1-4 Taa, nîmtapowakn̂e rma tî Xoo. On wara tî kekn̂e, Yaaro tan kîmtapowasî. Oyepanîn̂e pînî rma Mîk Kaan. Karitî ro Mîk. Noro rma tko oyahwokekn̂e ro mak okwe. Yaaro tan wîîkesî. Kaan nasî waipîn me, kacho wara rma nasî omtapotarî tan yaaro xa. Kicicitho me yîmtapotara ro mak wasî, cemaro me yîmtapotara marha. Miya roro ero wara wasî kar̂pe oyehtopo yecenarî rma, Kaan yapepen exitaw ro oyewnarî yaw ero wara yîmtapotara ro mak wasî.

5 Yaaro mîîkexe owya, kahra ro makî tko was awya so. Kicicme wai ham ke kica, kahra ro mak wasî miya roro owaitopo pona roro.

6 Kir̂wan me oyehtopo wekatîmyasî rma. Kicicme wai ham okwe, kahra ro mak wasî. Kicicitho ow ham, kahra ro mak wasî oropotaw miya roro kar̂pe oyehtopo yecenarî.

7 Ooxatî pîn komo yîwîrîma xe wasî Kaan ya kicicitho komo nîwîrîmesî ero wa xa marha. Kicicitho komo n̂emetanmekyasî Noro ero wa xa marha emetanmekî xe wasî oponanîmton̂e kom hara.

8 On wara naxe tohnaw cesenposom komo cexponketaw so, Kir̂wan̂he rma wai amn̂e, kahra thakwa naxe okwe. Ero wa kahra naxe Kaan ya n̂examro pen waihketaw yîwya.

9 Noro yipu komo mtapotarî ma re n̂ence Kaan ahwokacho komo eporîche?

10 Kir̂wan̂he nai Karitî ro okre, nîîke ha ma re noro yipu komo? Kaan yakro ma re nîmtapowatu roro n̂examro takronomacho komo poko?

11 Kar̂pe Kaan yehtopo poko kîhcamhokexe so ow. Karitî ro yehtopo yeyamra ro mak wasî.

12 Ero wa Noro yehtopo rma re meen̂axe. Ero ke ahce kacho akpîra ro mak mîmtapowatu kica oyakro?

13 Kicicitho komo xa n̂epemesî Kaan on wara. Emetanmekno rin̂e komo reha n̂esemetanmekyaxe Karitî ro yanme ha.

14 N̂epamyaxe rma yîmxîkrî komo tamaxmu me mak ha tko kacipara imo ke okwe. Rooma poko roro naxe okwe noro yipu yepamtho komo.

15 Noro yipu komo wenatîwono pen komo tak nahsîyasî eper̂a, kwaihkacho xa. Okoputhîrî komo tak nahruyaxe ewtarî yaka. Waipuche yîwratara rma naxe yihcinhîrî komo yîpînîn yaw so.

16 Anarimaw so prata na n̂enmekyatu noro yipu komo roowo pupun wara ro mak. Tponon komo marha n̂epamnoyatu mer̂pora, kawau cenmekyasî ero wa xa marha.

17 Yîn̂enmekîthîrî komo tko tak nas amn̂e takîhsom komo ponon me. Noro yipu komo purantantho tak n̂esekamyasî amn̂e kicicme exihnî komo ya yupurantan komo me hara.

18 Tîmîn komo rma re n̂iir̂axe tamatama wara kyam mak ha tko. Pawxi matko wa mak nasî yin̂irithîrî komo, waapa yekaiporen̂e mîn wa mak.

19 Noro yipu komo n̂etakriyaxe tupurantai ha ka. Ero yimaw makî tko tupurantai naxe. Pakache so hara exihra tak nasî yupurantanthîrî kom okwe.

20 Pona erahtîmtoponhîrî rma tak naar̂asî noro yipu pen komo kopi. Yukmacho warai rma naar̂asî. Anarimaw ocowo imo mokyasî kosope noro yipu komo yaan̂e.

21 Resce n̂ixan na mokya ocowo imo. Noro yipu pen komo tak naar̂asî. Ekenhîrî komo poi naar̂asî ro mak.

22 Noro yipu pen komo poko ciki kesî ro mak ocowo kar̂pe xa. Yîpînîn yaw so exihra ro mak nasî ocowo. Ero yai n̂emahciyaxe ro mak kicicitho komo.

23 Knowknow kan̂e wara rma tko naxe noro poyino komo tahwotaxmu wara. Ekenhîrî komo poi n̂en̂epesî ro mak, exe exe, kacho ke rma. Ero wa naxe poyino komo kicicitho komo poko, kekn̂e tî. Ero wa tî kekn̂e Xoo.