Ero yinhîrî tak 7-nhîrî nuun̂i po cewtonî ro po so rma xatken̂e Ixaw Yana komo. Ero po takî tî Xerusaren pona cesenmetopo komo nîhtînoyatken̂e, iito re tî nîhtînoyatken̂e. Ero ke Xerusaren pona cetken̂e. Yîhroron pona n̂esenmekyatken̂e, Tuuna Metatan yecentono pona. Iito tak xakn̂e Estras, kpanatanmetopo mewren̂e ro. Noro tak nantometken̂e Kaan Karitan yîmtapotarerî poko, Moises ya kpanatanmetopo komo yîmtapotarerî poko. Ixaw Yana komo panatanmetopo mîn Kporin komo ya, ero yîmtapotarerî poko noro nantometken̂e.

2 Ero ke tak kpanatanmetopo n̂ekyakn̂e Estras karita. Esenmexapu komo yeepatai n̂ecececekn̂e. Kîrkomo yeepatai xakn̂e, wooxam komo yeepatai marha. Miyan komo n̂entarî me rma yîmtapotare xe xakn̂e takîhso entan̂e komo n̂entarî me. 7-nhîrî nuun̂i po iito xatken̂e, yihcirî kaamo po ha.

3 Ewto roron po xatken̂e Tuuna Metatan yecentono po. Pahxaxaro ka n̂ihciyakn̂e yîmtapotarecho. Kamarakataka cehso ro nîmtapotarekn̂e. Iito rma xatken̂e esenmexapu komo, kîrkomo, wooxam komo, ahnoro takîhso entan̂e komo. Kpanatanmetopo ponaro mak xatken̂e mewrexapu ponaro.

4 Iito xakn̂e aapo, weewe. Estras yapon me akîhtoxapu mîn xakn̂e. Ero po tak n̂ecececekn̂e. Noro panaw n̂ecececetken̂e kaari n̂ixa Macicias, Sema, Anaias, Urias, Iwkias, Maaseias. Estras panaw marha xatken̂e anarî kom hara poowa n̂ixa, Petaias, Misaew, Mewkias, Asun, Asbatana, Sakarias, Mesuraw. Ero wa tî xatken̂e Estras panawno komo.

5 Ero ke karita womhokekn̂e Estras esenmexapu komo wero ro. Kaw n̂he xakn̂e noro aapo po. Kaan Karitan womhoketaw piiri tak nawomyatken̂e esenmexapu komo.

6 Ero yinhîrî tak Estras nîmtapowakn̂e Kporin komo yakro kir̂wan̂he Noro yehtopo poko, kyopono ro me ehtopo poko marha. Ero yinhîrî tak noro n̂eyukyatken̂e esenmexapu kom hara. Ero wa ham, ero wa ham, ketken̂e. Tapockaw so xatken̂e ero wa ketaw. Ero yinhîrî tak nutupenwatken̂e roowo wece cewru. Kporin komo poko nahwowatken̂e ero wara rma.

7 Iito marha xatken̂e anarî komo, On wara nai osotî komo, Xesua, Bani, Serebias, Xamin, Akube, Sabetai, Ocias, Maaseias, Kerita, Asarias, Xosabace, Anan, Peraias, ero wa xakn̂e n̂examro yosotî. Repita komo marha xatken̂e iito. Esenmexapu komo nîhcamhoketken̂e n̂examro kpanatanmetopo komo poko camkî exitaw so. Iito rma xatken̂e esenmexapu komo cececetoso so.

8 Ero ke tak karita nîmtapotaretken̂e, Kaan ya kpanatametopo ha. Centaxmu me xa nîmtapotaretken̂e. On wara kacho mîn ha, ketken̂e tak iitono komo, Repita komo yakro. Ero wara so yîhcamhokano n̂iir̂atken̂e.

9 Ero yinhîrî tak Kaan ya kpanatanmetopo yentache n̂he esenmexapu komo ya nîwracetken̂e mak tak okwe. Anarme tko kekn̂e Neemias, kayaritomo mîk noro. Estras marha kekn̂e, tîmsom pokono mîk noro, Kaan Karitan mewren̂e ro marha mîk ha, Repita komo marha, iitono komo yîhcamhokan̂e komo, ero warai komo nîmtapowatken̂e. On wara ketken̂e yîwya so, Ai oyakno komo, aaci komo marha, Kaan yaka tîtmocow on kaamo po, Kporin komo yaka mak. Ero ke yîwratara ehcoko, ketken̂e.

