Taa, iito rma ka xatken̂e Ixaw Yana komo Xerusaren po rma. Ero nuun̂i po iito rma ka xatken̂e, 24-nhîrî kaamo po ha. Ero po tak eseresmara xatken̂e. Kumixitho yaw mak xatken̂e ero yimaw. Roowo ke marha n̂ekanapupuretken̂e.

2 Ero yimaw marha Ixaw Yana me ewruxapu komo n̂etîcherenonketken̂e. Ixaw Yana pîn komo n̂en̂epetken̂e tîchei so. Ero wa en̂epeche so piiri so n̂ecececetken̂e Ixaw Yana komo. Kicicme cehtoponhîrî komo n̂ekatîmyatken̂e, kicicme tporin pen komo yehtoponho marha.

3 Iito rma n̂ecececetken̂e roro po rma pahkî. Kaan ya kpanatanmetopo ka n̂encetken̂e pahxaxaro ha ka, 10 to cehso ro kaamo. Ero yinhîrî kamarakataka cehso ro tak kicicme cehtoponhîrî komo n̂ekatîmyatken̂e hara. Kporin komo poko marha nahwowatken̂e, ponaro cehtopo komo poko.

4 Ero yimaw iito xatken̂e Repita komo. Osotî komo tan wetahcasî, Xesua, Bani, Kacmiew, Seman̂ias, Bun̂i, Serebias, Bani, Kenani, ero wara. Kawomtopo po tak n̂ecececetken̂e piiri, Repita komo yehyunî ro po. Kporin komo yakro tak nîmtapowatken̂e kar̂pe.

5 On warai komo xa nîmtapowatken̂e Repita komo. Osotî komo tan wetahcasî, Xesua, Kacmiew, Bani, Asabneias, Serebias, Ocias, Sebanias, Petaias, ero wara xakn̂e osotî komo. N̂examro tak nîmtapowatken̂e esenmexapu komo yakro, Kporin komo yakro marha. On wara ketken̂e yîwya so, Piiri tak awomcoko. Kir̂wan̂he Aporin komo Kaan yehtopo poko amtapotacoko, N̂eexi tak, kacho mera ro mak. On wara kacoko yîwya, Apa kah yawno, kir̂wan̂he ro mak nasî awosotî amna ya, ka xe nas amna. Ekatîmtîkarî yopono mîn awosotî. Kir̂wan̂he awehtopo yekatîmtîkara ro mak nas amna.

6 Amoro mak amna Porin. Kaapu yakîhton̂enho Amoro, kaapu mko yepoyino yakîhton̂enho marha. Ahnoro ero yawno komo yakîhton̂enho marha Amoro. Roowo yakîhton̂enho Amoro, ero pono komo marha ahnoro. Tuuna yakîhton̂enho Amoro, ero kwawno komo marha ahnoro. Ero yipu komo yecehton̂e marha Amoro. Apoko mak nahwowaxe kah yawno komo mer̂pono pîn komo.

7 Kaanî ro xa Amoro amna Porin. Abraw pen mahsîyakn̂e ayanan me. Uru poi tak mekyakn̂e Kawtew komo yewton poi. Noro tak mosohcekn̂e Abraaw me hara.

8 Noro meen̂akn̂e aponarono me anarî ponarora ro mak. Ero ke noro wakrecho poko mîmtapowakn̂e noro yakro rma. On wara mîîkekn̂e yîwya, Kananew komo rowontho tak wîmyasî awepamthîrî komo ya amn̂e. Etew komo, Amohew komo, Peresew komo, Xebusew komo, Kihkasew komo, ahnoro n̂examro rowontho wîmyas amn̂e awepamthîrî komo ya, mîîkekn̂e yîwya. Taa, amtapotachonhîrî yaw roro tak miir̂akn̂e ham okre. Ero wa miir̂akn̂e kir̂wanî ro me awexirî ke.

9 Amna porin pen komo yemetanmetoponho meen̂akn̂e Exitu po. Ahce wa tat okwe, kacho marha mencekn̂e yîmtapotarî komo Cucurem Yewku yecihtaw exitaw so hara.

10 Kaan me awehtopo menpekn̂e, keserepokacho marha menpekn̂e Paraw yîwîrîmacho poko. Noro maywen pen komo mîwîrîmekn̂e, ahnoro noro rowon pono pen kom ha. N̂examro yehcoyoponkarî mencekn̂e, Ixaw Yana komo yoponkacho ha. Ero wa kir̂wanî ro me awehtopo menpekn̂e miyan komo ya rma. Awosotî n̂esekaiporesî rma oroto.

