Ero yinhîrî tak on wara xatken̂e Xutew komo rma, yipici komo marha, kicicme so tak nîmtapowatken̂e tîyanan komo poko rma. Cerewre ro mak nîmtapowatken̂e.

2 On wara ketken̂e anarî komo, Mer̂pora nas amna, amna mumuru komo, amna yemsîrî komo marha. Ero ke tîto xe thakwa nas amna mararî pono yeperîrî wece waipîra amna yehtome okwe, ketken̂e tî.

3 On wara ketken̂e anarî kom hara, Puranta amna naponukyakn̂e tupurantayem komo yai tînahrî yepetho. Ero pona tak amna naponukyakn̂e rooma poko amna yexirî ke thakwa okwe. Tîmn̂enhîrî purantantho yîramanpîra thakwa nas amna. Ero ke amna mararîntho thakwa nahsîyaxe okwe, amna natîtho marha, amna mîntho marha, ketken̂e okwe.

4 On wara ketken̂e anarî komo xa hara, Puranta marha amna naponukyakn̂e tupurantayem komo yai kayaritomo purantan tîmtome. Ero ke amna purantanman̂enho komo tak nahsîyaxe amna yekenho okwe, amna natîtho marha uupa yepu okwe.

5 Etîme re rma tko nas amna pun, amna yanan pun. Amna xîkrî naxe n̂examro xîkrî wara xa marha. Wara rma amna mumuru komo tak nahsîyaxe tanton komo me. Nahsîce rma amna yemsîrî komo. Ahce pona thakwa re cemsîrî nahsîya hara amna? Anarî komo nahsîce okwe amna yekenho, amna natîtho marha nahsîce uupa yepu, ketken̂e tî.

6 Ero yipu yentache kîrwonakn̂e xa tak, okwe, okwe, kacho yentache yîwya so.

7 Ero ke owero ro tak kesehtînoyakn̂e. Ero yinhîrî tak kayaritomo komo weiyakn̂e, antomano rin̂e komo marha weiyakn̂e. On wara wîîkekn̂e yîwya so, Apurantan komo mîmyatu awakno komo ya, epethîrî pona makî tko mîmyaxe. Apurantan poko ehtopo komo yepetho mahsîyaxe awakno komo yemyawnonho rma kica, wîîkekn̂e yîwya so. Ero yinhîrî tak enmekno wiir̂akn̂e ahnoro Xutew komo.

8 Mohtîkache so on wara tak wîîkekn̂e yîwya so, Ai oyakno komo, on wara xatken̂e kyanan komo, Xutew kom ha, n̂examro pen nahsîyatken̂e mîk hak rowon pono komo epethîrî pona. Tanton me so nahsîyatken̂e. N̂examro amna nowye hara oona ehtome hara. N̂examro tko mahsîyaxe amyamro hara kica awanton komo me xa hara kica. Amna katî n̂examro nahsîya amna yanton me hara awya so? wîîkekn̂e yîwya so. Ero ke nîtîtmamyatken̂e mak esenmexapu komo. Eyuhtopo yîhtînopîra ro mak xatken̂e.

9 Ero ke on wara wîîkekn̂e hara yîwya so, Kir̂wanhe exihra ro mak nasî kica ero wara awehtopo komo. Anarî yana komo nîwîrîyakarî me mak taxe kîwyam okwe. Kîîxera men wa naxe okwe. Ero ke twerî men cexpore nasî Kaan poko.

10 On wara tko nas amna takno komo poko, amna nîmyasî puranta yîwya so, puruma yatho marha, sepata yatho marha. Ero wa so nîmyas amna, ow, oyanton komo marha. Ero ke on wara wîîkes awya so, Opurantan poko awehtamci komo tîmcoko hara men amn̂e, kahra takî cma re maxe awakno komo ya.

11 Oroto rma yîramancoko mararînthîrî komo, yînatîthîrî komo uupa yepu, oripa yepu, yîmînthîrî komo, ero yipu komo yîramancoko. Yupurantanthîrî komo marha yîramancoko, puruma yatho, sepata yatho, wooku, katî, ero yipu. Epethîrî me mahsîyatken̂e sentesima wicakî, ero rma yîramancoko hara, wîîkekn̂e yîwya so. Ero wara wîîkekn̂e yîwya so.

