Taa, tîmtapotachonhîrî komo mewreche tak tosotî komo tak mewretken̂e hara ero yapomyaw. Yaaro xa tan wîîkes, kachome mewretken̂e tosotî komo. Yihcirî me ka Neemias mewrekn̂e tosotî. Xutew komo kayaritomon mîk xakn̂e, Akarias mumuru ha. Ero yinhîrî on wara xatken̂e tosotî mewren̂e kom hara. Osotî komo tan wetahcasî, Setekias,

2-8 Seraias, Asarias, Xeremias, Pasu, Amarias, Mawkias, Atus, Sebanias, Maruke, Arin, Meremoce, Obacias, Taniew, Xin̂eton, Baruke, Mesuraw, Abias, Miamin, Maasias, Biwkai, Semaias, ero wa tî xatken̂e tîmsom pokono komo yosot ha.

9-13 Repita komo marha mewretken̂e tosotî komo. N̂examro yosotî marha wetahcas hara, Xesua, Asanias mumuru mîk ha, Binui, Enatace mumuru mîk ha, Kacmiew. N̂examro yanan komo yosotî tan wetahcas hara, Sebanias, Ocias, Kerita, Peraias, Anan, Mika, Heobe, Asabias, Saku, Serebias, Sebanias, Ocias, Bani, Beninu, ero wa tî xakn̂e Repita komo yosotî, tosotî mewren̂e komo yosot ha.

14-27 Ero yinhîrî tak Ixaw Yana yantoman̂e komo tak mewretken̂e tosotî kom hara. N̂examro yosotî tan wetahcas hara, Paros, Paace-Moabe, Eraw, Satu, Bani, Buni, Askaci, Bebai, Atonias, Bikpai, Acin, Ate, Esekias, Asu, Ocias, Asun, Besai, Aripe, Anatoce, Nebai, Makpias, Mesuraw, Esi, Mesesabew, Satoke, Xatua, Peracias, Anan, Anaias, Oseias, Ananias, Asube, Aroese, Pira, Sobeke, Heun, Asabna, Maaseias, Aias, Anan, Anan, Maruke, Arin, Baana, ero wa tî xakn̂e antomano rin̂e komo yosotî, tosotî mewren̂e komo yosot ha.

28-29 Taa, iito marha xatken̂e anarî kom hara, tosotî mewren̂e pîn komo. On wara xatken̂e n̂examro, tîmsom pokono komo, Repita komo, metata yenîn̂e komo, waano yaan̂e komo, Repita yakronoman̂e komo, ero wa xatken̂e n̂examro. Kaan ya kpanatanmetopo yewetî xatî komo rma mîkyam xatken̂e, mîk hak rowon pononho komo yai etakpaxapu kom ha. Ero wa xa marha tî xatken̂e yipici komo, yumumuru komo, emsîrî komo, por̂me n̂he ehxapu komo, takîhso entan̂e kom ha. Ahnoro tî noro yipu komo ketken̂e takno komo wara xa marha, tantoman̂e komo wara xa marha. On wara tî ketken̂e, Kaan ya kpanatanmetopo komo amna n̂ewehcasî, Moises ya kekn̂e, tanton ya, ero rma amna n̂ewehcasî. Ero yaw roro mak nas amna. Ero wa kacho watohra ro mak amna nasî, ketken̂e. Yaaro xa ketken̂e, esemîknopîn me ro mak. Kaan ya rma ketken̂e, Amna rma waihkakî ero yewetîra amna exitaw, ketken̂e yîwya.

30 On wara xa ketken̂e, Cemsîrî tîmîhra ro mak nas amna tantono ro komo ya, n̂examro yemsîrî marha ahsîpora nas amna tumumuru komo ya.

31 Anarimaw twarawanta xe na natu tantono ro komo amna yakro. Ahce na me ciixapu na n̂ekyatu, mararî pono yeperîrî marha na n̂ekyatu. Kepokaretopo po rma tko na n̂ekyatu ero po amna warawantachome. Ero po ekyataw yîwya so ahsîra ro mak nas amna. Ahce po so na, Kaan yakan me amna yesenmetopo po so na n̂ekyatu cemyawno komo ero po so ahsîra marha nas amna. Taa, 6 cimn̂ipu ka tmararîn pono yeperîrî amna n̂enmekyasî tînahrî me. 7-nhîrî po tak atîhtaxapu yeperîrî reha enmekîra ro mak nas amna. Iito rma wa nasî mararî po rma. Taa, anarimaw so na amna n̂epethîke amna poyino. Yîwya tko kahra nas amna, amna men epemak okwe, kahra nas amna, kekn̂e amna ahnoro mak.

