Taa, nîmtapowakn̂e rma tî ka Xoo. On wara tî kekn̂e hara, Ahwora ro mak was okwe. N̂enahcasî tak okwe roowo po oyenmacho. Oyokoputho yewtarî mak omomokyasî.

2 Opoko cetaporesom komo owamcexe okwe. Oyewru ke rma ween̂asî yîwya so owîrîyakacho okwe.

3 Apa kah yawno, Amoro xa kir̂wan me oyehtopo yekatîmn̂e me esko. Anarî exihra ro mak nas okwe ero wa kan̂e.

4 N̂examro ropotarî mahrui ham takîhretopo yentara ro mak ehtome so. Ero ke oyoponkan̂e mera cma re n̂examro miir̂asî.

5 Ahce wa tai kakrono komo yîwîrîyaketaw? Ero wa kîmtapowataw so n̂esewkexe tak kîmxîkrî kom okwe.

6 Oyosotî n̂iire Kaan tooto komo nîwîrîyakarî me. Tooto yetakutho yapon me marha nasî oyepatarî.

7 Kewxîrîye ahwora ro mak oyexirî ke. Ekatî wara mak nas opun ahnoro, kaamo n̂enpotho wara.

8 Oyenîche on wara kexe kir̂wan komo opoko, Okwe ro mak okwe, kexe. Tohnaw cesenposom komo poko n̂eserepokexe kicicme exihnî komo.

9 Wara rma kir̂wan̂he rma tko naxe kir̂wan komo. Kar̂pe n̂ehtîkexe kicicme exihnî komo.

10 Taa, oyakno komo, awya so wîîkes hara, amohcoko xa hara ohyaka. Takîhsom me tko awenîra so ro mak was okwe.

11 N̂enahce tak ha cerepore oyehtoponho okwe. Tohnawno me tak n̂ehtîkai owya onîhtînoputho, Ero poko was amn̂e, kachonho ha. Tpohciso marha nasî ahce wa na oyexi xe oyehtoponho okwe.

12 On wara kexe moxam, Katpan tan ha, kexe awarpan poko rma kopi. Awarpanaw cexitaw so marha on wara kexe, Meyehra tak nasî katpan, kexe kopi.

13-14 On wara mak na wîîke, oyokoputho yewtarî mak na nai omîn me amn̂e, oyetîrapotopo na wîîr̂a awarpanaw mak. On wara na wîîke opun matacho ya, Oyîm amoro ha, wîîke. Opun yakrî ya na wîîke, Onocwan amoro, oyepeka na amoro, wîîke mak na okwe.

15 Ero wa ketaw makî tko owya tahwore oyehtopo ponaro ma re wai okwe? Onoke thakwa re tahwore oyehtopo n̂een̂a? Pîra ro mak okwe.

16 Oyokoputho yewtarî yaka tîtosom wara mak nasî tahwore oyehtoponho. Iito mak tak wasî ero yakro roowo pupun chew okwe, kekn̂e tî. Ero wa tî kekn̂e Xoo.