1-2 Ero yinhîrî takî tî Sopa nîmtapowakn̂e xa hara, Naamata pono. On wara tî kekn̂e, Ai oyakno, keserepokesî. Ero ke omtapota xe xa hara wasî. Keserepokesî ro mak.

3 Otwermacho me wences amtapotarî, owîrîyakacho wara marha. Yuhnari yîhtînon̂e rma tko mîn oyekatî. Ero ke amtapotarî yeiku xe wasî.

4 Tooto pen komo yehtoponho tko na mence, pahxan pen komo yehtoponho. Pahxa tooto n̂iir̂akn̂e Kaan roowo pona. Ero yimaw n̂ixa ro rma on wara naxe,

5 kyopono me so rma re naxe kicicitho komo anarimaw, yohno so makî tko. Ero wa naxe tohnaw cesenposom komo, yohnono me mak nahwowaxe.

6 Cehcoyoponkaxmu me ro mak natu kica anarî komo. Tukuhkawno wara ro mak na nai ehcoyoponkacho komo, kah yaka roro esenmexapu wara. Kaapu smun cheka rorono wara nasî yîhtîpîrî komo kaw xa.

7 Wara rma n̂ehcamnoyaxe amn̂e. Eroromero n̂ehcamnoyaxe twetîthîrî komo wara rma. Ero yimaw tak on wara kexe werononhîrî komo, Ahto tak nai noro? kexe.

8 Kwosotîmtoponhîrî komo wara rma n̂ehcamnoyaxe. Esenpora ro mak tak naxe. Kaan xa kicicitho komo n̂en̂epesî kwosotîmtoponhîrî wara rma, kosope censom wara.

9 N̂examro pen yenîhra tak naxe werononhîrî komo amn̂e. Ekenhîrî komo po exihra ro mak tak naxe.

10 Yîmxîkîthîrî komo tak nîmyaxe yupurantanthîrî komo yupurantamnî komo ya. Noro rma cemyawno nîramanîyas hara osomînhîrî komo yaka.

11 Kar̂pe ka na natu kar̂pamxan komo yocho Kaan ponarono pîn komo. Kar̂pe ehtoponhîrî komo rma tko cesî okoputhîrî komo yakro rma ewtarî yaka n̂examro pen waihyataw.

12-13 Tpoxwe kyam na nai yîwya so kicicitho poko ehtopo komo. Tun̂uru komo makatakan wara rma na n̂eyamyatu. Ahsîpînkara ro mak naxe cehtoponhîrî komo. Tîmtaw so rma nîmcexe.

14 Wara rma kawaxinwasî tak n̂examro naputho wethîrî komo yaw hara. Okoyi yokumuru wara tak n̂etakîcesî n̂examro wetho yaw rma.

15 Puranta yermomn̂e wara ka naxe. Amn̂e tak tupurantanthîrî komo tak narîrkexe hara Kaan yanme rma.

16 Okoyi yokumuru n̂emeyaxe oko. Okoyi n̂uru tak nasî noro yipu komo waparî me.

17 Tuuna yepu warai yenîhra naxe noro yipu komo. Weenu na nai mer̂pono pîn, tuuna yepu wicakî, iito marha nasî paaka mown katî. Ero yipu yenîhra rma naxe Kaan ponarono pîn komo okwe.

18 Tînahrî komo rma re nahsîyaxe cetapickachonhîrî komo yepetho me. Ero rma tko nîramanîyaxe hara okwe apupra rma. Cemyawno komo poko warawanwaxe. Epethîrî komo poko rma tko erepotara naxe.

19 Ero wara n̂esemetanmekyaxe tohnaw cesenposom komo yupurantamnî komo yemetanmekn̂enho me cexirî ke so. Noro yipu pen komo n̂emyawnonketîkekn̂e okwe. Mîîmo mko nahsîyatken̂e tîn̂irithîrî komo pînî rma. Ero ke n̂esemetanmekyaxe.

20 Mîn hak xe n̂ehtîkexe expora ro mak. Tupurantan komo pona ahsîra naxe yiixe cehtopo komo.

21 N̂etînakexe ro mak okwe. N̂enahcasî tak yupurantanthîrî komo okwe.

22 Cemyawnoi so rma re naxe, ahwokacho komo chew rma tko naxe okwe. Nahwoketîkexe ro mak tak okwe.

23 N̂eseresmexe rma tmaxmitachome so. Ero yimaw rma tko Kaan nîrwonasî poko so. Nar̂mesî tak yîwîrîmacho komo yiipo so. Mer̂pora nar̂mesî tuuna tmohsom wara.

24 Rah poturu na n̂emahciyatu. Ero yimaw rma tko n̂examro pen wexe waiwî ke hara, bronse ke pononmaxapu ke ha.

25 Tîmkarî komo wotoponho tak mohkexe. Cererî komo wotoponho rma mohkexe bronse ke pononmaxapu. Pona erahtîmtoponhîrî komo tak n̂examro pen n̂epor̂as okwe.

26 Awarpan nîmcesî Kaan n̂examro yemyawnonho yahrun̂e me. Wehto tak n̂etahsîyasî n̂examro pen poko aiponî rma oco. Yîmînthîrî komo yawnonho marha n̂ecakyas okwe.

27 Kaapu rma n̂ekatîmyasî kicicme noro yipu komo yehtoponho. N̂examro pen yar̂maxi tak nawomyasî roowo pono komo meero.

28 Tuuna tak nukmesî n̂examro mîntho yaan̂e. Kahxi wara tak naar̂asî Kaanî rwonîmtopo po kaamo po.

29 Ero wa kicicitho komo n̂iir̂asî Kaan. Noro rma nukuknomesî ero wara yîwîrîmacho komo, kekn̂e tî. Ero wa tî kekn̂e Sopa Xoo ya.