On wara kacho tko tî n̂encekn̂e Sambarace, Xerusaren wacan tak n̂iir̂axe Xutew komo, kacho tî n̂encekn̂e. Ero ke takî tî nîrwonakn̂e. Xutew komo poko tî n̂etaporekn̂e.

2 Tîyanan komo n̂entarî me tî nîmtapowakn̂e, sowtatu komo n̂entarî me marha, Samaria pono komo n̂entarî me. On wara tî kekn̂e yîwya so, Ahce wa n̂iir̂atu Xutew komo kopi? Kar̂pentho komo ro mak mîkyam. Twacan komo ma re n̂iir̂atu tîwya so? Kporin komo ya tîmsom ma re nakn̂iyat ha tîwya so? Ewto wacan ma re n̂iitîketu ooro ha? Toopu ma re n̂enmekyatu yukpurukpurunthîrî chewnonho hara? Ecahxaputho ma re n̂iir̂atu twacan komo me? kekn̂e tî.

3 Iito tî xakn̂e Tobias, Amonita. On wara tî kekn̂e noro hara. Waaca na re n̂iir̂atu toh ke, cemacakaxmu mak tko kica. Rokohci cetaw rma yin̂irithîrî komo pore macakes okwe, kekn̂e tî kica.

4 Kaan yakro makî tko kîmtapowakn̂e. On wara wîîkekn̂e, Apa kah yawno, yîmtapotarî komo cma re mencesî amna yîwîrîyakacho. N̂examro cma re mîwîrîmesî, amna poko kexe ero wa kacho yaw roro rma. Waapa komo ya n̂examro arpoko anarî yana komo rowon pona mokuhnî me hara.

5 Kicicme ehtoponhîrî komo cma re ahrura masî. Ero wa ehtoponhîrî komo yîhcamnopîra esko an̂enîrî pîn me. Amoro xa arwonmekyatken̂e waaca ciin̂e komo n̂entarî me rma, wîîkekn̂e. Ero wa wîîkekn̂e Kaan ya.

6 Ero yinhîrî waaca poko rma amna xakn̂e. Cetahruso tak xakn̂e waaca yîhkotonhîrî me ehxapunhîrî. Cewn̂an me mak tak xakn̂e, kawra mak ha tko ka, metace mak xakn̂e kawnon. Cetapickacho komo ponaro xa xatken̂e Xutew komo. Ero ke yohno rma n̂iir̂atken̂e.

7 Ero yinhîrî takî tî amna yekaci n̂encetken̂e xa hara Sambarace, Tobias komo, Arabe komo, Amonita komo, Astocita komo. Ero warai komo tî n̂encetken̂e. Xerusaren wacan n̂iir̂atu rma Xutew komo. Yîhkotonhîrî me exihra tak nai okwe, kacho tî n̂encetken̂e. Ero ke tî nîrwonatken̂e xa okwe.

8 N̂esencetken̂e takî tî Xerusaren pono komo waparî me tmohtopo komo poko. Amna ciri xe xatken̂e waaca cirirî yarohra thakwa okwe.

9 Amna tko nîmtapowakn̂e Kaan yakro, ponaro amna yehtopo yakro. Waapa yekaiporen̂e me tak amna n̂iir̂akn̂e anarî komo. Katpanaw tî n̂een̂atken̂e, kosope marha, waapa yekaiporetome mokyataw so.

10 Ero yinhîrî tak on wara ketken̂e Xuta komo, Okwe, n̂ekar̂kexe ro mak tak cetapickaxmu komo. Mer̂pora ro mak nasî yukpurukpuruntho okwe. Ero ke ecirpora ro mak nasî waaca okwe amna ya, ketken̂e.

11 On wara tî ketken̂e amna xatî pîn kom hara, Kenîhra ro mak mexe naxe Xutew komo. Amna mohtopo marha entara naxe. Yuu yuu, kacho mak n̂encexe amn̂e kîwtoche so waparî komo me. N̂examro pen waihkache tak kîwya so ewto wacan cirihra kr̂a tak naxe, ketken̂e okwe.

