Nîmtapowakn̂e rma tî ka Eripas. On wara tî kekn̂e hara, Amtapotakî ika Kaan yakro awakronomacho poko. Onoke ma re aweyukya awya? Naxe rma re kir̂wanî ro komo. N̂examro ma re awence?

2 Tîrwon komo yanme rma waihyaxe akpîra cehsom komo. Anarî poko tpohnîmrî komo rma nasî akpîra cehsom komo waihkan̂e me okwe.

3 Ow ween̂asî akpîra cehsom komo, weewe wara yimicintacho komo ween̂asî anarimaw. Ero yinhîrî tko ponan̂e rma tîwîrîmaxi xakn̂e hara yîmînthîrî okwe.

4 Mooxe naxe yîmxîkrî komo tukurunpen̂e komo yai. Ewto potaw rma akuhr̂apoxapu wara naxe okwe. Yîmtapotarî komo yakronoman̂e exihra ro mak nasî esen̂eketaw.

5 On wara marha naxe akpîn komo, yînatîrî yeperîrî nahtîkexe tîroman̂em komo. Cekyekyem chewno yeperîrî meero nahtîkexe. Emyawnonhîrî komo marha nowyaxe.

6 Roowo pupuntho chei epatakara nasî kahwokacho komo. Mararî po marha atîhtara nasî kesemetanmetopo komo.

7 Cesemetanmesom me rma tko wa cewruyaxe tooto komo ahnoro. Kahsî nawomyasî thakwa wehto rorontho ciki ero wara rma thakwa taxe cesemetanmesom me.

8 On wara wexirî ha re owî reha oyetwîrîmacho chew oyexitaw ketaw ha re, Kaan yakro kîmtapotarî. Apa kah yawno, owî cma re mowyasî oyetwîrîmacho chewnonho, wîîkarî re yîwya.

9 Kyopono ro mak Mîk Kaan keserepokacho ciin̂e ro. Ero wa xa ero yipu n̂iir̂a Kaan, kacho yîhtînopîra thakwa taxe. Cirihnî mko ciin̂e Mîk mer̂pono pînî ro mak, yukuknomarî yopono ro mak.

10 Tuuna yekpon̂e Mîk roowo tîhtopo, mararî yatîkrecho marha.

11 Cewetîsom me kiin̂e Mîk Kaan ewetîn me ehxapunhîrî komo rma. Cewru yaan̂e komo nanîmyasî emetanmekn̂e komo yai.

12 Emetanmekno rin̂e komo na n̂esencetu anarmerpa so kemetanmetopo komo poko okwe. N̂examro tko n̂ehn̂anmekyasî Kaan emetanmekno ri xat komo rma. Ero ke kemetanmekîra rma naxe tamorî ke so.

13 Emîknono ri xatî komo n̂esehtînoyaxe kîwîrîmacho komo poko. Ero wara emîknono ritopo rma tko Kaan n̂iir̂asî n̂examro yîwîrîmacho komo me hara. Yohno rma n̂examro n̂etwîrîmexe anarî komo yemîknotoponho ke rma.

14 Ero wa kiri xatînhîrî komo tak naxe awarpantaxapu wara katpanawno komo rma kopi. Kamarakataw rma cesamarî komo n̂epor̂axe kosope cetar̂atawno wara.

15 Noro yipu komo mtaw nasî kacipara imo warai. Iike cesemetanmesom komo waihka xe naxe karitî komo. Nukurunpesî rma tko Kaan emetanmekîra tak ehtome so yiixatî pîn komo.

16 Ero wara tukurunperî komo ke Kaan pona tak n̂een̂axe cesemetanmesom komo. Akpîn komo reha nîtîtmamyaxe mak yînkurunpethîrî komo yenîrî ke.

17 Tawake naxe Kaanî npanaretho komo. Ero ke Karitî ro ya apanaretopo yîwîrîyakara esko ha ke.

18 Ketapan̂e rma re Mîkî Kaan, kehceman̂e me rma tko nas hara amn̂e. Kerepen̂e rma re Mîkro, kehceman̂e me rma tko nasî Noro rma hara.

19 6 ro na mai awetwîrîmacho chew. Ero yipu chei rma tko awowyas okre. 7 ro tko na mai ero yipu chew. Ero yipu ya tko awaikapora nasî.

20 Rooma poko awexitaw so aweceton̂e me rma nasî Kaan, waipîn me awin̂e me ha. Waapa yakro awetar̂metaw kacipara imo ya awamapora ro mak wa nasî.

21 Kicicme yîmtapowataw so tooto komo anarî komo poko apoko yîmtapotara reha naxe. Anarimaw yîmînkano na n̂iir̂a wehto, ocowo imo na anarimaw. Ero yimaw erasîra rma masî amoro reha. Awaton̂e me mak nasî ero yipu, awîrîmacho ha.

22 Mewresî mak ero wara anarî komo yetwîrîmetaw, rooma poko exitaw so marha. Aweskan̂e komo pona erasîra ro mak masî.

23 Toopu yakro mîmtapowasî akurunpetopo poko. Tawake marha nasî keskan̂e komo apoko.

24 Mooxe awetar̂ataw, Kir̂wan̂he nas omîn, ero yawno marha, mîîkesî marha erasîra. Amokuche hara iito rma wa meen̂asî awemyawno ehcamnopîn me.

25 On wara marha mîîkesî yaaro, Mer̂pora tak nas amn̂e oyepamtho. Cuupu wara ro mak nasî mer̂pora ro mak, mîîkesî.

26 Kir̂wan̂he mîporitomoncetîkesî awaitopo pona roro. Puruma yepu wara masî, akîhxapu yîhkotoxapu wara. Ero wa masî Kaanî npanaretho me awexitaw.

27 Ero wa kehtopo komo amna n̂een̂asî tooto komo yenîrî ke. Yaarono tan wîîkes awya. Ero ke omtapotarî entakî takîhso tak awehtopo yîhtînotome, kekn̂e tî. Ero wa tî kekn̂e Eripasî Xoo ya.