5
Tapi Wanorî On, Waano Yaan̂e Ro Narîrî. Raatî Yakro Taasom On Kaan Yakro Tapi Mtapotacho On
1 Apa kah yawno, kîmtapowas awakro. Ero ke omtapotarî cma re mencesî. Ahwora oyehtopo ponaro cma re masî.
2 Cerewre kîmtapowas awakro. Ero ke omtapotarî cma re mencesî. Okayaritomon Amoro, ponaro oyehtopo xa. Ero ke awakro kîmtapowasî.
3 Pahxaxa ro rma ka omtapotarî mences Apa. Ero yimaw roro so kîmtapowasî awakro oyakronomacho poko. Apona mak ween̂asî.
4 Kaan xa Amoro apa. Tawake wasî apoko so, kahra ro mak masî kicicime cehsom komo ya. Ahyawno me exihra ro mak naxe kicicitho komo.
5 Cehcoyoponkaxmu komo ececetora thakwa naxe awepatai. Kicicitho pokono komo xatî pînî ro mak Amoro.
6 Cemarontaxmu komo waihkan̂e Amoro Apa. Waihkano ciri xatî komo xera ro mak masî, cesemîknosom komo xera marha masî. Noro yipu komo xatî pînî ro mak Amoro.
7 Ero warahra reha mas opoko. Opînîn yaw reha masî, opînîn yaw xa okre. Ero wa awexirî ke opoko amîn yaka kewomyasî. Anarimaw amîn wece cewru mak kutupenwasî amamakan me. Oporinî ro Amoro, wîîkesî amînî ro wece cewru.
8 On wara marha wîîkes awya Apa, kir̂wanî ro me awehtopo yaw roro ow arko, pataw mak ow arko awesamarî yaw roro. Yaake naxe ooxatî pîn komo okwe. Ero ke ero wara wîîkes awya.
9 On wara naxe ooxatî pîn komo, kemîknon̂e me mak nîmtapowaxe kica. Ar̂mano ritopo ponaro marha naxe okwe. Kokem wara mak nasî kica eexe komo, iyocho ahrunkaxapu wara kica. Kir̂wan rma ha re kîwya so. Tohnaw ro mak ero wa kexe kica.
10 Kicicme maxe kica, kasko yîwya so Apa. Kaan xa Amoro. Esentatoponhîrî komo ke rma n̂examro ar̂makî. Mooxe en̂epeko awewetîra exirî ke so kica emapona roro. Awanwekyaxe mak okwe, ero ke en̂epeko. Ero wa cirko noro yipu komo.
11 Ero warahra reha cirko apona enîn̂e komo. Tahwore reha cirko noro yipu komo. Tahwore cewanomaxmu me xa n̂examro cirko miya roro yîtîhkan me ro mak. Noro yipu komo yukurunpeko Apa. Ero wa yukurunpeko awosotî xatî komo, apoko ahwotachome so.
12 Kir̂wan komo yakronoman̂e xa Amoro Apa. Yukurunpen̂e me masî, yiixe so awehtopo ke rma mîwacancesî yukurunpetome. Ero wa takîhsom komo makronomesî.