Waano Yaan̂e Ro N̂enîrî Tan. Omumutho Pen Waihtopo, Kacho On, Tapi Wanorî.

1 Apa kah yawno, on wara wîîkes awya, Kir̂wan̂he xa mai ham okre, wîîkesî. Yaaro xa ero wa wîîkes awya. An̂irithîrî komo marha wekatîmyasî mîk hak ya, amna yeserepokacho me an̂irithîrî ha.

2 Tawake xa was apoko, apoko kahwowasî. Awosotî poko kewanomesî Apa. Kyopono xa Amoro.

3 Ooxatî pîn komo porohyaxe oyakro awexirî ke. Cehrokaxmu me mak naxe, waihyaxe mak tak.

4 Kir̂wan mîkro, mîîkekn̂e opoko oyen̂eketaw yîwya so. Awapon po ceremaxi mîxakn̂e en̂ekano ritopo po. Yaaro en̂ekano miir̂akn̂e.

5 Mîk hak maywen komo meeyakn̂e, kicicme cehsom komo tak mîwaikekn̂e. Osotî komo kr̂a mîhcamnoyakn̂e etacin me ro mak tak ehtome so miya roro.

6 Aaxatî pîn komo tak n̂etwîrîmetken̂e akir̂waman me hara okwe. Eroromero n̂etwîrîmetken̂e. Ewtotho me tak nas ewtonthîrî komo. Anarimaw naatî tîtmokesî yimicin meero, ero wa n̂examro yewtontho komo mohkan̂e wara mîxakn̂e. Ewtonthîrî komo yosotîtho meero n̂ehcamnoyakn̂e okwe.

7 Ehcamnopîn me ro makî tko nasî Kporin komo. Kîkayaritomon me n̂ecir̂akn̂e en̂ekano ritohme tak.

8 Takîhso en̂ekano n̂iir̂asî Noro. Roowo poko hakno komo n̂en̂ekesî. Anarî yana komo n̂en̂ekesî, etîme re mak.

9 Emetanmexapu komo wacan warai Mîk Kporin komo yîhyaka ketkurunpetopo. Kesemetanmekyataw yîhyaka ketkurunpetopo me nasî.

10 On wara natu awosotî yentan̂e komo Apa, apona tak n̂een̂atu. Awenî xatî komo yahsîpînkan̂e pînî ro mak Amoro Apa. Ero warai Amoro.

11 Ero ke on wara wîîkes awya so oyakno komo, Kporin komo poko ewanomacoko, Siaw pono me nasî, Noro poko ha. Kir̂wan̂he yîwya ciino ritoponho ekatîmcoko kpoyino komo ya.

12 Waihkaxa pen yepanîyataw emetanmexapu komo ponaro marha nasî. Yîwratarî komo poko yîtwen̂ekarîntara ro mak nasî. Noro yipu Mîk Kporin komo.

13 Apa, ooxatî pîn komo oyemetanmekyaxe, enko xe. Ero ke opînîn yaw cma re masî. Owaitopo potawno wara oyexitaw ow cma re manîmyasî.

14 Ero wa cma re ow manîmyasî kir̂wan̂he xa awehtopo yekatîmn̂e me tak oyehtome. Ewto potaw rma wekatîmyasî, Siaw yemsîrî potaw ha. Iito rma kahwowas apoko oyanîmrî ke awya.

15 Ewtarî tî nahcetken̂e anarî yana komo. Ero yaka rma tko n̂epîrketken̂e n̂examro rma. Mîîye warai marha tî enîhnî na n̂iir̂atken̂e. N̂examro rma tko n̂emciyatken̂e ero yaka.

16 Yaaro xa en̂ekano rin̂e me n̂esehtînomexpesî Kporin komo. Enko xe, emcinono ritopo n̂iir̂atu kicicme cehsom komo. Ero yaka rma n̂emciyatu n̂examro rma. Kporin komo rma ero wa ciino n̂iir̂asî.

17 Wehto imo ywaka kicicme cehsom komo n̂en̂epesî Kporin komo. Iina n̂en̂epesî Kaan ponarono pîn pen komo ahnoro, mîk hak maywen pen kom ha.

18 Eroromero twen̂ekano wara exihra nasî Kaan yupurantamnî komo poko. Oyakronomesî amn̂e Kporin komo, kexe cesemetanmesom komo. Ero wa kacho poko twen̂ekarî exihra nasî Kaan.

19 Piiri cma re mawomyasî, Apa. Ayopono warahra tak tooto komo cirko. Anarî yana komo enko panaretome awya.

20 Cerahsom me n̂examro cirko, Apa. Tooto mak ham kîwyam, kamexpoko tak yîwya so. Ero wa kan̂e me mîk hak maywen komo cirko.