1-2 Taa, ero yinhîrî takî tî Biwtace nîmtapowakn̂e hara, Sui pono. On wara tî kekn̂e, Ai oyakno, atî wicakî pahkî ero wara mîmtapowa okwe? Ocowo wara ro mak nasî amtapotarî, karitî wara.

3 Kecenarî kepeman̂e pîn katî Mîkî Kaan awya? Ahce wa katî Karitî ro meen̂a, akpîra kiin̂e katî Mîk awya?

4 Kicicme na xatken̂e amxîkîthîrî pen komo. Ero ke n̂examro pen tak waihkekn̂e ham kicicme ehtoponhîrî komo yepetho me.

5-6 Kaan eporko ha ke, expora ro mak esko Noro yenî xe. Karitî ro yakro marha tîmtapotapore nasî cerewre. Taa, kir̂wan̂he tak awexitaw, oroto rma Noro nawomyasî awakronoman̂e me hara. Esemetanmekîn me tak awîra okre.

7 Mer̂pono pîn ke tak awakres amn̂e. Pahxa rma re awakrekn̂e wahra mak, ero yopo xa tak awakresî amn̂e okre.

8 Pahxan pen komo yehtoponho poko tak ehcamhokak ha ke. Ahce warai poko n̂examro porin pen komo n̂ehcamhokekn̂e? Ero rma yîhtînoko ha ke.

9 Kokon̂oro ewruxapu makî reha kîw. Ero ke camkîno me mak tasî. Kaamo n̂enporî wara mak tasî kekatî wara. Yohno kyam mak cenmayasî tan roowo po.

10 Pahxan pen komo xa awakîrexe, Ero wa xa cexpore nasî, kexe awya. Takîhsomînhîrî pen komo mîkyam xatken̂e. Ero ke tîmtapotarî komo ke awakîrexe.

11 Kaw ma re por̂mamya wanturu yukuhya exihnî to. Tuuwa ma re n̂epamya turpem po?

12 Pîra ro mak. Tpor̂mamyataw rma na nuturpamya tuuwa yewtî. Ero wa exitaw yohno ro mak nuskuipamyasî ehkotora rma cexitaw. Yohno so n̂he nuskuipamyasî ero yipu anarî yopo, tatîhtaxmu yopo.

13 Ero wara xa marha naxe amn̂e ahnoro Kaan poko ceponarononkaxmu komo. Kir̂wan̂he rma was amn̂e, kahra tak naxe amn̂e tohnaw cesenposom kom okwe.

14 On wara tak naxe noro yipu komo, n̂ehcamnoyasî tak pona entoponhîrî komo okwe. Moyoskoto wara mak nas okwe ponaro ehtoponhîrî komo.

15 Tîmîn pona n̂emkayececexe, n̂emacakesî tko amn̂e mîîmo pen okwe. Tîmîn komo rma re nahsîyaxe, n̂ehcamnoyasî rma tko okwe.

16-17 Naatî wara makî ka naxe noro yipu komo. Tahwore natîkwasî naatî kir̂wan̂he tîhyataw roro, kaamo ywaw exitaw marha. Miya ro mak n̂etahyaresî n̂examro mararîn po. Yimicin tak n̂ekaramiyasî toopu poko enmexapu poko. Toopu yotaw so cesî roowo cheka tak.

18 Noro yipu rma na n̂ehcamnoya anarimaw. Ekenhîrî po exihra tak nasî. On wara kan̂e wara tak nasî ekenhîrî, Awenîn̂e pîn ow, kan̂e wara okwe.

19 Tahwore ehxapunhîrî tak naawaiyasî hara okwe naatî pen. Ekenhîrî po tko natîkwas anarî hara naatî. Ero wara naxe Kaan ponarono pîn komo okwe.

20 On wara nasî Kaan, kahsîpînkara ro mak nasî kicicme exihnî me kexitaw. Kicicitho pokono komo yecehtora marha nasî.

21 On wara tko nasî Noro amn̂e apoko, amtarî copoyinkesî pahxaro awewretopo ke. Okre okre, kan̂e me tak awir̂asî.

22 Aaxatî pîn komo tak pononmesî yîhyapamnotopo ke reha. Kicicitho komo mîn marha tak n̂ehcamnoyasî. Exihra ro mak tak nasî. Ero wara naxe amn̂e kicicitho komo, kekn̂e. Ero wa tî kekn̂e Biwtace Xoo ya.