32-33 On wara marha amna xakn̂e, tpanatanmetopo rma amna mewrekn̂e on wara kacho, Yicimn̂ipuntaxera amna nîmyasî tîmsom pokono komo ya puranta, tehsa sikru wicakî so amna nîmyasî ahce na yiixe n̂examro yehtopo yepetho me, Kaan mîn yaw cetapickaxmu komo yiixe ehtopo ha. Cuure warai, puruma yatho, Kaan ya tîmsom ro ha, okno, takn̂itîkaxmu, sabatu po roro tîmsom, nuun̂i yepataketaw roro tîmsom, amna yahwotatopo yimaw so tîmsom, Kaan mîn yawno ro, ero yipu yepetho me amna nîmyasî. Kicicme Ixaw Yana komo yehtoponho yahrutopo me tîmsom yepetho marha amna nîmyasî. Ahce na Kaan mîn yakir̂wamacho yepetho me amna nîmyasî marha, kekn̂e amna. Ero ke ero wa kacho amna mewrei tpanatanmetopo me.

34 On wara marha xakn̂e amna, men̂ekacho amna nar̂mai tîmsom pokono komo poyino men̂ekachome, Repita komo poyino men̂ekachome marha, Ixaw Yana komo poyino men̂ekachome marha. Noro yipu komo amna men̂ekai wehto yenmekn̂e me Kaan mîn yaka. Anarî nuun̂i po anarî komo amna n̂iir̂akn̂e enmekn̂e me. Anarî cimn̂ipu po hara, ero nuun̂i po rma enmekn̂e me ciisom me tak xatken̂e. Ero wa amna n̂iire n̂examro ahnoro. Yicimn̂ipuntaxera ero yimaw so nasî awyanî ro weewe yenmetopo ro me. Ero wa so cenmekpore nasî, kacho yaw roro rma n̂enmekyaxe kpanatanmetopo komo yaw roro rma.

35 On wara kacho marha amna mewrekn̂e tpanatanmetopo, amna mararîn pono yeperîrî raconho amna naar̂asî Kaan mîn yaka, amna natîrî yeperîrî marha weewe yeperîrî ha. Yihcirî me epetaxapu rma wa amna naar̂asî roro yicimn̂ipuntaxera, kacho amna mewrekn̂e.

36 On wara kacho marha amna mewrekn̂e, Amna mumuru komo amna naar̂as iina Kaan mîn yaka, poturu me ewruxapu. Tîmsom pokono komo yaka amna naar̂asî kpanatanmetopo yaw roro rma Kaan ya tîmtopo me. Amna yoh komo marha amna naar̂asî poturme ewruxapu. Paaka amna naar̂asî, oper̂a marha. Noro tak amna naar̂asî tîmsom pokono komo yaka. Ero wa amna n̂iir̂asî tokuthîrî, tumumuru komo marha.

37 Amna kwaxarîn raconho marha amna naar̂as iina. Ahnoro Kaan ya tîmsom amna naar̂as iina, weewe yeperîrî raconho, wooku, yaxan me ciixapu mîn ha, oripa katî marha. Ero yipu amna naar̂asî tîmsom pokono komo yaka, ero yipu yamtakpon yaka. Cisimu wicakî amna nîmyasî Repita komo ya, amna nahrî raconho, amna yotî raconho marha. Ero wa so tîmpore roro nasî yîwya so ahnoro mararî yosom komo, tokyem komo marha.

38 Amna nahrî raconho yahsîyataw Repita komo ya n̂examro yakro marha n̂expe Kaan yaka cewomsom, Araw yepamtho ha. Cisimu komo yahsîyataw Repita komo ya ero raconho hara naar̂axe Repita komo Kaan mîn yaka, cisimu wicakî xa marha. Ero yipu yenmetopo ro yaka naar̂axe Kaan mîn yamtakpon yaka.

39 Ahnoro Ixaw Yana komo naar̂axe Kaan ya tîmsom iina Kaan mîn yaka ero yipu yamtakpon yaka, Repita komo marha naar̂axe. Tmararîn komo pono yeperîrî naar̂axe, wooku naar̂axe ciixan, katî, ero yipu naar̂axe iina Kaan mîn yaka ero yipu yamtakpon yaka. Tîmsom pokono komo nahrî me naar̂axe, metata yenîn̂e komo, waano yaan̂e komo, noro yipu komo nahrî me marha. Pohnî me n̂examro cirihra ro mak nas amna, Kaan mîn pokono kom ha, kacho amna mewrekn̂e amna panatanmetopo me. Ero wa kacho amna mewrekn̂e. Ero wa amna xakn̂e.