10 Estras marha kekn̂e yîwya so, Taa, etocoko ha ka, kasom tonocoko awotî komo, tîkporem marha eecoko awokru komo. Yînapumnî nahrî marha arpocoko. Kporin komo yaka kesenmetopo komo on kaamo. Ero ke ahwokara ehcoko. Akariton̂e komo xa mîn Kporin komo poko awahwotacho komo, kekn̂e. Ero wa kekn̂e Estras.

11 Ero ke yîtîtmamnono xa marha n̂iir̂atken̂e Repita kom hara. On wara ketken̂e yîwya so, Tîtken̂e ehcoko. Kporin komo yaka kesenmetopo komo on kaamo okre. Ero ke ahwokara ehcoko, ketken̂e yîwya so.

12 Ero yinhîrî tak n̂etakpayatken̂e esenmexapunhîrî komo. N̂eseresmetken̂e tak, wooku marha n̂eer̂atken̂e. Yînapumnî komo nahrî marha narpetken̂e. Nahwowatken̂e xa tak okre. Takîhso tî n̂encetken̂e Kaan Karitan, tîhcamhokarî ke so iitono komo ya. Ero ke wa nahwowatken̂e.

13 Enmapuche xa hara n̂esenmekyatken̂e xa hara noro re yepamtho yantoman̂e komo, tîmsom pokono komo, Repita komo, ero wara n̂esenmekyatken̂e. Estras yaka n̂esenmekyatken̂e xa hara. Kpanatanmetopo n̂encetken̂e xa hara.

14 On wara tak n̂een̂atken̂e Kaan ya kpanatanmetopo, Moises ya kekn̂e Kporin komo ero rma, 7-nhîrî nuun̂i po mîîmoci yaw mak enmacoko. Ero yimaw marha ahwotacoko, kacho n̂een̂atken̂e.

15 On wara kacho marha n̂een̂atken̂e, Ahnoro men Ixaw Yana komo antomacoko mîn hak pono komo, ewto pono komo, Xerusaren pono komo marha. On wara kacoko yîwya so, Îh pona so etocoko oripera peremru kotoso, sambuxeru peremru, muhta peremru, kuum yarî warai, ahce na komo peremru, taakem komo peremru, ero warai komo kotoso etocoko amîn me so ciisom, kacho n̂encetken̂e.

16 Ero ke tak îh pona cetken̂e Ixaw Yana komo ero yipu peremru kotoso. Ewto pona n̂enmekyatken̂e yîhkotoxapu. Tîmîn me so n̂iir̂atken̂e. Tîmînî ro meretwo so n̂iir̂atken̂e anarî komo, tîmîn roron pona so n̂iir̂atken̂e anarî kom hara. Kaan mîn roron pona n̂iir̂atken̂e anarî kom hara. Tuuna Metatan roron pona n̂iir̂atken̂e anarî komo, Eprain Metatan roron pona n̂iir̂atken̂e anarî kom hara. Ero wa so tîmîn komo n̂iir̂atken̂e.

17 Ero ke ero wa xatken̂e ahnoro waapa narîthonho komo, mohxapu kom hara, n̂examro tak tîmîn komo n̂iir̂atken̂e mîîmoci mko. Ero yaw tak n̂enmayatken̂e. Pahxa makî tko ero warai yaw n̂enmayatken̂e pahxan pen komo Xoswe pen exitaw mak. Ero yinhîrî ero warai yaw enmapîra ro mak tak xatken̂e Ixaw Yana komo pahkî okwe. Estras nîmtapotaretho yencetaw mak tak ero yipu yaw n̂enmayatken̂e xa hara. Ero wara enmayataw so tahwore xa tak xatken̂e.

18 Enmar̂atîxera Kaan ya kpanatanmetopo nîmtapotarekn̂e Estras ahwotacho komo cenatîso ro. 7 kaamo nahwowatken̂e. 8-nhîrî me enmayataw hara Kaan yaka takî tî n̂esenmekyatken̂e xa hara. Kaan Karitan kesî ero yaw roro rma n̂esenmekyatken̂e. Ero wa xatken̂e.