Waano Yaan̂e Ro N̂enîrî Tan. Raatî Yakro Taasom Tîyorkaxmu Yakro. Semin̂ici Wa Taasom. Tapi Wanorî Tan.

1 Apa kah yawno, on wara wîîkes awya, rîîwome cma re ow yîtwermara masî. Ow mîpanare rma na. Rîîwo me tko ow panarera esko.

2 Kar̂pera ro mak was Apa. Ero ke opînîn yaw esko. N̂erewasî xa oko oyocho. Ero ke cma re ow mîkarices hara.

3 Ahwora ro mak was Apa. Ahcemaw xa ow makronome? Pahkî xa ow akronomara masî.

4 Ohyaka cma re mîmokyas hara okurunpeso. Opînîn yaw awexirî ke Ow yukurunpeko.

5 Aponaro exihra ro mak naxe waixah pen komo. Kir̂wan̂he awehtopo poko yîmtapotara ro mak naxe roowo cheka ahruxah pen kom ha.

6 Kekar̂katîka oyemkutunîmrî ke. Owratarî poko xa wenmakesî. Okuywan wukmanîresî mak oyewyokuthîrî ke mer̂pono pîn ke.

7 Kewxîrîyasî oyahwokarî ke. Poritomotho yewru wara tak n̂ehtîkes okwe oyewru owratarî ke, ooxatî pîn komo poko owratarî ke ha.

8 On wara wîîkesî kicicitho poko cehsom komo ya, Etocoko kr̂a amyamro ahnoro. Owratarî tak wa n̂enta Kporin komo.

9 Omtapotarî n̂enta, Opînîn yaw cma re masî, kacho owya. Omtapotacho ponaro nasî. Ero wa wîîkesî ooxatî pîn komo ya.

10 Ooxatî pîn komo yîhyapamnopu xe cma re was awya Apa. Ahwoka xe so ro mak was awya. Noro yipu komo porohkakî, ponan̂e rma ehn̂anmeko. Ero wa cma re n̂examro miir̂as Apa. Ero wa mak wîîkes awya.