11 Tuuna imo tak mîhkocekn̂e n̂examro yesamarî me. Yarinho yaro mak tak cetken̂e, turpem pore. N̂examro yemetanmekn̂enho pen komo reha mar̂mekn̂e kr̂a weyuntaka. Tuuna imo kwaka tar̂mesî toopu karihcaka ero wara so n̂examro pen mar̂mekn̂e.

12 On wara marha ayanan komo makronomekn̂e, katpanaw n̂examro maar̂akn̂e kaweresî ke patawno ke. Kosope reha maar̂akn̂e wehto ke hara patawno ke rma. Ero wa n̂examro yesamarî mîweipekn̂e kosope.

13 Sinai Yîpîn pona marha mîhcekn̂e. N̂examro yakro mîmtapowakn̂e kah yai rma. Takîhso ehtopo komo poko mîpanatanmekyakn̂e, yaarono me ehtopo komo poko ha. Kir̂wan̂he kehtopo komo poko n̂examro mîpanatanmekyakn̂e, Ero wa ehcoko, kacho poko.

14 On wara marha mîîkekn̂e yîwya so, Oponaro xa awehtopo komo mîn sabatu, kaamo, mîîkekn̂e. Anamerpan poko mîpanatanmekyakn̂e. Moises xakn̂e awanton me. Noro ya tî mekatîmyakn̂e n̂examro panatanmetopo.

15 Yîromanataw so iyurmano miir̂akn̂e kah yaino ke okre. Twokru xe exitaw so marha wokpano miir̂akn̂e toopu yatumnawnonho ke. On wara mîîkekn̂e yîwya so, Kananew komo rowontho yahsîso tak etocoko. Pahxa rma ero tîmtopo poko kîmtapowakn̂e awakro so. Yaaro xa wîîkekn̂e esemîknopîn me ro mak. Ero ke ahsîso tak etocoko, mîîkekn̂e yîwya so.

16 Tanmero so makî tko tî cexi xe so xatken̂e. Tîpîmyewaxke so makî tî xatken̂e kica. Awya tpanatanmetopo komo ponarora ro makî tî xatken̂e okwe. Ero wa tî xatken̂e n̂examro, kporin pen komo rma.

17 Awewetî xera ro makî tî xatken̂e okwe. Cirihnî rma re miir̂akn̂e wero ro so, eserepokacho komo xa. Ero ponarora ro mak xatken̂e okwe. Tîpîmyewaxke mak takî tî xatken̂e kica. Awanwekrî ke yîwya so taan̂e komo tak n̂iir̂atken̂e anarî hara. Tîyopo so tantoman̂enhîrî komo yaka tîto xe so xatken̂e hara okwe. Kaanî ro xa tko Amoro Apa, kicicme kehtoponhîrî yîhcamnopu xatî amoro okre. Kakronoman̂e ro Amoro, kîpînîn yawno marha. Yamoro cetîrwonmesom Amoro, mer̂pono pîn ke kwakren̂e marha. Noro yipu Amoro. Ero ke n̂examro yahsîpînkara rma mîxakn̂e.

18 Ero yinhîrî tak paaka xîkrî warai nakîhcetken̂e ooru mak. On wara tî ketken̂e tînakîtothîrî komo poko, Moso xa Kaan ha, ponaro kehtopo komo. Exitu poi awekn̂enhîrî komo moso, ketken̂e tî kica. Anarmerpan ke arwonmekyatken̂e kica.

19 Wara rma kîpînîn yawno ro me mak awexirî ke n̂examro yahsîpînkara mîxakn̂e meye exitaw so pohnîntaw. Yîhyai so ehcamnopîra tî xakn̂e kaweresî patawno. Katpanaw roro tî cekn̂e n̂examro poturme esamarî komo yaw aan̂e me so. Iito roro marha tî xakn̂e kosope wehto hara patawno. Weipon̂e me so tî xakn̂e, esamarî komo weipon̂e me marha tî xakn̂e kosope cetaw so.

20 Awekatî marha mîmyakn̂e yîwya so, kir̂wanî ro. N̂examro pen yakîhren̂e me xakn̂e. Awru poyero amemra ro mak mîxakn̂e maana poyero. Twokru xe exitaw so yutunarî komo marha mîmyakn̂e yîwya so.

