Taa, ewto wacan ciin̂e komo tan wetahcasî. Oper̂a Metatan n̂iir̂akn̂e Eriasibe, Kaan yaka cewomsom. Tîyanan komo yakro rma tî n̂iir̂atken̂e, tîmsom pokono komo yakro. Ciriche Kaan ya nîmyatken̂e tîn̂irithîrî komo. Metata yahruru marha tî nakriyatken̂e. Ewto wacan marha n̂iir̂atken̂e mîîmoci yaka roro, Mea kacho yaka. Ciriche ero marha nîmyatken̂e Kaan ya. Ero yinhîrî waaca n̂iir̂atken̂e rma miya roro anarî mîîmoci yaka roro, Ananew Mîn, kacho yaka ha.

2 Eriasibe mehxa tak waaca n̂iir̂atken̂e Xer̂ko pono kom hara. N̂examro mehxa tak n̂iir̂akn̂e Saku hara, Inhi mumuru.

3 Ootî Metatan n̂iir̂atken̂e Asenaa mumuru kom hara. Ero mapatan n̂iir̂atken̂e, metatan marha nakriyatken̂e, ewkacho marha n̂iir̂atken̂e, ecehtotopo marha. Ero wa n̂iir̂atken̂e n̂examro.

4 N̂examro mehxa tak n̂iir̂akn̂e Meremoce hara, Urias mumuru mîk noro, Kos mumuru tî mîk xakn̂e Urias. N̂examro mehxa n̂iir̂akn̂e Mesuraw hara Berekias mumuru, Berekias tî xakn̂e Mesesabeew mumuru hara. N̂examro mehxa n̂iir̂akn̂e Satoke hara, Baana mumuru mîk ha.

5 N̂examro mehxa tak n̂iir̂atken̂e Tekoa pono kom hara. N̂examro yantoman̂e komo tko ekaritora xatken̂e Tporin komo ya tantomacho komo poko okwe.

6 Pahxantho kacho tak n̂iir̂akn̂e Xoiata, metata yosotî rma mîn Pahxantho kacho. Paseia mumuru mîk ha, Mesuraw yakro n̂iir̂atken̂e, Besocias mumuru yakro. Mapatan n̂iir̂atken̂e, ahruru marha nakriyatken̂e, ewkacho n̂iir̂atken̂e, ecehtotopo marha. Ero wa n̂iir̂atken̂e.

7 N̂examro mehxa n̂iir̂atken̂e anarî kom hara, Meracias, Xibeon pono, Xaton, Merono pono. Xibeon pono komo mîkyam, Mispa pono komo marha mîkyam, mîîmo nakir̂wametken̂e n̂examro, tuuna yepu xehxan komo kopenato mîn ha.

8 N̂examro mehxa n̂iir̂akn̂e Usiew hara, Araias mumuru ha. Ooru pokono ro komo yakrono tî mîk xakn̂e Araias. Usiew mehxa n̂iir̂akn̂e Ananias hara, kotoporem ciin̂e ro. Xerusaren wacan n̂iir̂atken̂e n̂examro tamtakem yaka roro waaca yaka.

9 N̂examro mehxa n̂iir̂akn̂e Hepaias hara, Uru mumuru mîk ha. Xerusaren pono komo yantoman̂e mîk xakn̂e Hepaias, etpoyino komo yantoman̂e mak.

10 N̂examro mehxa n̂iir̂akn̂e Xetaias hara, Arumape mumuru ha. Tîmîn yecentono rma n̂iir̂akn̂e waaca. Noro mehxa n̂iir̂akn̂e Atus hara, Asabneias mumuru ha.

11 N̂examro mehxa n̂iir̂akn̂e Mawkias hara, Arin mumuru ha. Asube yakro rma n̂iir̂atken̂e, Paace-Moabe mumuru yakro. Mîîmo marha n̂iir̂atken̂e n̂examro kawno. Wehto Yen Mîn, kacho mîn xakn̂e.

12 Noro mehxa n̂iir̂akn̂e Sarun hara. Aroes mumuru mîk ha. Cemsîrî komo yakro rma tî n̂iir̂atken̂e. Xerusaren pono komo yantoman̂e mîk xakn̂e Sarun, yîraconhîrî komo yantoman̂e ha.

13 Anarî metata n̂iir̂akn̂e Anun hara, aporî yesamarî yakan ha. Sanoa pono komo yakro n̂iir̂atken̂e. Metata mapatan n̂iir̂atken̂e, ahruru marha nakriyatken̂e, ewkacho n̂iir̂atken̂e, ecehtotopo marha. Waaca marha n̂iir̂atken̂e 450 metru wicakî kawnon ha. Yukpurukpurun Metatan yaka roro tî waaca n̂iir̂atken̂e.

14 Yukpurukpuruntho Metatan n̂iir̂akn̂e Mawkias hara Hekabe mumuru ha. Ero yaporwan n̂iir̂akn̂e, ahruru marha, ewkacho n̂iir̂akn̂e, ecehtotopo marha, ero wara n̂iir̂akn̂e. Bece-Akeren pono komo yantoman̂e mîk xakn̂e Mawkias.

15 Tuuna Pîtho Metatan n̂iir̂akn̂e Sarun, Cor-Ose mumuru ha. Ero yaporwan n̂iir̂akn̂e, nîmînmekn̂e marha, ahruru nakriyakn̂e, ewkacho n̂iir̂akn̂e, ecehtotopo marha. Ero wa n̂iir̂akn̂e Sarun. Mispa pono komo yantoman̂e mîk xakn̂e. Tuuna wacan marha n̂iir̂akn̂e noro Asera kacho wacan. Kayaritomo natîrî mîtwono mîn n̂iir̂akn̂e tuuna wacan. Miya roro n̂iir̂akn̂e ehyu pona roro, Tapi pen Yewtontho yakan pona roro.

