On wara marha tî kekn̂e Xoo, On wara marha wîîkes awya so, ahce kacho ken̂ekacho yukuknomara nai Karitî ro, kaamo yukuknomara? Ero yipu ponaro xa naxe Noro ponarono komo. Entara rma tko naxe, Ero kaamo po xa nasî awen̂ekacho kom ha, kacho.

2 On wara naxe anarî komo, mararînano wokpan n̂ewyetakexe okwe. Anarî komo yokutho marha naar̂axe en̂epa me. Noro yipu nînahmexe toh komo wara rma kica.

3 Anarimaw tokye nai na rikomo yîmîhnî. Buhu na nai iyoku. Noro yipu yokutho tko naar̂axe okwe. Anarimaw puranta nîmyaxe anarî komo wooxam yemyaka, iin̂o waixapu yemyaka. Noro yipu yokutho tko naar̂axe bui tupurantan yîramanpîra exichen me.

4 Cesemetanmesom komo kr̂a n̂en̂epexe anarî komo esama yai. Ero ke yupurantamnî komo mak n̂eseyamyaxe okwe.

5 Buhu komo wara rma naxe yupurantamnî komo, okno pîn wara, pohnîntawno wara. Iito mak naxe yupurantamnî komo tînahrî komo yeporîrî poko. Pohnîntawno mak n̂een̂axe tînahrî komo, tîmxîkrî komo nahrî marha.

6 Puruma yeputho namekyaxe mararînano pono mak. Kicicitho komo natîrî yeperîrî namekyaxe etîmtoxaputho cik.

7 Ponomnî me mak nîwînîkyaxe kosope tponon komo exihtorî ke thakwa okwe. Twotu chew nîwînîkyaxe amuhnî me thakwa okwe.

8 Îh po cexitaw so macexe kica tuuna chew. Toopu mîtkoso mak n̂ecececexe yîmîmnî me cexirî ke so okwe.

9 On wara marha naxe anarî komo, rikomo cik nahsîyaxe yîmîhnî okwe. Yîson n̂enarkexe moomo ke wokpetaw rma. Yupurantamnî xîkrî cik marha naar̂axe cepethîkachonhîrî komo yepetho me kica.

10 Yupurantamnî komo n̂en̂epexe ponomnî me rma okwe. Noro yipu komo rma re napickexe tînatîrî komo poko. Puruma yepu yenmekrî poko napickexe, awrutamixapu yenmekrî poko. Enmekîche tak naar̂axe tîmîn yaka rooma poko exitaw so rma enmekn̂enhîrî komo.

11 Oripa yeperîrî kawnukyaxe tantoman̂e komo mîn yaw so. Uupa yeperîrî yewkukacho poko marha n̂etapickexe. Twokru xe ro mak cexitaw so ero poko n̂etapickexe okwe.

12 Anarî pen komo waihyaxe ewto imo po rma. N̂emkutunaxe waiporo cexitaw so okwe. Anarimaw iito marha naxe paraxkaxapu komo oko. N̂emtarakexe marha noro yipu komo. Wara rma, Kicicme maxe kica, kahra nai ham Kaan waihkan̂e komo ya.

13 On wara naxe anarî kom hara, tweyuru komo xatî pîn me naxe. Tweikem yenîhra naxe esama. Ero yipu yaw tohra naxe kica.

14 Enmaporo tak cexe noro yipu komo waihkano riso. Ero yimaw tak yupurantamnî pen komo waihkexe okwe, cesemetanmesom pen kom ha. Kosope mak nasî ero yipu poko cen̂epan̂em wara okwe.

15 Cipici yai ro cehsom komo marha naxe kokmamtopo ponaro. On wara kexe, Oyenîra ro mak naxe iitono komo kosope owcetaw, kexe. N̂esewoponyaxe marha kica tîcetaw so.

16 Kosope mak mînînano yaka n̂ewomyaxe. Katpanaw mîmonano nukuknomexe ero yaka cewomtome so kosope. Katpan xera ro mak naxe okwe.

17 Enmarî n̂een̂axe twaihtopo komo kuknon me mak okwe. Anarimaw on wara kacho n̂encexe, Noro men mîkro ha, kacho n̂encexe. Ero yimaw n̂eraswaxe ro mak tak twaihtopo komo pona.

18 On wara tko naxe noro yipu komo amn̂e okwe, kahxi wakron wara mak naxe, tuuna n̂iritho wara. Noro yipu komo mararîn nasî tîwîrîmaxi Kaanî mtapotarî yanme. Ero ke yînatîrî yaka tohra ro mak naxe tînahrî xatî komo, uupa yepu yaka tohra.

19 Kaamo yimaw n̂eepenhîrî tak nuxukrapamyasî. Eronhîrî rma tko nuturpamnotîkesî kaamo oco. Ero wa xa marha naxe kicicme ehxapu komo, noro yipu komo n̂ehcamnoyaxe okoputho yewtarî yaka.

20 Twen̂ekarî tak nasî yîsonînhîrî noro yipu komo poko. Okoputhîrî yakrî tak yupunthîrî korîn nahtîke tpoxwem wara. Kicicitho komo yosotî tak n̂ehcamnoyasî. Yîpîrîtho wara mak naxe amn̂e, tîrakaxmu me.

21 On wara marha naxe okwe, wooxam pen komo n̂emetanmekyaxe, yîmxîtan pen kom ha. Iin̂o waixapu komo marha wakrera naxe okwe.

22 Miya kr̂a tko karitî komo n̂ihxikyasî Kaan kar̂pe cexirî ke. Cemyawnoi rma re n̂ehtîkexe. Wara rma twaihtopo komo ponaro rma tko n̂axe.

23 Ahri ka etwîrîman me rma ka n̂ehcowpe, kesî makî ka Kaan noro yipu komo poko. Ero ke cerepore ka naxe. N̂examro yehtopo rma tko n̂een̂asî Kaan.

24 Kyopono me ka n̂esenpexe yohno mak ha tko. Ero yinhîrî tak n̂ehcamnoyaxe hara okwe. Kîxawyakan me tak n̂ehtîkexe hara. Noro yipu komo nar̂mesî Kaan miyan komo wara rma okwe. Ehtoponhîrî komo tak nîhkocesî puruma yeperîrî taxikwesî ero wara rma.

25 Ero warahra katî nai kicicitho komo yehtopo awya so? Onoke ma re tohnaw ekatîmn̂e me oyenpe? Onoke ma re omtayar̂me ha? kekn̂e tî. Ero wa tî kekn̂e Xoo.