyaxe yukurumnî komo. Yîmîhnî komo marha makronomes Apa.

15 Kicicme cehsom komo yaporî axikwoko Apa, kicicme cehsom komo yaporî ha. Kicicme ehtopo komo poyero en̂ekakî, en̂ekatîkakî xa.

16 Kîkayaritomon komo Mîk Kporin komo. Miya roro kayaritomo me nasî etowîn me ro makî. Anarî yana pen komo tak n̂ehcamnoyaxe, Noro rowon pononho pen komo.

17 Kar̂pen me cesehtînosom komo mtapotarî mentai Apa, Amna cma re mukurunpesî, kacho ha. Noro yipu komo mahworesî. Yîwratarî komo mencesî.

18 Yîmîhnî komo mukurunpesî, emetanmexapu komo marha. Ero wa yukurunpeno miir̂asî emetanmekno cirihra tak ehtome so roowo pono kom ha. Ero wa ehtome so yukurunpeno miir̂asî.