12 Ero ke on wara oyeyukyatken̂e, Taa, amna nîramanîya haram. Epethîrî kahra tak nas amna tpoyino komo ya. Amtapotachonhîrî yaw roro rma amna nasî, ketken̂e owya. Ero yinhîrî tîmsom pokono komo wan̂ikyakn̂e hara. On wara wîîkekn̂e yîwya so hara, Ai oyakno komo, ero wara xa marha ehcoko amyamro hara. On wara kacoko ayanan komo ya, Amna marha nîramanîyas hara amna poyino komo yemyawnonho. Yaaro xa tan amna kesî, Kaan n̂entarî me rma, kacoko amyamro rma hara, wîîkekn̂e. Ero ke ero wa xa marha ketken̂e n̂examro hara.

13 Ero yinhîrî tak oponon wupupunkekn̂e. On wara wîîkekn̂e, Ero wa xa marha awen̂epe xe so wasî Kaan ya amînthîrî komo yai, aweken komo yai marha amtapotachonhîrî yaw roro exihra awexitaw so. Ero wara cen̂epesom me men awexi xe so wasî, wîîkekn̂e. Taa, ero wara ham, ketken̂e tak ahnoro esenmexapu komo. Ero yimaw tak Kporin komo poko nahwowatken̂e. Ero yinhîrî tak tîmtapotachonhîrî yaw roro rma xatken̂e. Ero wara xatken̂e.

14 On wara tko wîxakn̂e, oyehtopo tan wekatîmyasî, Xuta pono komo kopenaton me kecir̂akn̂e 20 cimn̂ipu exitaw kayaritomo me Ahtaxexe yehtoponho. 32-nhîrî cimn̂ipu noro exitaw kayaritomo me ehtoponhîrî ero yimaw ketowyakn̂e kopenato me ehxapunhîrî. 12 cimn̂ipu wîxakn̂e kopenato me. Ero wara oyexitaw onahrî yahsîra ro mak wîxakn̂e kopenato komo ya tîmsom ro. Ero yipu yahsîra marha xatken̂e oyakno kom hara. Amna nahrî ro mak amna nahyakn̂e.

15 Ero warahra tî xatken̂e pahxan pen komo, kopenato komo, Oyepetho tîmcoko, ketken̂e rma tî Xutew komo ya. Puruma nahsîyatken̂e yîhyai so, uupa yukun marha, prata marha 40 sikru wicakî so. N̂examro maywen komo meero tî tpoyino komo ya n̂epemapetken̂e kica. Ero warahra reha wîxakn̂e ow Kaan poko twerî xa oyexirî ke.

16 Waaca ciitopo poko makî reha wîxakn̂e ow. Ero wa xa marha xatken̂e omaywen kom hara, iina re mokyatken̂e cetapickachome so mak. Tîrowonî ro yahsîra ro mak xakn̂e amna epethîrî pona.

17 On wara marha wîxakn̂e, mer̂pora Xutew komo werewusmekn̂e ohyaw rma, 150. Antomano rin̂e komo rma mîkyam xatken̂e anarî komo mak. Anarî rowon pononho komo marha werewusmekn̂e amna cheka mohxapu, amna mîtwononho kom ha.

18 On wicakî oyotî nupur̂atken̂e omaywen komo enmar̂atîxera okno pun, paaka cewn̂e, oper̂a 6, kapikara warai marha yaake. Owokru marha n̂iir̂atken̂e roro anarmerpan, 10 ro enmapuche roro n̂iir̂atken̂e xa hara. Wara rma onahrî men tîmcoko owya kopenato me oyexirî ke, kahra ro mak wîxakn̂e Xutew komo ya. N̂esemetanmekyatken̂e thakwa n̂examro. Ero ke ero wa kahra wîxakn̂e.

19 Apa Kaan, on wara cma re wîîkes awya, oyehtoponho cma re yîhcamnopîra masî. Xutew komo wakronomesî roro. Ero ke ero wa oyehtopo ponaro cma re masî oyakronomachome amn̂e, wîîkekn̂e. Ero wa wîîkekn̂e Kaan ya.