Taa, nîmtapowakn̂e rma tî ka Xoo. On wara tî kekn̂e, Poxumnî me ro mak ween̂asî roowo po rma ka oyehtopo. Ero ke oyahwokacho wekatîmtîkesî. Ahwon me ro mak oyehtopo wekatîmyasî.

2 On wara wîîkesî Kaan ya, Apa, Kicicme masî kica, kahra cma re mas owya. On wara cma re mîîkes owya, Kicicme oyehtopo metahcasî. Ero wa awehtopo yanme mak kîwîrîmesî, mîîkesî marha owya, wîîkesî yîwya.

3 Kir̂wan̂he katî nai oyahwokacho awya? Kir̂wan̂he nai awya anakîtothîrî yîwîrîyakacho awya? Kir̂wan me katî meen̂a kicicitho komo ahce wa so na yîhtînoyataw yîwya so?

4 Ahce wa nai awewru, tuhn̂e ma re nai awewru amna wara? Tooto wara ma re enîno miir̂a Amoro?

5 Yohno twaihsom me ma re mai Amoro tooto wara? Asakî cimn̂ipu mak ma nai awewrutoponhîrî tooto wara?

6 Ero wara awexitaw ketaw ha re kicicme oyehtoponho yukuknoman̂e me mas ha. Ero wara awexitaw ketaw ha re akpîra oyehtoponho yepotîkan̂e me rma na mai.

7 Kicicme exihnî me rma tko ow mîhtînoyasî. Wara rma exihra thakwa nasî awamori yai tooto komo yown̂e.

8 Ow makîhcekn̂e awamorî ke rma, ow menpor̂akn̂e takîhso. Noro yipu rma ow tak mîwaike hara okwe?

9 Er̂mo kahyasî kahn̂e ro ero wara rma opun mîkahyakn̂e. Ero wa okahtoponho yîhcamnopîra cma re masî. Ahce kacho roowo me ow miir̂a hara okwe.

10 Paaka mownu amna narkesî een yaka ero wara oyarkan̂e wara mak masî. Paaka mownu amna nîkîtîtîrexe ero wara rma okîtîtîren̂e wara mîxakn̂e okwe.

11 Ow mîpononcekn̂e ohcîpîrî ke, opun ke ahnoro. Opun mahsîsîknoyakn̂e oyocho ke, opun micin ke marha.

12 Karitî me tak ow miire, mîn hakî ke ow mîwakrekn̂e. Oyekatî mecehcekn̂e marha.

13 Oyahwokacho tko meyamyakn̂e aropotaka rma ekatîmnî me. Oroto owîrîmacho mekmexpesî, ponaro mîxakn̂e ero yipu rma, wîîkesî.

14 Kicicme oyexitaw ero xa mukuknomesî. Kicicme oyehtoponho yîhcamnopîra ro mak masî.

15 Kicicme ehxapu me oyexitaw ow merepetîkesî ro mak oko. Kir̂wan me rma oyexitaw yîhkantara rma was okwe. Tîwîrîyakaxmu me ro mak wasî. Enko xe ka owîrîmacho.

16 Anarimaw ohkantache tak ow mîwapancesî rma reaw wara. Yukurumîkno me awehtopo menpes owya okwe.

17 Oroto xa hara kicicme oyehtoponho yekatîmn̂e komo mekyasî xa hara ohyaka. Miya xe xa tak mîrwonîmtîkesî opoko okwe. Anarmerpan oyepor̂asî oyahwokacho, emapona roro oyepor̂asî okwe. Oyar̂man̂e wara nas okwe.

18 Ahce kacho yememe ropotai ow mewrunokekn̂e? Enîhnî me rma kwaihîrî ha re okre.

19 Exihnî wara rma wexirî ha re okre. Yememe ropotainonho rma oyokoputho re naacerî ahruso okre.

20 Asak mak tak nai enmarî waipîra ka oyehtopo. Ero ke n̂eexi tak, ow ahsîpînkakî cerepore oyehtome yohno mak.

21 Ero yinhîrî tak kîwcesî oyetîramacho pîn yaka hara okwe, awarpanaw amna yehtopo yaka okwe. Iito amna nasî awarpan chew, amna waihtopo yawarpan chew ha.

22 Kosope mak nas iito okwe. Awarpape ro mak nasî amna waihtopo yawarpan. Takîhso ciixapu exihra ro mak nas iito. Katpanî rma nas awarpan me rma okwe iito. Iina tak kîwces amn̂e, kekn̂e tî. Ero wa tî kekn̂e Xoo.