1-2 Ero yinhîrî takî tî nîmtapowakn̂e xa hara Xoo. On wara tî kekn̂e, Oyakno komo, kar̂pentho owî. Ahce wa ha re ow makronomacow? Ahce wa ha re apokar̂pen mîkaritocow ha?

3 Ahce wa ha re ow makîhrecow camkîno? Ahce wa re akîhreno miicow?

4 Onoke xa awakîrecow so ero wara amtapotarî komo poko? Onoke yekatî yanme xa ma mîmtapotacow? wîîkes awya so.

5 On wara marha wîîkes awya so, N̂eraswatu xa waixapu komo, tatanatu ro mak okwe. Ero wa natu tuuna makatawno komo, yukwawno komo marha.

6 Ahrura ro mak nasî waihxapu komo yeken Kaan ya. Tahruso exihnî me nasî kwaihtopo yîwya.

7 Kaapu n̂ehyatkesî Kaan yarîhnî yepoi, nohce n̂ixan yepoi. Exihnî pona marha roowo namposocesî.

8 Tuuna womcesî tuuna yewru ke, tîn̂irithîrî ke rma. Wara rma etahkara nasî tuuna yewru ero ke, tawsîn̂em ke.

9 Tapon n̂eewoponcesî kaweresî ke, tîn̂irithîrî ke marha.

10 Tuuna rarî mamhoko tî n̂iir̂akn̂e kaapu mîtî, tamnon̂em ha. Iito nasî katpan wokpan, awarpan wokpan marha.

11 Eino ciir̂ataw Kaan ya n̂esewsîyasî mak tak kaapu mapatan eserepokaxapu wara.

12 Kar̂pe cexirî ke Noro tuuna imo n̂ewcokocokomesî, kahxi wara ro mak n̂iir̂asî. Yuhnari yîhtînon̂e me cexirî ke cehcoyoponkaxmu pen komo namekn̂e tarixkaxi ro.

13 Ero yinhîrî kaapu tak katpankes hara Cekatî ke. Tusmuyemînhîrî katpankesî. Okoyi pen tî paraxke tamorî ke, sehrere me cetaw rma.

14 Ero wa nasî Kaan. Noro yehtopo yemyatwono makî tko wekatmo. Noro yehtopo cencexe rma cik ha re ehtun wara ro mak ha tko okwe. Onoke ma re Noro yehtopo n̂ence takîhso kar̂pe cehtopo yenpetaw? Ero wicakî mak nai kar̂pe noro yehtopo, kan̂e exihra ro mak nasî. Tarai wara ro mak nasî kar̂pe Noro yehtopo kopi? kekn̂e tî. Ero wa tî kekn̂e Xoo.