Tapi Wanorî On Waano Yaan̂e Ro N̂enîrî. Raatî Yakro Taasom On, Tawyockem Yakro Taasom Ha.

1 Apa kah yawno, Kir̂wanî ro xa Amoro, ponaro oyehtopo xa. Kîmtapowasî awakro. Ero ke omtapotarî cma re mencesî. Oyahworen̂enho xa Amoro ahwora oyexitaw. Ero ke wîîkesî xa hara awya. Opînîn yaw cma re masî, omtapotarî cma re mencesî, wîîkesî. Ero wa wîîkes awya.

2 Taa, on wara wîîkesî tooto komo ya hara, Atî wicakî pahkî mîmtapowatu opoko okwe? Kir̂wan̂he oyehtopo poko rma mîmtapowaxe kicicitho me kica. Ero pîntho poko marha mepohkexe kica. Cemaro ponaro mak awexi xe so mat ham kica. Ahcemaw tak ero ponarora mat ha?

3 On wara xa kacoko Kaan poko, Tponarono komo men̂ekesî, nahsîyasî tîwyanî ro me, kacoko. Ero warai me cexirî ke Noro omtapotarî n̂encesî.

4 Ero ke on wara wîîkes awya so, arwonataw so kicicme exihra men ehcoko. Kuywa po awexitaw so tîtken̂e mak ehcoko. Awehtopo komo poko xa esehtînocoko.

5 Ero wara ehcoko kir̂wan̂he awehtome so Kaan ya tîmsom tîmyataw. Noro pona marha encoko. Ero wara ehcoko.

6 On wara kexe anarî komo mer̂pono pîn komo, Onoke thakwa re kahworetu so okwe? kexe mer̂pono pîn komo Apa, Amoro xa amna ahworeko awewru ke rma. Weeyu warai xa mîn awewru okre.

7 Tahwore rma re naxe mararî ciin̂e komo ceperke xa exitaw tînatîrî komo raixi warai, merpora exitaw marha uupa yukun. Ow xa tko mahworei tahwore xa tak oyehtome noro yipu komo yopo.

8 On wara was Apa, cerepore roro was okurunperî ke awya. Ero ke erasîra ro mak ketakriyasî owîntome. Amoro mak ow mukurunpesî. Ero ke erasîra wasî.