1-2 Ero yinhîrî nîmtapowakn̂e xa hara tî Xoo. On wara tî kekn̂e, Ahcemaw tak oyerepokara tak mat ha? Ahcemaw owakrokan̂e pîn wara tak mat okwe amtapotarî ke so?

3 10 ro ow mîwîrîyakacow okwe. Yîhyapamnî me ro mak ow memetanmekyaxe okwe.

4 Kicicme ehxapunhîrî me oyexitaw ketaw ha re ow mak ha tko. On̂enîrî me mak nasî ero wa oyehtoponho.

5 On wara na matu, oyopono me awesenpo xe mak na matu. Cesemetanmesom me oritoponho yanme mak, Kicicitho amoro ham, mîîkexe.

6 On wara xa kacoko aropotaw so, Xoo pen nîwîrîmesî Kaan tohnaw ro mak okwe. Noro pen n̂emcinoyasî tîmîyen ke.

7 On wara cma re wîîkesî, Tohnawno ro mak on owîrîmacho, wîîkesî. Kar̂pe wîîkesî. Omtapotarî yentan̂e tko exihra ro mak nasî. Owî akronomatamko, wîîkesî kar̂pe. Wara rma on wara kan̂e exihra nasî, Taa, kakronomesî rma tohnaw yîwîrîmaxapu me awexirî ke, kan̂e exihra nas okwe.

8 Oyesamarî nahrui Kaan owtorî yarohra thakwa okwe. Oyesamarî marha nawarparekn̂e okwe.

9 Takîhsom me cesekaiporesomu rma tko ow ha. Cesemetanmetîkaxmu me tak oriye hara Kaan okwe. Oyarokorî warai mohkekn̂e okwe.

10 Owîrîman̂e me nasî Kaan xehxa mehxa wara. Poku, kehcamnoyasî mak tak okwe. Weewe tîtmokesî anarimaw yimicinthîrî meero, ero wa xa marha oriyas Noro. Kir̂wan̂he na wai amn̂e, wîîkes cma ha re. Pîra rma wai ham okwe yîwya.

11 Opoko nîrwonasî ro mak Noro okwe. Tîîxatî pîn wara oyen̂a ham okwe.

12 Yaake mokyaxe Noro sowtatun komo owaparî me. Roowo n̂enmekyaxe tawomtopo komo me owece. Omîn mamhoko n̂iir̂axe tîmîn komo.

13 Ooxatî pîn me tak oyakno komo n̂iire okwe. Oyakrononho komo tak naxe ohtînon̂e pîn wara okwe.

14 Ohyai tak toce oyanan komo. Oyakrononho komo tak naxe twen̂ekarî opoko okwe.

15 Tîn̂enthîrî pîn wara oyen̂axe ohyawno komo rma, opici yanton komo meero. Anarî yana wara mak oyen̂axe okwe.

16 Oyantonî cma re wan̂ikyasî. Oyeikura ro mak nasî. Mîmokyasî cma re, wîîkesî yîwya ro xa.

17 Kicicme tî nai oyapepen opici ya rma. Poxumra ro mak wasî omxîkrî komo ya rma, opun yaino komo ya rma.

18 Rikomo komo meero owîrîyakexe kica. Oyawomyataw kicicme nîmtapowaxe opoko kica.

19 Ooxera ro mak tak naxe oyakrononho komo. Ooxatîmnokace tak yiixe oyehtoponho komo rma okwe.

20 Oyocho tak n̂etahsîyas opuntho poko okwe, ohcîpîtho poko marha. Owaitopo yai emahcixapu wara wasî oyorî picho ke mak okwe.

21 Oyakno komo, on wara wîîkes awya so, opînîn yaw tak ehcoko, opînîn yaw xa. Kaan nîwîrîmatho ow okwe. Ero ke opînîn yawno me ehcoko.

22 Ahce kacho ow mîwîrîmetu Kaan wara rma? Maxmitara ka mat ham ke opuntho ke.

23 Tmewreso exi xe was omtapotarî karita yaka armomixapu yaka.

24 Toh poko xa tmewreso exi xe wasî eroromero esenpotome. Pehu ke mewre xe wasî xumbu poko.

25 On wara matko wa wîîkesî, nasî rma kicicitho yai oyown̂e ha. Waipînî ro xa Mîk Noro. Eromanhîrî kaamo po tak roowo po n̂ecececesî.

26 Ohcîpîtho rma re macesî. Wara rma opun yaw rma Kaan ween̂as amn̂e.

27 Ow xa ween̂asî, anarî pîn. Oyewru ke rma ween̂asî. Enî xe ro mak wasî cerewre ro mak.

28 On wara tko na mîîketu amyamro opoko, Ahce wa noro penî kr̂a tîwîrîmetu? Cehtoponhîrî yepetho me rma wa n̂esemetanmekyasî, mîîket ha na.

29 Ero wara kan̂e me awexitaw so kacipara imo pona men erahtîmcoko amyamro rma. Apoko so yîrwonataw Kaan kacipara imo ke cemyarkem komo men n̂ekmexpe awaparî komo me ha. Noro yipu yenîche awya so on wara tak mîîkexe, Nnn, yaaro, ken̂ekan̂e me nai ham Kaan, mîîkexe tak, kekn̂e tî. Ero wa tî kekn̂e Xoo tpoyino komo ya.