1-2 Ero yinhîrî takî tî Sopa nîmtapowakn̂e hara Naamata pono ha. Xoo mtaka rma tî n̂eyukyakn̂e. On wara tî kekn̂e, Eikun me ma re nai amtapotachonhîrî? Tîmtapotatîkaxmu amoro ham. Kicicme exihnî ro moso, nîîke ha ma re amna noro yipu poko, apoko ha?

3 Tohnaw mak mîmtapowas okwe. Ero yipu yentache tîtken̂e ma re tai awya? Cetaporesom me mak mîmtapowasî kica. Ero ke yîtwerman me ma re mai okwe?

4 On wara mîîkesî Kaan ya, Kir̂wanî ro ponarono ow, kpanatanmetopo ponarono. Kicicme exihnî ro mak ow awero ro, mîîkesî yîwya.

5 On wara exi xe wasî Kaan, Noro mtapota xe ro mak wasî awakro. Kicicme masî kica, ka xe tak was awya. Ero wa ka xe wasî Kaan apoko.

6 Awakîretopo yekatîmn̂e me exi xe wasî Noro awya, ekatîmnînhîrî yekatîmn̂e me ha. Takîhso xa tak masî yîmtapotarî yentache. On wara xa tko kasko aropotaw, Kicicme oyehtoponho raconho rma nîhcamnoyasî Kaan. Yîraconhîrî xa hara men epemakî awîrîmatîkacho ke tak, kahra nas awya.

7 Yuhnari xa nasî Kaan yehtopo. Ero ma re mîhtînotîke awya? Porinî ro mak Mîk Karitî ro. Noro yipu ma re mîhtînotîke awya?

8 Kyopo ro mak nasî Kaan yehtopo, kaw xa nasî kaapu mko yopo. Ero ke ahce thakwa re miir̂a amoro hara? Yuhnari marha nasî Kaan yehtopo ewtarî imo yopono. Ero ke ahce wa thakwa re ero mencetîke amoro?

9 Porin me xa nasî Kaan yehtopo roowo yopono, tuuna imo yopono marha.

10 Anarimaw Noro mokya awahsîso. Awahruya tak na kahrutopo yaka. En̂ekano rin̂e komo marha na nan̂ikya. Ero wa exitaw onoke thakwa re Noro nîmtayar̂me okwe?

11 Cesemîknosom komo yehtopo yenîn̂e Mîkî Kaan. Kicicitho poko kehtopo yen̂în̂e marha. Ero ke tîn̂enîthîrî poko eserepokara ma re nai awya?

12 On wara tko naxe camkîno komo, etakîrepora ro mak naxe, pîra ro mak. Ahce wa nai buhu yon tarke cexitaw, tooto me ma re n̂ewruya? Ero wa xa marha nasî camkîno komo, etakîrepon me ro mak naxe.

13 On wara xa yo cexpore nasî, Kaan xe xa tak cexpore nasî. Tapockantapore tak nasî Noro wece yiixatî me.

14 Kicicitho poko awexitaw ero tak tahsîpînkapore nasî. Kicicitho exitaw amîn yaw tar̂matîkapore kr̂a nasî.

15 Ero yinhîrî tak tîhkaw n̂he tak metar̂asî yîhyapamnî me. Epîrkan me tak masî, erasîn me marha.

16 Ero yimaw marha awetwîrîmachonhîrî tak mîhcamnoyasî. Ero ponaro rma cik na mai wahra kyam mak, tuuna wara mak na nai awya miya yîhtoxapunhîrî wara.

17 Katparexapu wara xa tak masî roro kamarakatawno wara. Awarpan chew rma awexitaw meen̂asî enmarî wara rma okre.

18 Ahwokan me tak masî kir̂wan̂he awehtîkacho ponaro awexirî ke. Kir̂wan̂he marha meen̂asî amîtwono komo. Awîrîmacho yai ro mak mepokaresî.

19 Kir̂wan̂he tak metakriyasî, aweraspen̂e exihra ro mak tak nasî. Mer̂pora tak awakrexe apoyino komo tîîxatî me so tak awehtome.

20 N̂ewxîrîtîkesî makî tko kicicitho komo reha. Tîwîrîmacho komo yai emahcira thakwa naxe okwe. Twaihtopo komo ponaro mak naxe. Ero wara men naxe kicicitho komo, kekn̂e tî. Ero wa tî kekn̂e Sopa Xoo ya.