16 Noro mkai waaca n̂iir̂akn̂e Neemias hara, Asbuke mumuru ha. Bece-Suu pono komo yantoman̂e mîk Neemias, yîraconhîrî komo yantoman̂e mak. Waaca n̂iir̂akn̂e noro, Tapi yanan komo yocho yecento roro. Tuuna yaka roro n̂iir̂akn̂e wahkotoxapu yaka roro. Karitî komo mîn yaka roro marha n̂iir̂akn̂e. Ero wicakî waaca n̂iir̂akn̂e noro.

17 Neemias mehxa n̂iir̂atken̂e Repita kom hara. Heun xakn̂e n̂examro yantoman̂e me, Bani mumuru ha. Noro mehxa n̂iir̂akn̂e Asabias hara. Keira pono komo yantoman̂e mîk xakn̂e, yîraconhîrî yantoman̂e mak.

18 Noro mehxa n̂iir̂atken̂e n̂examro yanan komo hara. Bapai xakn̂e n̂examro yantoman̂e me, Enatace mumuru ha. Keira pono komo yantoman̂e marha mîk xakn̂e Bapai, anarî komo yantoman̂e mak, yîraconhîrî yantoman̂e mak.

19 Noro mehxa n̂iir̂akn̂e Ese hara, Xesua mumuru. Mispa pono komo yantoman̂e mîk xakn̂e. Kawomtopo pona roro n̂iir̂akn̂e Kukurun Mîn pona roro. Iito nasî Kukurun Mîn waaca yeknu mîtwo.

20 Noro mehxa n̂iir̂akn̂e Baruke hara, Sabai mumuru. Takîhso xa n̂iir̂akn̂e noro. Waaca yecetî yaino n̂iir̂akn̂e Eriasibe mîn metatan yaka roro, Kaan yaka cewomsom mîn metatan yaka ha.

21 Noro mehxa n̂iir̂akn̂e Meremoce hara, Urias mumuru mîk, Kos parî ha. Eriasibe mîn metatan yai n̂iir̂akn̂e noro Eriasibe mîn mapitaka roro.

22 Noro mehxa n̂iir̂atken̂e tîmsom pokono kom hara. Woskara pono komo mîkyam iitono n̂iir̂atken̂e.

23 N̂examro mehxa n̂iir̂akn̂e Benxamin hara. Asube yakro n̂iir̂atken̂e. Tîmîn komo yecentono n̂iir̂atken̂e. N̂examro mehxa n̂iir̂akn̂e Asarias hara, Maaseias mumuru mîk, Ananias parî ha. Tîmîn yecentono marha noro n̂iir̂akn̂e.

24 Noro mehxa n̂iir̂akn̂e Binui hara, Enatace mumuru ha. Asarias mîn yecentono yai n̂iir̂akn̂e waaca yecetî yaka roro, waaca yeknutawno pona roro ha.

25 Waaca yecetî mîtwono n̂iir̂akn̂e Paraw hara, Usai mumuru ha. Mîîmoci marha n̂iir̂akn̂e kayaritomo mîn mîtwono, îh pono mîtwono ha. Kahrutopo roron mîtwono mîn kayaritomo mîn, waaca yeknutaw xakn̂e. Iitono n̂iir̂akn̂e Paraw. Noro mehxa n̂iir̂akn̂e Petaias hara, Paros mumuru ha.

26 Repita yanton komo marha xatken̂e waaca poko, Opew pono kom ha. Tuuna metatan yaka roro n̂iir̂atken̂e resce n̂ixan yaka roro. Mîîmo marha n̂iir̂atken̂e tmeretpociciyem. Ero yipu n̂iir̂atken̂e.

27 N̂examro mkai n̂iir̂atken̂e Tekoa pono kom hara. Tmeretpociciyem yai n̂iir̂atken̂e Opew wacan yaka roro.

28 Kawaru Metatan mehxa n̂iir̂atken̂e tîmsom pokono komo. Tîmînî ro yecento so waaca n̂iir̂atken̂e.

29 N̂examro mehxa n̂iir̂akn̂e Satoke hara, Ime mumuru. Tîmîn yecentono marha n̂iir̂akn̂e. Noro mehxa n̂iir̂akn̂e Semaias hara, Sekanias mumuru. Metata yenîn̂e mîk xakn̂e Semaias, resce n̂ixan yenîn̂e.

30 Noro mehxa n̂iir̂akn̂e Ananias hara, Seremias mumuru. Anatono n̂iir̂akn̂e Anun hara. Sarape mumuru komo poyino mîk xakn̂e Anun, 6-înhîrî ha. Noro mehxa n̂iir̂akn̂e Mesuraw hara, Berekias mumuru. Tîmîn yecentono n̂iir̂akn̂e.

31 Noro mkai n̂iir̂akn̂e Mawkias hara, ooru pokono ro. Repita yanton komo mîn yaka roro n̂iir̂akn̂e, twarawantaxmu mîn yaka roro marha. Mipkace metatan yecentono mîn twarawantaxmu mîn. Miya roro marha noro n̂iir̂akn̂e, amtakpo yaka roro, waaca yeknutawno yaka roro ha.

32 Amtakpo mehxa n̂iir̂atken̂e ooru pokono kom hara. Waaca pono mîn amtakpo. Twarawantaxmu komo yakro iitono n̂iir̂atken̂e. Eknutawno yai n̂iir̂atken̂e Oper̂a Metatan yaka roro hara. Ero wa so xatken̂e Xerusaren wacan ciin̂e komo.