1-2 Ero yinhîrî takî tî Eripas nîmtapowakn̂e xa hara, Teman pono. On wara tî kekn̂e, Ai, oyakno, on wara wîîkesî xa hara awya, Kaan ma re takîhre kîw takîhso n̂he tak Noro yehtome? Takîhso kexitaw so kîwyamu rma re cetakîrexe wara n̂he tak kehtome so.

3 Tawake ma re nai Karitî ro apoko kir̂wan̂he awexitaw? Kar̂pe n̂he ma re nai Kaan awya, Kicicitho Mîkro, kacho mera ro mak awexitaw?

4 Ahce wa awexirî poyero awen̂eke Noro? Tpoko twerî awexirî poyero ma re awen̂eke awya?

5 Mer̂pora tko na nai kicicme awehtoponhîrî? Miya rma na nai akpîra awehtoponhîrî yîtîhkan me ro mak?

6 Apurantan tîmyataw apoyino yemyaka, noro yemyawnonho tko na mahsîyakn̂e tohnaw ro mak okwe. Oyepeme hara amn̂e, kacho mahsîyakn̂e tohnaw. Anarî komo pononî rma tko na mahsîyakn̂e ero wa kacho me. Pononkatîkano na mîîr̂akn̂e ponomnî pen komo rma okwe.

7 Ekar̂kaxapu komo marha na wokpara mîxakn̂e tuuna ke okwe. Tîroman̂em komo na yînahmara mîxakn̂e okwe.

8 Cemyawnoi ro mak mîxakn̂e, mararî yosom me, woskara yosom me marha. Takîhsom me cekaiporesom komo mak xatken̂e iito awakro.

9 Iin̂o waixapu komo reha men̂epekn̂e yînapumnî me okwe. Rikomo komo yapoxwon̂e wara marha mîxakn̂e oko, yîmîhnî komo yapoxwon̂e wara.

10 Ero wa awexirî poyero wa awemcinotopo warai chewno me tak mas okwe. Ero wa awexirî poyero marha awahwokacho awekatkesî.

11 Ero wa awexirî poyero marha awarpanawno wara tak masî ahce na yenîn̂e pîn me tak okwe. Ero wa awexirî poyero enorixapu wara tak masî, yukmarî kwaka enorixapu wara.

12 Meye ro mak nai Kaan kah yaw, kawno yaw xa. Xir̂ko ka enko kaw ro mak exirî. Anarî mko nai meye ro mak kaw xa tak.

13 On wara tko mîîkesî, Oyehtoponho ma re n̂een̂a Kaan? Awarpan chere ma re keen̂atu so ken̂ekachome so?

14 Kaapu smun chew mak nasî Noro, mer̂pono pîn chew. Ero yanme kenîhra nas ha. Meye mak n̂etar̂a kah yaw tamnon̂em yaw, mîîkesî mak okwe.

15 Pahxan pen komo yesamarî yaw rma mîîce ham amoro, kicicithonhîrî pen komo yesamarî yaw.

16 Noro yipu komo pen waihkekn̂e Kaan, waihtopo komo mera rma ka exitaw okwe. Yîmînthîrî komo mapatantho naar̂akn̂e yukmarî okwe.

17 On wara ketken̂e n̂examro pen Kaan ya, Amna yai ro mak etoko, ketken̂e. Ahce wa thakwa re kiir̂atu so Karitî ro? Pîra ro thakwa mak, ketken̂e kica.

18 Yîmîn komo cma re ka narîhcekn̂e Kaan emyawno komo ke, kir̂wan ke. Noro yipu rma nanwekyatken̂e kica. Ero ke kicicitho komo ya opanatanmecho ponarora tko was owî reha.

19 Kicicitho komo yîwîrîmacho n̂een̂axe kir̂wan komo. Tawake naxe yîwîrîmarî ke so Kaan ya. N̂ewrexe tak kicicme exihnî komo noro yipu komo poko.

20 On wara kexe kicicitho komo poko, Kîîxatî pîn komo tak naxe tîwîrîmaxi. N̂ecakyasî tak n̂examro yemyawnonho pen, kexe. Ero wa kexe amn̂e kir̂wan komo kicicitho komo poko.

21 Taa, on wara xa wîîkes awya oyakno, Kaan poko tak ehcamhokak ha ke. Tawakem me tak esko Noro poko. Ero wa awexitaw tak awahworetopo tak awepor̂as okre.

22 Yîmtapotarî ponaro cma re masî, awakîretopo ponaro. Aropotaka xa cirko yîmtapotachonhîrî yîhcamnopîn me.

23 Karitî ro yaka awetîrametaw hara ehn̂an me tak mas ha. Kicicme awehtoponhîrî yai ro mak tak mas ha.

24 Awemyawnonhîrî marha ar̂makî roowo pona ooru pen. Opi pononho na nai ahyaw ooru. Ero rma ar̂makî toh pona, aporî kwawno pona.

25 Ero yinhîrî tak Karitî ro nasî apurantan warai me, ooru warai me ha. Noro marha nasî apurantan warai me hara, prata warai me ha.

26 Karitî ro tak nasî poko awahwotacho me. Kaan wece cewruno me xa tak masî.

27 Noro yakro tak mîmtapowasî. Amtapotarî tak n̂ences ha. Kaan ya tîmsom tak mîmyasî yîwya, amtapotachonhîrî yaw rorono rma.

28 Ero poko oyexi xe wasî, mîîkesî. Taa, ehn̂ara tak masî ero poko, awemyawno poko. Katpape tak nasî awesamarî.

29 Anarimaw so tko na awetwîrîmacho chew na mai. Ero yimaw Kaan yakro mîmtapowa. Owî cma re makronomes Apa, mîîkesî. Ero wa kache awya awakronomesî tak, Kicicitho ow ha, kan̂e me awexitaw tak.

30 Kicicme ehxapu rma na nakronome Kaan amtapotarî yanme rma. Ero wa amtapotachonhîrî n̂ewehcasî Noro kicicitho ken̂ehra exirî ke tak awamorî. Ero wa awewecasî Kaan, kekn̂e tî. Ero wa tî kekn̂e Eripasî Xoo ya.