1-2 Ero yinhîrî takî tî takrono komo mtaka n̂eyukyakn̂e xa hara Xoo. On wara tî kekn̂e yîwya so, On wara mak wîîkes awya so, Yuhnari yîhtînon̂e komo xa ham amyamro. Awaiyataw so yuhnari kesehtînotopo marha waihyasî awakro ro so rma okwe.

3 Yuhnari yîhtînon̂e xa marha tko ow awara so rma. Axawyakan me so exihra rma wasî. Miyan komo nîhtînorî rma mîn, owya mîîkexe ero wa kacho.

4 On wara was ow okwe, ow mak mîwîrîyakexe okwe oyakrono komo rma. Kaan yakro tîmtapotaxmu cma re ow. Omtapotarî marha n̂eyukyakn̂e Noro. Kir̂wan ow, kicicme exihnî. Wara rma ow mîwîrîyakexe amyamro oyakrono komo rma kica.

5 Ero wara rma naxe esemetanmekîn komo, tahwokacho chewno ro komo nîwîrîyakexe kica. Epîrkaporono komo yepetho mak mîn esemetanmetopo komo, kexe mak kica.

6 On wara naxe cen̂epan̂em komo, ehcamnopîra rma nasî n̂examro yemyawno, yîmîn komo yawno. Kaanî rwonmekn̂e komo naxe ehn̂an me rma cemyawno komo poko. Kaan nîmîtho yahsîrî ke tîwya so erasîra naxe.

7 Okno komo ya xa matko kacoko ero yipu poko. Noro yipu komo rma ahcamhokexe so. Tarin̂em komo ya xa na mîîket ha. Noro yipu komo marha n̂ekatîmyas awya so Kaan yehtopo.

8 Roowo ya rma kacoko. Ero rma ahcamhokesî Kaan yehtopo poko. Ootî ya marha kapore nasî. Noro yipu komo marha Kaan yehtopo nîhtînomexpes awya so.

9 Noro yipu komo ahnoro nîhtînoyaxe Kaan yehtopo. Kporin komo n̂emetanmekîtho amoro, kexe noro yipu komo rma ahnoro.

10 Ahnoro tînakîtothîrî komo n̂ecehcesî Kaan waipîn me. Ahnoro tooto komo yesehsîtopo ciin̂e Mîkî Kaan.

11 Ahce wa nai kpanarî kom hara, tapota men̂ekan̂e pîn me ma re nai awya so? Knahrî komo men̂ekan̂e me marha nasî kîmtarî hara.

12 Kakîhretopo komo yîhtînon̂e me natu poritomo kom ha. Mer̂pora cimn̂ipu ewrutoponhîrî ehxapu komo naxe yuhnari yîhtînon̂e me re. Ero wara rma mîhtînoyatu.

13 Kaan xa tko nasî takîhso kesehtînotopo komo yosom me, kar̂pe kehtopo yosom me marha. Kakîhretopo yosom me marha nasî, yuhnari yîhtînotopo yosom me marha.

14 Noro n̂ixkatho tak nasî cirihnî me xa hara. Noro nahrutho komo marha naxe ahrunkan me hara.

15 Tuuna yekpora exitaw Noro atîhtara thakwa nasî naatî turpe exirî ke ewtî. Anarimaw hara tuuna n̂ekmexpesî roowo pen yukmanîretîkacho tak okwe.

16 Kar̂pe kehtopo yosom Mîkro Kaan, yuhnari yîhtînotopo yosom marha. Cemarontaxmu komo yosom Mîkro, cemaro yewetîn̂e komo yosom marha. Noro yipu Mîkro Kaan.

17 Kakîhren̂enhîrî komo yarpon̂e Mîk Kaan, waapa komo ya. Emyawnomnî me ro mak narpesî. En̂ekano rin̂e komo yehtopo yenpon̂e marha Mîkî, tohnaw tîmtapotaxmu me enpon̂e ha.

18 Anarimaw yîhraknumino n̂iir̂axe kayaritomo kuripara ke oko. Ero yipu yîmhokan̂e hara Mîk Kaan. Noro yipu komo marha naan̂apotunces hara.

19 Kaan mîn yenîn̂e pen komo narpesî marha Kaan anarimaw so waapa komo ya. Emyawnomnî me marha narpesî. Karitînhîrî pen komo meero narmapesî waapa komo ya okwe.

20 Kakîhren̂enhîrî komo yîtîtmamnoren̂e marha Mîkî Kaan. Kakîhren̂e komo mîkyam, kachonhîrî komo yîtîtmamnoren̂e rma Noro. Poritomo pen komo yewkukman̂e meero Mîk Kaan takîhsomînhîrî pen komo.

21 Enîno rin̂enho pen komo tak n̂iir̂asî Kaan tîwîrîyakaxmu me okwe. Karitînhîrî pen komo tak n̂iir̂asî yukurumnî me ro mak tak okwe.

22 Yuhnawnonhîrî yenpon̂e marha Mîkî Kaan, awarpanawnonhîrî yenpon̂e marha. Awarpan n̂ekyasî katpanaka rma, kwaihtopo yawarpanî rma.

23 Anarimaw anarî rowon pono komo karihcesî anarî rowon pono komo yopono me tak. Anarimaw hara anarî rowon pono komo nar̂mesî ro mak okwe. Anarî rowon pono komo reha n̂epamnoyas hara, n̂examro nakîhresî marha okre.

24 On wara roowo pono komo kayaritomon n̂iir̂asî Kaan anarimaw so, akpîra cehsom me tak n̂iir̂asî. Noro yipu pen komo waimamnoyasî anarimaw miya esama ken̂arî pîn pona, pohnîntaka ro mak.

25 Noro yipu komo tak n̂etar̂axe tapero. Awarpanaw ro mak n̂etar̂axe katpanawra ro mak. Noro yipu komo n̂iir̂asî Kaan epîrkaporono me wenîmxapu wara okwe. Ero wa ciino rin̂e Mîkro Kaan, kekn̂e tî. Ero wa tî kekn̂e Xoo.