1-2 Ero yinhîrî takî tî Biwtace nîmtapowakn̂e xa hara, Sui pono. On wara tî kekn̂e, Ai oyakno, ahcemaw xa tak mîtîtmamya? Takîhso ka esko ha ke. Ero yinhîrî tak kir̂wan̂he tîmtapowasî.

3 Ahce kacho tooto pîn wara amna meen̂a? Okno wara mak amna meen̂asî kica, akpîra cesehtînosom me mak amna meen̂a ham kica.

4 Cetarixkaxmu wara mak mai ham okwe arwonîmrî ke. Roowo poi ma re cet ha tooto komo ahnoro awanme mak? Toopu katî n̂esewyetake awanme?

5 On wara xa wa naxe kicicitho komo, n̂examro weyuru n̂eseikesî. Noro yipu komo wehtorî mak n̂eseikesî.

6 N̂eseikesî marha noro yipu komo weyuru yîmîn komo yawno. Noro yamtakpon yawno rma n̂eseikesî ramha.

7 Kar̂pera tak n̂etar̂axe. Ahce wa so na nîhtînoyatu noro yipu komo ciino ritopo, ero rma tak nas n̂examro yar̂matopo me tak okwe.

8 Tîhtarî komo po rma cexe mîîye yaka, cemcinotopo komo yaka rma okwe. Mîîye yaka rma n̂etamxikyaxe.

9 Yîhraknu komo tak namxikyasî mîîye. N̂emciyaxe kamina yakan wara.

10 Ruupu nasî roowo po ceyamso noro yipu komo tarî yamxitopo. Noro yipu komo yesamarî yaw nasî xiika warai.

11 Ceraspetopo komo n̂een̂axe tanhamya mak. Cetar̂ataw so iito tak n̂een̂axe cerahtîmtopo komo kopi.

12 Noro yipu komo wece nîromanasî n̂examro yahwokacho rma. Noro yipu komo panaw rma nasî ahwokacho komo ahsîtome epîrketaw so.

13 Yîhcîpîthîrî komo yonon̂e wara nasî yîwîrîmacho komo okwe mînto mînto wara. Kwaihtopo yihcitopo nasî yîhrepu komo poko, aporî komo poko marha. Tonon̂e komo wara rma nas okwe.

14 Cerepore ka na natu tîmîn komo yaw anarimaw. Iina rma tko ahsîn̂e komo mokyasî. Miya rma naar̂asî erahtîmtopo komo yaka.

15 Poyinonhîrî pîn komo mak tak naxe yîmîn komo yaw. Weeyu warai cetahsîsom nar̂mexe noro mîn pona akn̂itome kr̂a.

16 Weewe wara naxe noro yipu komo. Yimicinthîrî komo nuturpamtîkesî yuhnawno. Peremthîrî komo marha naawaiyasî kaikokorono hara.

17 Noro yipu komo yosotî tak nîhcamnoyaxe roowo pono komo. Cekaiporesom me naxe anarî komo. Pîra reha naxe kicicitho komo.

18 Katpanawnonhîrî tak noro yipu komo n̂en̂epexe yiixatî pîn komo awarpanaka okwe. Roowo poi kr̂a n̂en̂epexe.

19 Yîmxîkrî komo exihra ro mak nas okwe, epamthîrî komo marha exihra. Iyanan komo exihra ro mak nasî yîmîn komo yaw.

20 N̂eserepokexe tak oesce n̂ixan komo noro yipu komo waihtoponho yencetaw. Okwe ro mak, kexe resce n̂ixan kom hara noro yipu komo waihtoponho yencetaw.

21 Ero wa nasî kicicitho komo yehtopo. Ero wa nasî Kaan ponarono pîn komo yehtopo. Ero wa men naxe, kekn̂e tî. Ero wa tî kekn̂e Biwtace Xoo ya.