8
Waano Yaan̂e N̂enîrî On, Tapi Wanorî. Kaan Nakîhtotho Yeen̂ataw Noro Pîntho Me Mak N̂esehtînoyasî Tapi
1 Apa kah yawno, amna porin Amoro. Kir̂wanî ro me xa mekaiwasî roowo poko hakno komo ya. Kaw xa miir̂akn̂e kir̂wan̂he awehtopo kaapu yepoyino me.
2 Kar̂pe xa awehtopo menpesî rikomo mtapotarî ke, moomo yeen̂e mtapotarî ke rma. Noro yipu komo ke awehtopo menpesî aaxatî pîn komo yîtîtmamnotome, cesepansom komo yîtîtmamnotome.
3 Anarimaw so kaapu ween̂asî ceserepokaro. Awamoyaran ke an̂irithîrî mîn kah yawno komo. Nuun̂i marha miir̂akn̂e kah yawno me, xir̂ko komo marha.
4 Ero yipu yeen̂ataw owya on wara wîîkes awya, ahce kacho amnatho ponaro mai toototho ponaro? Ahce kacho amna mîwakre tooto komo yepamrî mak? wîîkesî.
5 Tooto komo miir̂akn̂e ancu komo xawyakan me. Takîhsom me rma tko miir̂akn̂e, cekaiporesom me marha.
6 Amna miir̂akn̂e anakîtothîrî komo yenîn̂e me. Amna yanton me miir̂akn̂e ahnoro anakîtothîrî.
7-8 Ero wa miirakn̂e kahn̂eru komo, paaka komo, okno pîn komo meero, tarin̂em komo, ootî komo, yukwawno kom ha. Tuuna imo yesamarî yaw tîtosom komo marha ero wa miir̂akn̂e. Ahnoro mak miir̂akn̂e amna yanton me.
9 Apa kah yawno, amna porin Amoro. Kir̂wanî ro me xa mekaiwasî roowo poko hakno komo ya. Ero wa mekaiwasî.