21 40 cimn̂ipu n̂examro yecehton̂e me mîxakn̂e. Esemetanmekîra ro makî tî xatken̂e. Etahyaxkara tî xakn̂e ponon komo. Yupurutara marha tî xakn̂e yîhtarî komo.

22 On wara marha n̂examro miir̂akn̂e, mîk hak kayaritomon komo mar̂mapekn̂e yîwya so, maywen komo yakro rma mar̂mapekn̂e. Yîrowonthîrî komo mîraconkekn̂e ayanan komo yekenî ro me. Meyeno komo meero mar̂mapekn̂e yîwya so. Sion pen rowontho nahsîyatken̂e, Esbon pono komo kayaritomon pen rowontho ha. Oki pen rowontho marha mîmyakn̂e yîwya so, Basan pono komo kayaritomon pen rowontho ha.

23 Yîmxîkrî komo mepamnoyakn̂e marha mer̂pora cehso ro. Xir̂ko wara ro mak tak xatken̂e mer̂pora. Ero yimaw tak on pona n̂epataketken̂e roowo pona. Pahxa cma re mîîkekn̂e n̂examro porin pen komo ya on wara, Ero pona tak etocoko roowo pona, mîîkekn̂e. Ero pona tak n̂epataketken̂e yîmxîkîthîrî komo.

24 Kanan pona takî tî n̂epataketken̂e. Ceken komo me takî tî nahsîyatken̂e. Kananew komo tî xatken̂e iito ero yimaw. N̂examro pen mar̂mapekn̂e yîwya so, iyopono me so tî ayanan komo mîîr̂akn̂e. Kayaritomonînhîrî pen komo mahsîpekn̂e yîwya so, maywenînhîrî pen komo yakro rma. Ehe, moxam ahsîcoko, awanme ro so tak ciicoko, kan̂e me tî mîxakn̂e yîwya so.

25 Twacayem xa nahsîyatken̂e ewtonthîrî komo. Ewtî mexan marha nahsîyatken̂e mararînthîrî kom hara. Yîmînthîrî komo marha nahsîyatken̂e emyawno ke copoyem okre. Ahtoxapu marha nahsîyatken̂e yutunathîrî komo. Uupa yepu nahsîyatken̂e yînatîthîrî komo, oripa yepu komo marha, mîn hak me cepetaxmu komo marha weewe komo. Mer̂pora nahsîyatken̂e ero yipu komo. Ero ke n̂eseresmetken̂e tmaxmitaxi ro so. Tupurukye tak n̂ehtîketken̂e. Kakronoman̂e me awehtopo poko nahwowatken̂e okre.

26 Wara rma awanwekyatken̂e rma tko kica. Amtapotarî yewetîn̂e pîn me xatken̂e okwe. Awya tpanatanmetoponhîrî komo nahsîpînketken̂e okwe, tîmkai so ar̂man̂e wara mak xatken̂e. Apoko weronomano rin̂e pen komo waihketken̂e, Kicicme maxe okwe, kan̂e komo. Ero wara ketken̂e weronomano rin̂e pen komo ayanan komo ropotarî yaknamachome awece hara. Wara rma arwonmekyatken̂e ro mak okwe ayanan komo.

27 Ero ke tak n̂examro pen makîrha mar̂mapekn̂e yiixatî pîn komo ya. Ixaw Yana pen komo tak n̂emetanmekyatken̂e okwe. Cesemetanmetopo chew cexitaw so tak cerewre nîmtapowatken̂e awakro. Yîmtapotarî komo rma mencekn̂e meye kah yaw rma. Yukurunpen̂e komo tak menpekn̂e Amoro. N̂examro tak towno n̂iir̂atken̂e, tîîxatî pîn komo n̂en̂epetken̂e hara. Ero wa Ixaw Yana komo makronomekn̂e kîpînîn yawno me xa awexirî ke.

28 Ero yinhîrî tak waparî komo mokuhra exitaw so hara kicicme takî tî xatken̂e hara awece. Ero ke tak n̂examro mînomyakn̂e yiixatî pîn komo n̂emetanmekrî me xa hara. N̂examro yanton me thakwa tak xatken̂e. Wara rma awece etaknametaw so xa hara yîmtapotarî komo mencekn̂e xa hara meye kah yaw. Emapona roro towno miir̂akn̂e kîpînîn yawno ro me awexirî ke.

