Nîmtapowakn̂e rma tî ka Xoo. On wara tî kekn̂e hara, Ero wa so Kaan ya ciino ritopo ween̂asî. Ero wa yîwya ciino ritoponho marha wencesî.

2 An̂enîthîrî komo yenîn̂enho xa marha ow hara, an̂entathîrî komo yentan̂enho marha. Axawyakan pîn ow ha.

3 Karitî ro yakro tko omtapota xe wasî. Noro yakro oyesenta xe wasî.

4 Amyamro reha tko cemaro mak mekatîmyaxe kica. Kehceman̂e warai mak amyamro, camkî kehceman̂e warai mak kica. Ero warai amyamro ahnoro.

5 Atîtmam xe so ro mak wasî. Atîtmamyataw so tak takîhsom me tak maxe.

6 Oroto tak omtapotarî makîrha entacoko, oyesehtînotopo hara, ero wa oyexi xe ro mak wasî, kacho ha.

7 Kaan yanmen wara rma tko re mîmtapowaxe kicicitho me ha tko kica. Noro yanmen wara amtapowataw so yaarono pîn mak mekatîmyaxe kica.

8 Yaarono me rma re mîmtapowaxe Kaan poko, yaarono mera tko mîmtapowaxe kica opoko hara. Kaan yanme ma re ow mîmtayar̂met ha?

9 Ahce wa tak matu amyamro hara Kaan ya awen̂eketaw so amn̂e? Kir̂wan komo amyamro okre, nîîke ha ma re apoko so? Noro ma re mîwîrîyaketu awya so tooto mîwîrîyaketu ero wara rma?

10 Pîra ro mak. Kicicme maxe okwe, kesî ro mak Noro ehtura acemaronwataw so oyehtopo poko.

11 Erasîra ma re matu kayaritomo me xa Kaan yehtopo poko? Kopi, kahra ro mak matu Noro poko?

12 Wemronho me mak nasî kica amtapotarî komo. Er̂mo me mak nasî amtapotarî komo, Kir̂wan̂he nasî Kaan, kacho awya so.

13 Ero ke atîtmamcoko ka, oyakro yîmtapotara tak ehcoko. Ow cokorî ka kîmtapowasî. Omtapotatîkache tak oyeporpe ka oyahwokacho.

14 Ahce kacho owaitopo meero wukurunke? Owaitopo pona erasîra wai ahce kacho?

15 Owaike rma na Kaan. Wara rma Noro pona mak ween̂asî kir̂wan̂he oritome. Kehyapamhokesî rma tko Noro n̂entarî me.

16 Noro rma oyowyasî owîrîmachonho yai. Kaan yaka tohnî ro me mak wa naxe tohnaw cesenposom komo.

17 Omtapotarî men entacoko awero ro so xa. Oyesekatîmtopo entacoko apanarî komo ke.

18 Takîhso tak wîmen̂eka omtapotarî, oyehyapamhokacho ha. Kicicitho pîn amoro, kesî rma wa Kaan owya amn̂e.

19 Onoke katî kicicme oyehtoponho n̂etahca xa hara? Tîtken̂e mak oyexitaw tak, kwaihyasî mak tak, kekn̂e Xoo takrono komo ya.

20 Ero yinhîrî takî tî Kaan yakro nîmtapowakn̂e hara Xoo. On wara kekn̂e, Apa kah yawno, kîmtapowasî cma re ka awakro yiixera oyehtopo poko, asak hakno poko mak. Taa, ero wara awirira wasî, ketaw awya, eseyamra tak wasî oyenîra awehtome.

21 Oyemetanmetopo cma re mîtîtmamnoyasî. Oyeraspen̂e me esenpora marha cma re masî.

22 Ero wa awexitaw tak oyakro amtapotakî. Keyukyasî tak. Anarimaw omtapotarî mak na mence. Ero yinhîrî omtapotarî meyukyasî Amoro hara.

23 Atararo nai kicicme oyehtoponho, akpîra oyehtoponho ha? Awanwetoponhîrî owya ekatîmko ka owya, kicicme oyehtoponho ha.

24 Ahce kacho mesewyahruya? Ahce kacho aaxatî pîn wara ow meen̂a okwe?

25 Katayarîtho warai mak ow ocowo narîtho mak. Ahce kacho noro yipu ow meraspe okwe? Mîîna yarî pupuntho mak ow turpem ha. Ahce kacho noro yipu ow mîweken̂emekya?

26 Akaritan yaka kicicitho me ro mak oyehtoponho mîmewre ham okwe. Kar̂pamxan me oyehtoponho miir̂a opona ham okwe, kicicme oyehtoponho ha.

27 Kîhroyakîknotopo yaka orin̂e wara masî. Owtotopo meen̂asî ro mak ahna na owcetaw. Oporokacho marha mukuknomesî ero watohra tak oyehtome.

28 Ero wa mak nas amna, tooto. Amna mak natîhyasî mataxaputho wara. Poonotho wara mak amna natîhyasî, tamatamaci naputho wara. Ero wara nas amna, kekn̂e tî Xoo Kaan ya.