1-2 Ero yinhîrî takî tî Xoo nîmtapowakn̂e hara. On wara tî kekn̂e, Oyahwokacho yukuknoma xe ro mak wasî awsîn yukuknomacho yaka. Oyemetanmetopo marha ciri xe wasî ero yipu pona yukuknomachome.

3 Yukuknometaw tawsîn̂em me ro mak n̂esenpesî oyahwokacho axawa yopo, tuuna imo yecihtawno yopo. Ero wicakî exirî ke oyahwokacho kîmtapota cerewre.

4 Karitî ro yuhre owoi oko. Iito rma nasî opun chew marawetî wara, oyekatî masmacho me ha. Yaake nasî Kaan ya oyeraspetopo. Cepanatoso mak nasî oyar̂machome.

5 Ahce wa nai buhu, okno pîn? Iihoo, nîîke ma re cuupu yeen̂ataw tînahrî. Mooo, nîîke ma re paaka hara tînahke cexitaw puruma yeceputho ke.

6 Ahce wa tai poxumra exitaw kootî? Yîmîtî ken̂ehra rma ma toon̂e? Ahce wa nai kapikara pume par̂ar̂amutunutho, tpoxwe ma re nai awya so?

7 Ero yipu yapupra ro mak was ow ha. Opetakmesî mak ero yipu erewsî kica.

8 On wara ka xe ro mak wasî Kaan ya, Apa kah yawno, omtapotarî cma re meyukyasî. Yiixe xa oyehtopo cma re mîmyas owya.

9 Oyakumho xe ro mak wasî Kaan ya. Oyeceto xera tak wasî yîwya owaikachome.

10 Ero yimaw tak cerepore wasî. Oyerewîmtopo chew rma kahwowasî, eserewkan chew rma. Kir̂wanî ro mtapotarî yeyamra rma wasî.

11 Atî wicakî rma nai kar̂pe oyehtopo? Kar̂pe n̂he ciki na wai amn̂e, wîîke ha ma re? Ahce kacho owaipu xera wai? Kir̂wan̂he tak na wai hara amn̂e, wîîke ha ma re?

12 Kar̂pe ma re wai toopu wara? Bronse me katî nai opuntho?

13 Oyanme ro rma katî oyemyawno wiir̂a hara awya so? Ehn̂an me oyehtopo tak nasî mooxe, ohyawra ro mak okwe.

14 On wara xa cexpore nasî tahwokacho chewno poko noro yipu xatî me kexitaw so, tahworepore mak nasî. Karitî ro poko etwerîmkaxapu komo meero tahworepore nasî tahwokacho chew exitaw so.

15-17 On wara tko maxe amyamro oyakno komo owece, tuuna yaporî wara mak maxe okwe. On wara nasî aporî, kemîknon̂e wara nasî anarimaw. Xeata nuxukrapamya, n̂eepe marha nuxukrapamya, ero yimaw nukmesî tak aporî. Kaamo yimaw tko napaitîkes hara okwe. Ocoro xa kaamo exitaw yarinho me tak nas hara okwe. Ero wa xa marha maxe amyamro owece.

18 On wara naxe mooxe cetarisom komo anarimaw, n̂etowyaxe cesamarî komo yai ro mak. Pohnîntaka ro mak tak cexe. Iito tak waihyaxe okwe.

19-20 Tema pono komo mooxe cexe anarimaw so kameru mkaw so. Anarimaw so tuuna n̂epor̂axe. Ero wa xa marha naxe Saba pono kom hara, tuuna yenî xe ro mak naxe. Okwe okwe, kexe tak. Kir̂wan̂he tîhcexe iina roro kîwtopo pona roro, kexe cma ha re kapu. N̂etakriyaxe tko tuuna exihnî na rma okwe. Ero wa nasî aporî kaamo yimaw.

21 Ero wa xa marha maxe amyamro hara, oyahworera ro mak maxe okwe. Owîrîmacho rma re meen̂axe. Ero pona tak meraswaxe mak okwe.

22 Ahce wa katî wîîkai awya so, Opurantanî cma re mîmyas owya, wîîkai ha kat awya so? On̂epethîkatho cma re mepemexe, wîîkai ma re awya so?

23 On wara katî wîîkai awya so, ooxatî pînî cma re mepemexe oyahsîpînkachome tak ha. Oyemetanmekn̂e komo epemacoko oyahsîpînkachome, wîîkai ma awya so? Ero wara kahra ro mak wîxakn̂e.

24 Ow xa ka akîhrecoko. Ero wa oyakîretaw awya so tîtken̂e tak wasî. Akpîra oyehtoponho ekatîmcoko owya.

25 Kîkariton̂e me xa nasî kîmtapotarî komo takîhso kîmtapowataw okre. Awya so oyanwetopo komo tko oyakîrera ro mak nas okwe.

26 Omtapotachonho na cecenka xe matu? Ahwokatîkaxapu thakwa owî. Wara rma omtapotarî mencexe ero pîntho me ro mak, ocowotho wa mak okwe.

27 On wara maxe rikomo poko, eporinkaxapu poko, men̂ekacho mar̂mexe ahsîtome awanton komo me. Awakrononhîrî komo rma na mîmyatu amyamro antonano me.

28 Oroto tko on wara wîîkes awya so, owece xa encoko. Awero ro so xa cemarontaxmu me katî ow meen̂atu?

29 Ero warahra tak ehcoko, kicicme cehsom komo tak yîtîtmamnoko. Owece tak etaknamak hara. Kir̂wan me oyehtopo n̂esenpesî rma.

30 Akpîn me katî kîmtapota awya so? Kicicitho me omtapowataw poxumnî me entara katî wai ero yipu awya so? kekn̂e Xoo. Ero wa kekn̂e.