12 Ero yinhîrî tak amna yaka mokyatken̂e Sambarace mîtwono komo. Xutew komo rma mîkyam mokyatken̂e. On wara ketken̂e amna ya, Ahna so na awcetaw so en̂exa rma men mokyaxe awaparî komo kopi, ketken̂e roro amna ya. 10 ro ero wara ketken̂e amna ya kica.

13 Ero ke omaywen komo wen̂epekn̂e waaca mkai waapa yekaiporen̂e me. Puhyakanî mkai wen̂epekn̂e waaca mkai. Waaca yewtarî yaka so wen̂epekn̂e. Noro re me cehsom komo rma wantomekn̂e iito re cehsom komo kurunpen̂e me. Ero wa antomano wiir̂akn̂e miya roro. On wara wîîkekn̂e yîwya so, Akurun komo ke cemyarke so ehcoko, kacipara imo ke, rah ke, krapa ke, ero yipu ke cemyarke so ehcoko, wîîkekn̂e yîwya so.

14 Ero yinhîrî cetapickaxmu komo ween̂akn̂e. Kawomyakn̂e, kîmtapowakn̂e tak enîn̂e komo yakro, antoman̂e komo yakro. Yînantomarî komo ya marha wîîkekn̂e, Ai oyakno komo, wîîkekn̂e, kîîxatî pîn komo pona erasîra men ehcoko. Kporin komo ponaro mak xa ehcoko. Kyopono ro xa Mîk ha, yukurumîkno ro xa. Ero ke waapa mokyataw etar̂macoko awakno komo yukurunpetome, amumuru komo, awemsîrî komo, apici komo, amîn komo, ero warai komo yukurunpetome etar̂macoko waapa komo mokyataw, wîîkekn̂e yîwya so.

15 Ero yinhîrî takî tî on wara kacho n̂encetken̂e amna xatî pîn komo, Waapa me kîwtotopo tî n̂encetken̂e okwe Xutew komo. Knîhtînoputhîrî komo poko kehn̂anmecow so Kaan okwe, kacho tî n̂encetken̂e. Ero ke amna cekn̂e cemyawno ro ciiso xa hara.

16 On wara tko xatken̂e onantomarî komo, metace wicakî mak xatken̂e waaca pokono me. Metace xa hara xatken̂e n̂examro yukurun komo me hara. Cemyarke so xatken̂e yukurun me cehsom komo rah ke so, cecen̂an ke so, krapa ke so marha. Tponoi so marha xatken̂e kuripara ke. Ero yipu ke tukurui so xatken̂e. Ahnoro Xuta yepamtho komo mkai n̂ecececetken̂e antomano rin̂e komo.

17 On wara marha xatken̂e waaca ciin̂e komo, ahce na yenmekn̂e komo marha, eecome mak n̂etapicketken̂e waaca poko. Eeco ke hara tukurun komo nahsîyatken̂e.

18 Taan̂apotun komo yaro marha tkaciparan komo numunukyatken̂e ahnoro waaca ciin̂e komo. Tuu kan̂e reha wiir̂akn̂e omîtwono ro me mak.

19 On wara wîîkekn̂e enîno rin̂e me cehsom komo ya, antomano rin̂e komo ya marha, Kawno xa on waaca ciisom. Ero ke etmoxe so xa taxe okwe.

20 Ero ke tuu kacho yencetaw awya so iina men amohcoko yohno amna yaka. Kaanî rma tko kukurunpexe so, wîîkekn̂e yîwya so.

21 Ero ke n̂etapickekn̂e rma amna waaca poko. On wara amna xakn̂e, metace kîrkomo raapu nahsîyatken̂e. Enmarî yakro ro nahsîyatken̂e pahkî. Xir̂ko yepataketaw mak tak amna nîtîhkekn̂e hara.

22 On wara marha wîîkekn̂e cetapickaxmu komo ya, Tan mak enmacoko Xerusaren po rma, awanton komo marha. Ero wa ehcoko kukurun komo me awehtome so kosope. Cetapickaxmu me tak maxe enmapuche hara, wîîkekn̂e yîwya so.

23 Ero ke tponon mohkara ro mak xakn̂e amna. Ero wa wîxakn̂e, oyanan komo marha, oyanton komo marha, amna kurunpen̂e komo marha, owenarino komo marha. Amna rma re tponon mohkekn̂e korokachome mak. Ero wara amna xakn̂e.