1-2 Ero yinhîrî takî tî Eripasî nîmtapowakn̂e xa hara. Xoo ya tî kekn̂e on wara, Ahce wa tai takîhso kexitaw, tohnawno me ma re tîmtapowa? Ocowo ma re cenkaya kropotaka, resce n̂ixan ha? Pîra ro makî.

3 Ceseseyukya ma re tohnaw ro mak? Kakîhretopo pînî ro poko ma re tîmtapowa? Ero wa ma re tai takîhso kexitaw? Pîra marha.

4 Amoro reha metwerînkesî okwe Kaan poko. Kaan xatînhîrî komo tak miir̂asî yiixatî pîn me okwe.

5 Kicicme awehtoponhîrî yanme rma wa ero wa so mîmtapowasî. Cesemîknosom wara rma mîmtapowasî kica.

6 Amtapotachonhîrî rma nasî awen̂ekan̂e me, ow pîn ha. Amtarî rma n̂enpesî kicicme awehtopo.

7 Pahxan ma re amoro yihcirî me ewruxapu? Pahxa ma re mewruyakn̂e îîpî exihnaw ro makî?

8 Kaan nîhtînorî ma re mence, ekatîmnî me yînîhtînorî ha? Ow mak ow ha takîhso cehsom, mîîke ham kica?

9 Ehcamhokaxapu ma re amoro amna yopo? Yuhnari ma re mîhtînoya amna nîhtînorî pîn?

10 Amna wara rma kexe poritomo komo, yîhpoci tumutwem kom ha. Amna wara rma ketken̂e pahxan pen komo, aamo pen yexihnawnonho pen kom ha.

11 Kaan ya awahworetopo mîwîrîyake ha ma kica? Yamoro cma re amna nîmtapowasî ero poko. Ero rma katî mîwîrîyake?

12 Ahce kacho aropotarî awakname Kaan yai? Tîrwon̂em wara nai awewru hara okwe.

13 Kaan poko rma mîrwonasî kopi. Ahce kacho ero wa mîmtapowa kopi?

14 Kicicitho ken̂ehra ma re nai tooto awya? Kir̂wan me ma re nai wooxam ropotawnonho?

15 Tînakir̂wamathîrî komo pona enîhra rma nasî Kaan. Kir̂wan̂he xa exihra rma nasî kaapu yîwya.

16 Soroso xa kîw, tooto. Kicicitho ro mak kîwyam, kokem mak. Akpîra kehtopo yeen̂e mak kîwyam, tuuna ceer̂asî ero wara rma kica.

17 Omtapotarî ka entakî, yuhnarino wekatîmyas awya on̂enîtho rma.

18 Takîhsom pen komo mtapotachonho tan wentamexpes awya. Tporin pen komo mtapotachonho tî n̂ekatîmyatken̂e n̂examro. Cekatîmtîkaxi ro tî n̂ekatîmyatken̂e.

19 On roowo yahsîn̂enho rma mîkyam xatken̂e. Anarî yana komo tohra ro mak xakn̂e yichere so. N̂examro penî mtapotarî wekatîmyas awya.

20 On wara ketken̂e n̂examro pen, On wara naxe kicicitho komo, cerewîmtopo komo chew mak naxe miya roro twaihtopo komo pona roro. Ero wara naxe emetanmekno rin̂e komo yaake cimn̂ipu, twaihtopo komo pona roro ha. Kaan nukuknomatho po tak waihyaxe.

21 Ceraspetopo komo mak n̂encexe okwe. Taa, cerepore exitaw so rma waparî komo tak mokyaxe hara okwe.

22 On wara kexe, Awarpanaw mak was okwe etowîn me ro mak, kexe mak. Kacipara namarî me mak naxe okwe.

23 Miya so n̂etar̂axe tînahrî komo yeporîrî poko. Ahto nai oyuru okwe, kexe. On wara marha kexe, Amn̂e tak awarpape xa tak nasî enmacho me exitaw kopi, kexe okwe.

24 N̂eraswaxe ro mak tahwokacho komo pona, cesemetanmetopo komo pona marha. Iyopo so mak nasî emetanmecho komo kayaritomo wara, waparî me mohxapu wara.

25 Tamotîwîn ke napockanwaxe Kaan wece Noro yetapan̂e wara kopi. On wara marha kexe, Kaan pen tar̂macerî amn̂e, kexe Karitî ro poko rma kopi.

26 Kaan weken̂emekn̂e wara marha naxe, anwekn̂e me xa kopi. Cecen̂an komo naar̂axe Kaan yakro cetar̂macho komo kopi.

27 Anarimaw so ceepatapurukye so rma re naxe noro yipu komo. Twepakye so marha naxe.

28 Yarîhnîtho po makî tko n̂enmayaxe noro yipu komo, ewtotho po mak. Mîîmotho yaw mak n̂enmayaxe yarîhnîtho yaw mak okwe. Anarimaw so emacakaporono yaw mak naxe mîîmotho yaw okwe.

29 Emyawnomnî me rma tko naxe noro yipu komo amn̂e. N̂enahcasî tak yupurantanthîrî komo okwe. Esenmamra nasî yîrowon komo miya so roowo pore.

30 Awarpan chei etowra ro mak naxe. Yînatîrî komo peremtho naawaikesî wehto oco atîhtaxaputho rma. Amn̂e tak noro yipu komo Kaan naar̂asî tapepen ke rma okwe.

31 Ero pîntho pona enîhra ro mak n̂ehcowpe noro yipu komo. Ero yipu pona een̂ataw n̂esemîknoyaxe n̂examro rma kica. Cehn̂axmu me tak naxe amn̂e ero yipu ponaro cehtopo komo yepetho me.

32 N̂examro waihtopo mera rma ka exitaw yîwîrîmacho komo chew tak naxe okwe. Noro yipu komo naxe weewe peremtho wara, aawaixapu wara okwe.

33 Uupa yatî wara marha naxe noro yipu komo cemaxkunkaxmu wara. Oripa yepu wara marha naxe epemrutun cemarakaxmu wara.

34 Ahce na cirihra ro mak naxe tohnaw cesenposom komo. N̂ecakyasî mak tak yîmîn komo. Esen̂ekapora cehtoponhirî komo yepetho pona ahsîxapu n̂ecakyasî.

35 Wooxam wara rma naxe cetahsîsom wara. Emetanmekno ritopo me makî tko n̂etahsîyaxe. Kicicme cehtopo komo me n̂ewruyaxe yîmxîkrî wara rma kica. Emîknono ritopo mak por̂mamyasî yîropotaw so yîmxîkrî wara. Ero wara men naxe kicicitho kom ha, ketken̂e pahxan pen komo, kekn̂e tî. Ero wa tî kekn̂e Eripasî Xoo ya.