Nîmtapowakn̂e rma tî ka Xoo Kaan yakro. On wara tî kekn̂e hara yîwya, Apa kah yawno, on wara marha amna nasî, tooto, wooxam ropotainonho, asakî ro mak amna n̂enmayasî tan roowo po. Cesemetanmecho chew mak nas amna okwe.

2 Epemrutun wara mak amna n̂ewruyasî. Epemrutun wara xa marha amna nuskuruminwas hara. Ahce na yekatî wara mak nas amna kaamo n̂enpotho wara. Yohno cehcamnosom mak mîn. Ero wa xa marha nas amna hara pahkî exihra.

3 Noro yipu ma ow mentîke? Ahce kacho ow oyen̂ekacho poko mai?

4 Onoke thakwa re kicicithonhîrî nakîhce kir̂wanî ro me hara? Pîra ro mak okwe, kicicitho yakîhtora ro mak nas amna kir̂wanî ro me.

5 On wara nasî tan roowo po amna yehtopo, tukuknomaxi nasî. Ero wicakî nuun̂i mak nasî roowo po awehtopo, mîîke ham amna ya Apa. Ankuknomathîrî watohra thakwa nas amna.

6 Ero ke amna yai cma re mesewyaknamesî amna yepokaretome tak. Epethîrî pona cetapickaxmu komo n̂etapickexe kokon̂i cehso ro mak, ero wa xa marha amna yahwokacho cma re mîhkocesî n̂he.

7 Anarme nasî weewe. Weewe yamache atîhtacho ponaro xa hara na tai. Natîkronwa hara tko na waipîra rma.

8 Pahkî na nai yimicin roowo chew. Yîmîtîthîrî na natîhya roowo chew.

9 Tuuna mokuche hara tko natîkronwas hara. Por̂mamya tak ha na atîkron yaxan me hara. Ero wara nai weewe anarimaw.

10 Ero warahra reha nas amna tooto. Amna mak waihyas okwe, ero yinhîrî amna yokoputho nahruyaxe. Amna yesehsîtopo nîtîtmamyasî okwe. Ero yinhîrî ahto tak na nai amna?

11 Anarimaw na napaitîke n̂ikithonhîrî. Tuuna yepu marha na napaitîke. Nuturpamya ro mak na yarinho me cehso ro.

12 Ero wa xa marha nas amna hara, tooto. Eroromerono me amna n̂etîrapesî waixapu me. Ero yinhîrî awomun me ro mak tak nas amna. Pahkî ro mak amna pakahra nasî kaapu yehcamnotopo pona roro. Yîwînxapunhîrî amna pakahra ro mak nas okwe.

13 On wara xa oyiri xe was awya, owî cma re ka meyamyasî roowo cheka. Iito rma ka oyexi xe wasî ceseyamso awetîrwoxinkacho pona roro. Iito roowo chew oyehtopo cma re mukuknomesî. Ero wicakî oyexiche oponaro xa hara awexi xe wasî.

14 Ahce wa na nai amna tooto ha, amna waipuche amna pake hara na? Tanî rma roowo po oyexitaw kekaricesî ro mak oyemyawno ciitopo poko. Ero poko wasî anarme oyakîtotopo momokrî poko.

15 Ero yimaw tak ow man̂ikyasî. Keyukyasî tak. Opînîn yaw tak masî, anakîtothîrî pînîn yaw ha.

16 Ero yimaw oyetapitopo rma mukuknome, iyakenon ha. Kicicme oyehtoponho cma re mewrera masî.

17 Owya awanwetoponhîrî tak nasî kumixi yaw potmixapu yaw. Kicicme oyehtoponho mahruyas okre esenpon me.

18 On wara tko nai îîpî pahkî cexitaw, capahno pona tak cee roowo, yiipononhîrî. Toopu marha n̂ewakrokesî yiipononhîrî. Anarimaw n̂ehmame na toopu pupyaka. Cehtoponhîrî to exihra tak nasî.

19 Anarimaw toopu mko n̂eton̂esî tuuna ke. Roowo marha naar̂asî tuuna karitî. Ero wa xa marha mas Amoro hara Apa amna poko. Amna mehn̂anmekyas yiixe amna yehtopo poko okwe.

20 Amna mar̂mesî ro mak eroromerono me. Ero ke amna n̂ehcamnoyasî. Anarme amna yewru miir̂asî. Ero yinhîrî amna men̂epesî ahyai.

21 Takîhsom me cekaiporesom me tak na n̂ehtîke amna mumutho komo, ero wen̂ekarî rma tko nas amna, yîîm pen kom ha. Anarîmaw cehn̂axmu me na n̂ehtîke hara amna mumutho komo, ero wa ehtopo komo yenîhra marha nas amna okwe.

22 Amna pun n̂erewasî ero yipu yanme. Okwe okwe, kes amna cehtopo poko mak. Ero wa nas amna, kekn̂e tî. Ero wa tî kekn̂e Xoo Kaan ya.