1-2 Ero yinhîrî takî tî yîmtapotarî komo n̂eyukyakn̂e xa hara Xoo. On wara tî kekn̂e yîwya so, Oyakno komo, on wara wîîkes awya so, on wara xa ow erepotanmecoko, omtapotarî ka entacoko awero ro so xa.

3 Yîmtapotara ka ehcoko omtapowataw. Omtapotatîkache tak ow yîwîrîyakacoko rma awanme ro so.

4 Tooto poko mak yîmtapotara tan wasî oyahwokacho poko. Tooto poko mak omtapowataw ketaw ha re, ahce kacho eserepokan me wai?

5 Ow cokorî ka encoko ha ke. Oyahwokacho poko tak eserepokatîkacoko. Ero yinhîrî emtayahrucoko awamorî ke so rma.

6 Taa, anarî komo yehtopo ween̂asî. N̂examro yehtopo pona keraswasî ro mak. Kîtatanasî mak kopi.

7 On wara wîîkes awya so noro yipu komo poko, ahce kacho pahkî natu kicicitho komo waipîra rma? Poritomontaxi ro naxe, yukurumîkno me marha tak n̂ehtîkexe.

8 Tîmxîkrî komo n̂een̂axe etîtîkaxapu komo, emyawnontaxapu kom ha. Ero wa naxe yîmxîkrî komo yîîm komo wero rma.

9 Ahce wa so na exihra nasî yîmîn komo. Erasîra marha naxe yîmîn yawno kom ha. Kaan n̂emetanmekrî pîn me rma ka naxe.

10 Paaka woosî yîmxîkîton̂e me roro nasî iyoh komo bui, ehn̂ara nasî. Ero wa xa marha nasî paaka woosî, tîmxîkrî me n̂ewruyasî roro emarakan me. Ero wa nasî kicicitho komo yoku rma.

11 On wara marha naxe akpîn komo, tîmxîkrî komo manmekyaxe kahn̂eru xîkrî komo wara rma. Yîmxîkrî komo nahronaxe tahwore.

12 Waano naar̂axe cik maraka yakro, ahpa yakro marha, cecesom yakro marha. Ero wa so nahwowaxe okre.

13 Yîîm komo naxe cemyawnoi so miya roro. Ero yinhîrî tak yohno rma cesî okoputhîrî komo ewtarî yaka tahruso ro.

14 On wara tko kexe noro yipu komo Kaan ya, Amna yai etoko. Awehtopo ponaro cexi xera ro mak nas amna.

15 Onoke xa Mîk Karitî ro awya so? Ahce kacho ma re noro n̂ewehca amna? Noro yakro amna yîmtapowataw amna ma re nakronome awya so? kexe mak kica. Ero wa kexe kicicitho komo.

16 Cemyawnoi so rma re naxe tanmerora so mak ha tko. Ero ke noro yipu komo ya oyakîretopo ponarora ro mak wasî. Ero wa wasî kicicitho komo mtapotarî poko.

17 Atararo meen̂atu kicicitho komo ramhan eihkaxapu? Atararo noro yipu komo meen̂atu cetîwîrîmacho chew cehsom kom ha? Kahwokacho ro komo rma n̂ekmexpe Kaan kpona so anarimaw so tîrwonîmîche. Noro yipu komo pona tko ekpora n̂he nasî.

18 Atararo noro yipu komo meen̂atu cekenî ro poi aaxapu komo mooxe? Puruma yeputho naar̂asî ocowo, puruma pîpîtho marha naar̂asî. Atararo ero wara aaxapu komo meen̂atu, kicicitho kom ha?

19 On wara kacho rma re wencesî anarî komo mtapotarî, Kicicme ehxapu komo poko cesepantopo nîmcesî Kaan yumumuthîrî komo poko cesepantome tak amn̂e, kacho wencesi. Ero ke on wara xa tko wîîkes ow, kicicme ehxapu komo poko rma n̂esepanpe Kaan, Kicicitho komo poko cesepansom xa Mîk ham Kaan, kachome tak awya so, wîîkes ow.

20 Twaparî komo rma n̂encowpe. N̂examro rma n̂eecowpe Karitî ro wokru, yîrwonîmtopo ha.

21 On wara naxe kicicitho komo twaipuche so tak, tîhyawno komo ponarora mak tak naxe okwe. Ero wa naxe nuun̂i yîhkotoche, waipîra ehtopo me yukuknomaxapu yîhkotoche ha, kexe anarî komo.

22 On wara tko wîîkesî owî Kaan poko, Noro ma re tîhcamhoke ahce na poko awya so? Pîra ro makî. Kyopono ro komo yen̂ekan̂e rma Mîk Kaan.

23-24 On wara naxe anarî komo, kar̂pe rma naxe twaihtopo komo pona roro. Waapa komo yai ro mak n̂enmayaxe, cerepore so marha naxe. Tupurukye so marha naxe. Kir̂wan̂he so marha nasî iyochîrî komo yarîrî. Ero wa naxe twaihtopo komo pona roro.

25 On wara reha naxe anarî kom hara, ahwora ro mak naxe twaihyataw so okwe. Tahwotacho komo chewra ro mak enmaxapunhîrî mak mîkyam okwe.

26 Twaipuche so tak esewararî rma naxe ewtarî yaw. Etîme re tak naxe takye re. Ero wa naxe okwe.

27 Awesehtînotopo komo poko camkîra wasî. Oyahwokacho poko mak mesehtînoyaxe okwe.

28 On wara mîîkexe owya, Ahto nai awya antomano rin̂enho pen mîntho? Ahto nat ha re awya kicicitho komo mîntho? mîîkexe owya.

29 On wara tko wîîkes ow hara awya so, yîmtapotara ro mak na mîxatken̂e mooxe tîtosom komo yakro. Noro yipu komo yesekatîmtopo ponarora ro mak na mat ha?

30 On wara xa kexe awya so, Tahwokacho komo chewra ka n̂enmayaxe kicicitho komo n̂examro yîwîrîmachome tak amn̂e epematopo me exitaw tak. Kaanî rwonîmtopo yimaw tak yohno waihyaxe.

31 Wara rma onok ma re noro yipu komo n̂eiya? Onok ma re noro yipu komo n̂epeme kicicme ehtoponhîrî komo yepetho ha?

32 Noro yipu komo waipuche okoputhîrî komo nahruyaxe iyananhîrî komo. Ero yinhîrî iyochîrî komo kurunpen̂e tak n̂ecececesî ewtarî mîtwo.

33 Tpoxwe nasî roowo, woskara po waihxapu komo ya. Noro yipu komo yokoputho wenari cexe iina tooto komo ahnoro. Twaihtopo komo pona cexe. Noro yipu komo poturme marha cetken̂e pahxa mer̂pono pîn kom hara. Ero wa naxe kicicitho komo twaihyataw so.

34 Taa, ahce wa thakwa ma re ow mahworetu ero pîntho poko amtapotacho komo ke okwe? Tohnawno me ro mak ow meyukyaxe okwe. Ero wa maxe okwe, kekn̂e tî. Ero wa tî kekn̂e Xoo.