29 N̂examro rma re men̂ekekn̂e. Ero wa mîxakn̂e n̂examro poko awya panatanmetopo komo wece etaknamatome hara. Wara rma, Kir̂wanî ro mak amna tanme ro rma, ketken̂e rma tko kica. Awya tpanatanmetopo komo ponarora rma tî xatken̂e okwe. Awya tîtwermacho komo nanwekyatken̂e kicicme so okwe. Waipîn me kiin̂e cma re mîn awya amna panatanmetopo, ewetîn̂e me amna exitaw. Ero yipu ponarora rma xatken̂e okwe. Kica, kica, ketken̂e ro mak ero poko. Tîpîmîrî komo mak n̂iir̂akn̂e cewaxke okwe. Amtapotarî yenta xera ro mak xatken̂e.

30 Pahkî ro mak n̂examro yehtopo mînîmyakn̂e, mer̂pora cimn̂ipu okwe. Kicicme n̂examro yehtopo metahcakn̂e Awekatî ke, apoko weronomano rin̂e komo ropotawno ke. Amtapotarî yentara tko tî xatken̂e okwe. Ero ke tak n̂examro pen mar̂mapekn̂e mîk hak rowon pono komo ya.

31 N̂examro pen waihkatîkara rma tko mîxakn̂e ahsîpînkatîkara marha. Ero wara mîxakn̂e poko so kîpînîn yawno ro kax ha. Kaan xa Amoro, amna yakronoman̂e ro, amna pînîn yawno ro xa.

32 Ero ke on wara amna kes awya apa, ponaro amna yehtopo Amoro. Amna yopono ro xa Amoro, karitî ro xa. Kopi, kacho xa Amoro amna ya. Amtapotachonhîrî yaw roro kiin̂e ro xa Amoro. Amna yîpînînkan̂e pînî ro mak Amoro. Tahwokacho chew ro mak xakn̂e amna okwe. Ero wa xatken̂e amna kayaritomon komo, amna yantoman̂e komo, amîn yenîn̂e komo, amna weronoman̂e komo, amna porin pen komo, ayanan komo ahnoro ero yipu chew ro mak xatken̂e. Pahkî ro mak ero yipu chew xatken̂e Asiriu kayaritomon komo yehtoponho n̂ixa ro. Oroto rma ero wara nas amna. Ero ke wahra mak mesemetanmekyatken̂e, kahra cma re mas amna poko.

33 Yaaro rma tko amna yîwîrîmacho mekmexpekn̂e. Amtapotachonhîrî yaw roro mak ero mekmexpekn̂e. Kicicme ro mak xakn̂e amna kica.

34 Awya tpanatanmetopo yewetîra xakn̂e amna okwe. Ero wara xatken̂e amna kayaritomon komo, amna yantoman̂e komo, amîn yenîn̂e komo, amna porin pen komo. Kicicme awexitaw so awîrîmacho komo men wekmexpesî, kacho ponarora xatken̂e.

35 Awanme mak exihra ro mak xatken̂e amna kayaritomon pen komo. Mer̂pora xakn̂e anmîthîrî yîwya so. Ero poi tko tîmîhra ro mak xatken̂e awya hara. Porin pona cma re n̂examro mekenmekn̂e roowo pona, cepethîkem ken̂arî pona. Ero wa xa ham Apa, amna cma mîwakrekn̂e ham okre, kahra tko xatken̂e kica awya. Kicicme cehtoponhîrî komo yîpînînkara marha xatken̂e okwe.

36 Oroto tak amna nasî antonano me mak okwe. Anmîthîrî po rma re nas amna roowo po. Anmîthîrî on amna porin pen ya. On pono komo atîhtaxapu yeperîrî ahcoko, mîîkekn̂e yîwya so, on pono mko ahsîcoko ahce na cepethîkem komo, mîîkekn̂e marha yîwya so. Ero po rma nas amna oroto antonano me mak ha tko okwe.

37 Mer̂pora rma re n̂eperwasî on po atîhtaxapu anarî rowon pono komo kayaritomon nahrî me mak ha tko okwe. Amoro rma n̂examro miir̂akn̂e amna kayaritomon me kicicme amna yexirî poyero. N̂examro yanton me mak nas amna, amna yokutho marha nahsîyaxe tanme ro so mak. Amna n̂esemetanmekyasî ro mak okwe.

38 Ero wa amna yexirî ke yaaro xa tan amna nîmtapowasî awakro. Tîmtapotachonhîrî mewres amna. Ero wa kacho yapomyaw tosotî mewres hara amna yantoman̂e komo, Repita komo, amîn yenîn̂e komo. Ero wara amna mewresî yaarono me xa tîmtapotachonhîrî yenpotome. Ero wa tak nas amna.