1-2 Ero yinhîrî on wara tî kekn̂e hara Xoo, Ai ha oyakno, yaaro rma wa mîîkesî. Ero wara xa marha wa wîîkes ow hara. Toototho makî tko kîw ha. Ero ke ahce wa thakwa re tatu kir̂wan me Kaan ya?

3 Kaan yakro keseseiku xe kexitaw Noro mtapotarî yeikura rma wa tasî. 1.000 ro yîmtapowataw Noro ceyuhsom poko eikura rma thakwa tasî kîwtho okwe.

4 Kir̂wanî ro mak Mîk Kaan, karitî ro marha. Onoke thakwa re nai Noro yanwekn̂enho ehn̂anî ro? Pîra ro makî.

5 Îîpî komo yewyetakan̂e Mîk anana tooto komo wero rora mak. Îîpî n̂ewnapesî ro mak anarimaw tîrwonataw.

6 Roowo n̂ewsîyasî ekenhîrî yai cewyetakaxi ro. Roowo mapatan n̂asî tatan̂em wara.

7 Anarimaw kaamo n̂ewxîrîresî tîmtapotarî ke mak. Ero ke kîkatporen̂e mera tak nas okwe. Xir̂ko marha nahruyasî esenpora cehso ro.

8 Noro mak kaapu nakweresî, Noro mak cewn̂e. Noro marha n̂etapikyasî tuuna mo yewcokocokon poko.

9 Xir̂ko yakîhton̂enho Mîk. Uhsu wara cehsom me nakîhcekn̂e, Orion wara cehsom me marha, Xir̂koimo marha, amtakpo warai marha nakîhcekn̂e suu n̂ixan. Ero mko yakîhton̂enho Mîkî.

10 Keserepokacho ciin̂e Mîk, Ahce wa na ero yipu n̂iir̂a, yîhtînorî yopono me nasî. Cirihnî mko n̂iir̂asî mer̂pora ro mak, yukuknomarî yopono ro mak.

11 Anarimaw ohyari rma na nîîce Kaan. Enîhra rma tko wasî. Ohyari rma torî yentara rma wasî.

12 Kemyawnonhîrî yaar̂ataw yîwya onoke thakwa re porohke? Onok ma re nîîke yîwya, Ai, ahce poko mai iito? nîîke?

13 Kaan yîrwonataw etîrwoxinkan me ro mak tak nas hara. Noro yamrinaw nutupenwaxe cehcoyoponkaxmu yakrononho komo.

14 Ero ke ahce wa thakwa re Noro weyukya owtho? Ahce wa ma re omtapotarî men̂eke ow Noro yakro oyesentachome?

15 Kir̂wan̂he rma oyexitaw ketaw ha re yîmtapotarî yeikura thakwa wasî. On wara mak xa yo wîîkesî yîwya oyen̂ekan̂e me exirî ke, Opînîn yawno me cma re masî, wîîkesî mak.

16 Anarimaw on wara na wîîke yîwya, Apa, omtapotarî cma re mencesî, wîîke na. Ero ke Noro tak na oyeyukya. Ahce xe mai? nîîke ha na owya. Ero wa oyeyukyataw rma, Omtapotarî ponarora rma nasî, wîîkesî mak.

17 Oyakuhr̂apesî ro mak Noro ocowo imo ke. Oyerekrî n̂epamnoyasî mer̂pora cehso ro oko. Tohnaw mak oyeper̂ances okwe.

18 Taa, epokareko ka, kahra ro mak nas owya. Oyahwokacho makî tko n̂epamnotîkes okwe.

19 Kar̂pe Noro yehtopo poko amtapowataw so, yaaro rma mîîkexe, karitî Mîk Kaan ha. Yaaro xa ken̂ekan̂e Mîk, ketaw marha awya so, on wara mak wîîkes ow hara, Onoke thakwa re nukuknome kaamo oyehyapamhokacho yentacho yîwya, wîîkesî mak.

20 Kir̂wan̂he rma oyexitaw, Kicicme masî, kesî omtarî rma owya. Kicicitho mîkro, kacho mera ro mak oyexitaw kicicitho wara rma tko oyenpesî omtarî rma.

21 Kicicitho mîkro, kacho pîn me cma re wasî. Camkî rma tko wasî oyehtopo poko. Oyehtopo rma wîwîrîyakesî.

22 Kir̂wan komo, kicicitho komo, etîme re kiin̂e rma Mîkro Kaan. Ero ke on wara wîîkesî, Kicicitho komo waihkan̂e Mîkî Kaan, Kicicitho mîkro, kacho pîn komo waihkan̂e marha okwe.

23 Anarimaw tak na ahsîno n̂iir̂a eper̂a, yohno so kwaihkan̂e. Kicicme exihnî komo waihkan̂e rma na mîn okwe. Wara rma noro yipu komo poko n̂ewresî mak Kaan okwe.

24 Anarimaw kayaritomo me n̂ecir̂a kicicitho kica. Ero wa exitaw Kaanî rma nai en̂ekano rin̂e komo yewyahrun̂e me okwe. Kaan pîn katî ero wa ciino n̂iir̂a awya so? Onoke xa katî ero wa ciino n̂iir̂a awya so?

25 Oroto yohno so n̂enmayas owya. Kar̂pe cemahcisom wara mak nasî enmarî owya. Oyahworetopo ken̂ehra rma kenmayas okwe.

26 Ohyari tîtosom wara nasî enmarî komo kanawa wara, kar̂pe tîtosom wara. Kurum wara marha nasî, tootî wece tîhtosom wara. Ero wa yohno so n̂enmayas owya.

27 On wara na wîîke, Taa, oyahwokacho tak wîhcamnoyasî. Cewtawake tak wasî ewyahwonînhîrî, wîîke na?

28 Keraswasî rma tko oyemetanmecho pona. Kicicme exihnî amoro, kan̂e pîn me rma keen̂asî Apa okwe.

29 Kicicme masî kica, mîîkesî mak owya. Ero ke ahce kacho thakwa re kekarice tohnaw ro mak.

30-31 N̂eepenhîrî kwaka rma na keyehya, tuuna kwaka, kir̂wan̂he xa tak oyehtome. Ewtarî yaka rma kr̂a ow mar̂mesî apacakrî ken̂arî yaka. Sakmo ke rma oyesemoketaw owî rma mar̂mesî. Opononî rma nasî owîrîyakan̂e wara okwe.

32 Owarai pîn Mîk Kaan, tooto pînî ro mak Mîkî. Ero ke yîmtapotarî yeikura thakwa wasî. Oyakro tohra ro mak nai Noro en̂ekano rin̂e komo yaka.

33 Exihra ro mak nasî omtapotarî yentamexpon̂e yîwya okwe. Noro yipu exitaw oyamorî tak nahsîya, Kaan yamorî marha.

34 Tamoyin tak nakripe hara Kaan oyetapachonho. Noro pona keraswasî ro mak kopi. Ero wa oyerahtîmtoponho nowpe erasîra tak oyehtome.

35 Ero yinhîrî tak Noro yakro kîmtapowasî erasîn me. Oroto tko Noro yakro yîmtapotara thakwa was okwe. Ero wa thakwa wa was okwe, kekn̂e tî Xoo. Ero wa tî kekn̂e.