Kporin Komo N̂entarî Me Tapi Narîtho Tan Waano Kuuxe Pokono, Benxamin Yepamtho Pokono Ha.

1 Apa kah yawno, ponaro xa oyehtopo Amoro. Ero ke on wara wîîkes awya, apona xa ween̂asî. Yaake naxe oyemetanmekn̂e komo okwe. Ero ke cma re ow mukurunpesî.

2 Okurunpera awexitaw oyeskan̂e wara mak naxe oko reaw wara. Oyarixkexe mak oko okurunpen̂e exihtorî ke thakwa.

3-4 Oporin xa Amoro Apa, ponaro oyehtopo. Ero ke on wara marha wîîkes awya, ahce wa wai awya? Kicicme katî wai awya, ooxatî komo katî wepanîyakn̂e yîîxera oyehtopo ke hara? Ooxatî pîn komo yemyawnonho katî waar̂akn̂e tohnaw mak?

5 Ero wara oyexitaw ketaw na ooxatî pîn mokope rma oyahsîso. Oyar̂mape roowo pona oyapitome. Noro pîntho me ro mak oripe roowo pona ar̂maxapu wara. Ero wara kr̂a oripe kicicme oyexitaw awya Apa.

6 Piiri tak awomko, Apa, rîîwo me xa. Nîrwonaxe ooxatî pîn komo opoko. Ero ke wîîkesî, Rîîwo me awomko, wîîkesî. Apakak Apa. Ow epanko amtapotachonhîrî yaw roro rma.

7 Tooto komo enmeko ahyaka. Enmekîche so n̂examro kayaritomon komo me tak esenpoko. Kah yawno me rma esenpoko yîwya so.

8 Anarî yana komo mak en̂ekakî Apa. Kir̂wan me oyehtopo enpoko, emîknono rin̂e pîn me oyehtopo marha.

9 Kaan xa Amoro Apa kir̂wanî ro. Kropotarî yenîn̂e xa Amoro, kesehtînotopo yenîn̂e meero. Ero ke on wara cma re mîîkesî kicicme cehsom komo ya, N̂ex ha kicicitho poko awehtopo komo, mîîkesî cma re yîwya so. Kir̂wan komo reha yukurunpeko roro. Kir̂wanî ro Amoro Apa. Tooto komo ropotawno mukuknomesî, tooto komo yesehtînotopo marha.

10 Okurunpen̂e Mîkî Kaan, kayaritomo me cehsom xa. Kir̂wan me cexi xatî komo kurunpen̂e Mîk ha.

11 Yaaro ken̂ekan̂e Kaan. Ero ke enmar̂atîxera nîrwonasî Noro kicicme cehsom komo poko.

12 On wara nasî Kaan amn̂e kicicme cehsom komo poko cehtoponhîrî komo poxunkara exitaw so, tîkaciparan tak nîyohcesî oko, tîkrapan naincesî marha taatîy xa.

13 Mîn hak mak n̂iir̂asî waihkano ritopo. Tuwuhre marha napohcesî wehto ken̂arî oco.

14 On wara naxe kicicme cehsom komo, wooxam wara mak naxe ewruporono wara. Kicicme cehtopo makî tko nai yîropotaw so. Cetahsîsom wara rma re naxe, yîwîrîmano ritopo mak nai yîmxîkrî wara kica. Pahkî cexiche so tak cewrusom wara naxe hara. Kemîknotopo me mak n̂ewruyaxe okwe tîmxîkrî komo wara.

15 Ewtarî nahcexe kicicme cehsom komo yiixera cehtopo komo yepîrkachome tak ero yaka. Yuhnaka nahcexe. Ero yaka tko n̂epîrkexe ahton̂enhîrî rma.

16 On wara naxe amn̂e emetanmekno cin̂enho, ero rma tak n̂etaknamesî emetanmekn̂enhîrî yemetanmecho me hara oko. Anarî komo waihkano n̂iir̂at okwe. Ero yinhîrî ero rma tak n̂etaknamesî waihkano rin̂enho waihkacho me hara okwe. Ero wa naxe.

17 Kir̂wan̂he mai ham Apa, wîîkesî Kporin komo ya kir̂wanî ro me exirî ke. Kewanomesî marha Kporin komo poko, Kyopono ro poko. Noro yosotî poko kewanomesî. Ero wa kewanomesî Noro poko.