1-2 Ero yinhîrî nîmtapowakn̂e xa hara tî Xoo. On wara tî kekn̂e takrono komo ya, Ero wa kachonho yentan̂enho rma ow ha. Mer̂pora ro mak wencesî ero wa kachonho. Oyahworen̂e pînî ro mak amyamro okwe.

3 Ocowo wara mak nasî amtapotarî komo. Ahcemaw tak mîtîtmamyat ha? Ahce wa awexirî ke so ero wa mîmtapowatu?

4 Oyemtakan me awexitaw so ketaw ha re awahwokacho komo chew, ow marha re kîmtapotarî awakro so awara so xa marha. Awîrîyakacho komo me kîmtapotarî ha re. Kicicme ro mak maxe kica, wîîkarî ha re awya so. Ow marha re kepanamarî awece so. Ero wara wexirî ha re apoko so yiixe oyexitaw ketaw ha re.

5 Ero warahra reha was ow. Owî reha kahworecerî so. Awahworetopo komo poko mak reha kîmtapotarî awerepotanmetome so.

6 Wara rma on wara wasî, omtapowataw rma tahwore exihra rma wasî. Otîtmamyataw xa eserewkara marha was oko.

7 On wara wîîkes awya Apa, ow tak mîkar̂katîkai okwe. Ohyawnonho pen komo marha mîwaikatîkai.

8 Ow tak makpororei okwe. Ero wa oyehtopo rma nas oyehtopo yekatîmn̂e me. Takporoso oyehtopo nas oyahwokan̂e me. Ahwora oyehtopo yekatîmn̂e me marha nas okwe.

9 Oyarixkan̂e wara nasî Kaan oko tîrwon̂e cexirî ke. Ooxatî pîn me marha nasî. Nîyokrececenwasî marha oko oyeska xatî wara. Ero wa nasî Kaan owece. Ooxatî pîn komo marha oyentîkexe okwe.

10 Opoko mak n̂etaporexe, oyewkatapexe marha oko. Iina re tak n̂esenmekyaxe oyar̂machome.

11 Tponarono pîn komo nahsîrî me oriye Kaan okwe. Kicicitho komo ya oyar̂mapesî.

12 Cerepore ka wîxakn̂e. Ero yinhîrî tak oyakuhr̂apoi mak Kaan oko. Opîmtaw oyahsîye, ocor̂or̂omai mak oko. Tînworî me oriye ham oko.

13 Kaan yuhre ke tuwuhrekem komo owamcexe ro mak okwe. Ocorowes oko Kaan. Opînîn yawra ro mak nasî. Oyerexkuthîrî mak nukmamyasî roowo pona.

14 Emapona roro oyeper̂ancesî. Waapa wara rma mokyasî kar̂pe owece.

15 Kumixitho watpoi ohcîpîtho ponon me. Roowo pona mak ketîrapoi.

16 Cewcure tak wasî owratarî ke. Nîswantai tak oyewru picho waixapu wara.

17 Tooto wapatho pînî rma tko ow. Kicicitho ken̂ehra marha nas Kaan yakro omtapotacho.

18 Roowo, on wara wîîkes awya, okamxukutho ahrura ro mak esko. Centaxmu me roro cirko omtapotachonho, Okwe okwe, kachonho ha.

19 Oroto rma tko oyehtopo yekatîmn̂e nasî kah yaw. Omtapotarî yakronoman̂e nasî meye kah yaw.

20 Oyakrono komo mak owîrîyakexe okwe. Kaan n̂enîrî me kewyokwasî ro mak okwe.

21 Kîmîtwono komo poko tîmtapowaxe en̂ekano rin̂e komo yakro yîpînîn yaw so ehtopo komo poko. Ero wa xa marha opînîn yaw Noro yehtopo poko omtapota xe wasî Kaan yakro.

22 Asak mak tak kicimn̂ipunwasî tan roowo po. Ero yinhîrî tak kîwcesî ketîramatopo pîn yaka. Iina thakwa kîwces ha, kekn̂e tî. Ero wa tî kekn̂e Xoo.