Okukmetaw Kir̂wanî Ro Me Oyenpesî Kaan, Kesî Xoo
23
1-2 Ero yinhîrî tak tî Xoo nîmtapowakn̂e xa hara. On wara tî kekn̂e, Kîmtapowasî rma oyahwokacho poko. Cerewre ro mak kîmtapowasî oroto. Oyemetanmekyasî rma Kaan omtapotarî yentan̂e pîn wara, Okwe okwe, kacho yentan̂e pîn wara.3 Ahto xa nai Noro yeken okwe? Enta xe ro mak wasî, Iito nai Noro yeken, kacho. Owto xe ro mak wasî yîhyaka.
4 Yîhyaw oyexitaw oyehtopo tak wekatîmyasî yîwya. Miya ro mak kîmtapowasî owîrîmacho poko. Tohnaw yîwîrîmaxapu me oyehtopo poko kîmtapocetîkesî.
5 Ero yimaw tak wencesî oyeyutopo yîwya. Takîhso tak wencesî yîmtapotarî.
6 Omtayar̂me katî Noro kar̂pe ro mak cexirî ke? Pîra ro mak. Omtapotarî xa matko n̂encesî.
7 Iito kexitaw yîhyaw, kehtopo cekatîmtîkesî yîwya. Kir̂wan me kexitaw cesekatîmtîkesî. Ero wa oyesekatîmtîkache yîwya oyen̂ekan̂e pîn me tak nasî miya roro.
8 Wara rma resce yaw roro owcetaw iito exihra nasî Kaan. Oesce yaw roro owcetaw hara iito marha enîhra wasî.
9 Anarimaw nohce n̂ixa nai Noro ahce na poko. Wara rma iito enîhra wasî. Anarimaw hara suu yaw roro nîîce hara. Iito marha Noro yenîhra ro mak wasî.
10 Oyehtopo rma tko n̂een̂asî Noro. Okukmatîkache tak ooru warai me tak kesenpes okre.
11 Noro wenatho yaw tîtosom me roro wîxakn̂e. Noro yesamarî yaw mak ketar̂akn̂e etowra ro mak.
12 Yîwya opanatanmetopo yaw roro mak wîxakn̂e etowîn me ro mak. Tpoxwe ro mak wîhtînoyasî Kaanî mtapotachonho, onahrî yopo ro mak.
13 Kwarai pînî ro makî tko Mîkî Kaan. Ero wara xa wiir̂asî, ketaw yîwya, onoke thakwa re anarme nîhtînomexpe yîwya? Ahce na ciri xe cexitaw ero rma n̂iir̂asî.
14 Pahxa rma owîrîmacho nukuknomekn̂e ham Noro. Ero ke ero yaw roro rma tak owîrîmesî. Miya rma na nai yîwya yîhtînotopo ero yipu pokono xa hara.
15 Tan opanaw nai Noro. Ero ke keraswasî ro mak. Ero wara Noro yehtopo yîhtînoyataw owya keraswasî Noro pona.
16 Kaanî rma Mîk oyahwokamexpoi, Karitî ro Mîk ha. Noro xa oyeraspesî ro mak.
17 Ahce kacho waipîra ka wîxakn̂e oyahrura ehtome awarpan. Oyewopontotopo wara nasî awarpan. Ahce kacho waipîra ka wîxakn̂e awarpan chewra tak oyehtome? kekn̂e tî. Ero wa tî kekn̂e Xoo.