On wara marha tî kekn̂e Xoo takrono komo ya, Ahce wa tai tan kexitaw so roowo po? Kîkar̂kan̂e poko apickaxapu wa thakwa taxe okwe. Epethîrî pona apickaxapu wara cetapickexe thakwa kokmamso roro.

2 Antonano wara mak taxe okwe yohno so n̂he kokmam xe taxe. Epethîrî pona cetapickaxmu marha nasî cepethîrî ponaro xa. Ero wa xa marha taxe kîwyam, tooto komo.

3 Ero wa xa marha was ow hara, yaake nuun̂i tohnawno poko mak wîxakn̂e ham okwe. Kosope so expora ro mak was oko. Ero chewno me ciixaputho mak ow.

4 Kosope oyetakriche on wara wîîkesî, Atî wicakî pahkî tan wai okwe kama po ohtotome hara? wîîkesî. Ahcemaw xa tak n̂enmaya, wîîkesî. Kehmamesî mak kama po enmarî momokrî poko.

5 Takye tak nas opuntho oko, roowo pupuntho ken̂e marha nasî ceipamxapu ken̂e. Cetîmtakaxi so nas oko opuntho, erekî n̂epatakesî roro oko.

6 Yohno so kokmamsom warai makî reha ow, poono kahtopo cesî yohno so ero wara kokmamyas owya. Kokmamyataw roro, Kir̂wan̂he na wai pahxaxa, kacho ponarora ro mak was okwe.

7 Kesehsîtopo wara mak nasî tan roowo po oyehtopo, cewn̂e ro mak kesehsîtopo wara. Ero wa oyehtopo ponaro cma re maxe. Oyahworecho yenîhra thakwa wai ham amn̂e.

8 Oroto ka oyen̂axe opoyino komo cewru ke so. Amn̂e tko oyenîkayaxe hara okwe. Oyen̂ataw rma awya so kexponkesî thakwa okwe.

9 Anarimaw kaapu smun ciki ceen̂axe wahrai. Ero yinhîrî poku, n̂ehcamnoyasî mak okwe. Ero wara xa marha taxe kwaipuche. Roowo cheka cetahruyaxe. En̂exa pakahra thakwa taxe hara okwe.

10 Kîmînthîrî yaka mokuhnî me tak taxe hara okwe. Noro pen yekenho tan ha, kahra ro mak tak naxe kîmîtwononhîrî komo amn̂e kekenhîrî komo poko.

11 Ero ke on wara wasî, tîtken̂e exihnî me wasî. Kîmtapowasî an̂entarî komo me ahwora ro mak oyexirî ke. Oyahwokacho chew ro mak was okwe. Ero ke ero wa oyehtopo wekatîmyasî rma.

12 Onoke warai me katî ow meen̂a Apa, tuuna imo me katî ow meen̂a? Ero kwawno me katî ow meen̂a okoimo warai me ha? Noro yipu me oyenîrî ke awya awanton mantome oyenîrî poko ham emahcira ro mak oyehtome?

13 Anarimaw on wara wîîkes ha re, Taa, ketakriyasî tak oyeserepotanmetome. Okaman tak na oyerepore, wîîkesî.

14 Oyetakriche rma tko ow meraspesî kopi owosotîmtopo ke hara. Enîhnînhîrî mko menpes owya oyeraspetopo kopi.

15 Ero yipu yenîrî ke owya oyexexewnuku xe mak wasî, owaipu xe wasî. Ontho yaw rma oyexi xera ro mak wasî, opuntho yaw.

16 Poxumra ro mak nasî tan roowo po oyehtopo. Miya roro waipîn me oyexi xera ro mak wasî. Ero ke opokono mera tak ehcoko. Kesehsîtopo wara cik mak nasî oyenmacho owya.

17 Ahce warai me nat amna awya, tooto komo? Ahce kacho awepataino wara xa amna miir̂a? Ahce wa amna nai awya, amna ponaro xa awehtome?

18 Enmar̂atîxera tooto yehtopo meen̂asî. Amna yehtopo mukukmesî emapona roro, Ero wa nai ham noro, kachome awya.

19 Anana enîhra ro mak katî mai oyentîkan̂enho? Opokohra tak na mai yohno mak, oyetakru yermomtome mak owya?

20 Kicicme ma wîxakn̂e awya? Ahce wa wîxakn̂e kicicme awece? Amna yentîkan̂e ro xa Amoro ham Apa. Ahce kacho ow mentîke owon̂e wara? Oroto tak kpokesî oyehtopo yînîmrî ke rma owya.

21 Ahce kacho owya awanwetoponhîrî yîhcamnopîra mai? Ahce kacho kicicme oyehtoponho towîhra mai? Pahnoke tak nasî oyetîrapotopo roowo cheka. Ero yinhîrî tak ow mepor̂axe tohnaw. Exihnî me tak wasî ero yimaw, kekn̂e tî. Ero wa tî kekn̂e Xoo.