Ero yinhîrî tak, 20 cimn̂ipu tak xakn̂e kayaritomo me Ahtaxexe yehtoponho, Nisan tî xakn̂e nuun̂i yosotî. Ero po tak uupa yukun n̂ekyatken̂e ciin̂e ro komo. Ero ke kayaritomo wokru tak wanîmyakn̂e, yîwya wîmyakn̂e. Ewyahwora tko wîxakn̂e ero yimaw. Ahwora exihnînhîrî ro mak ow kayaritomo yakro oyexitaw.

2 Ero ke on wara kekn̂e kayaritomo owya, Ai, ahce kacho ahwora mai ham okwe? Okohme exihra cma re keen̂asî. Ahwora mak mai okwe, kekn̂e owya. Ero yipu yentache keraswakn̂e ro mak tak.

3 On wara wîîkekn̂e kayaritomo ya, Apa, pahkî kayaritomo me awexi xe wasî eroromero. Ahce wa thakwa re tahwore wai? Cecahso tî nai oyewtontho. Ero metatan marha tî nai cecahso okwe. Iito thakwa nasî oporin pen komo yochotho, wîîkekn̂e yîwya.

4 On wara tak kekn̂e kayaritomo owya, Ai ha, taa, ahce xe tak mai ha? kekn̂e owya. Ero ke kîmtapowakn̂e tak Kaan yakro kah yawno yakro.

5 Ero yinhîrî on wara wîîkekn̂e kayaritomo ya, Apa, On wara cma re wîîkes awya, tawake awexitaw opoko, Xuta yepamtho komo rowon pona cma re ow men̂epesî, oporin pen komo yocho yeken pona. Oyewtontho ciri xe xa hara wasî, wîîkekn̂e.

6 Ero ke kayaritomo oyeyukyakn̂e. Iito rma xakn̂e yipici kayaritomo panaw rma ceremaxi. On wara kekn̂e kayaritomo owya, Atî wicakî pahkî awto xe mai ha? Ahcemaw xa mîmokya hara oona? kekn̂e owya. Oyen̂epe xe rma xakn̂e ham kayaritomo. Ero ke omohtopo wukuknomekn̂e yîn̂entarî me.

7 On wara wîîkekn̂e, On wara marha cma re wîîkes awya, akaritanî cma re marpes owya, meyeno komo yakan ha, tuuna yepu mehxan komo kopenaton yakan. On wara kacho cma re mîmewresî, Neemias moso xehxa toxapu. Noro men tompe ahyari so Xuta yepamtho komo rowon pona roro, kacho cma re marpesî.

8 Anarî cma re marpes owya akaritan Asape yakan hara, kayaritomo comotan yenîn̂e yakan ha. On wara kacho cma re mîmewresî, Neemias moso. Noro ya men tîmko weewe, sowtatu mîn metatan me ciisom, Kaan mîn mîtwono metatan me ciisom, ewto wacan yaporwan me ciisom, omîn me ciisom marha, kacho cma re mîmewresî yîhyaka, wîîkekn̂e. Ero wa wîîkekn̂e kayaritomo ya. Ero ke, Taa, ero wara mewre ham, kekn̂e kayaritomo owya oyakronoman̂e me exirî ke Kaan.

9 Ero yinhîrî tak kîwcekn̂e kopenato komo yaka, tuuna yepu mehxan komo yaka. Yîwya so wîmyakn̂e kayaritomo karitan. Sowtatu yantoman̂e komo yakro rma kîwcekn̂e, kayaritomo yanme mohxapu yakro. Sowtatu komo marha n̂en̂epekn̂e kayaritomo okurun me, kawaru mkaw tîtosom kom ha. Ero wara amna cekn̂e.

10 Ero yimaw tak tî oyekaci n̂encekn̂e Sambarace, Oronita mîkî, Tobias marha tî n̂encekn̂e, Amonita mîkî. Centaporera ro makî tî amna mohtopo n̂encetken̂e, Ixaw Yana komo yakronoman̂e tî mokye, kacho ha. Ero wara kacho tî n̂encetken̂e kicicme ro mak okwe.

11-12 Taa, iito ka wîxakn̂e Xerusaren po 3 kaamo mak ha ka. Ero yinhîrî tak ewtotho yenso kîwcekn̂e kosope rma. Asak mak waar̂akn̂e kîrkomo oyakro. Xerusaren po oyexitaw on wara men ciri xe wasî. Kaanî rma ero wa kacho nîhtînomexpo owya, kahra ka wîxakn̂e iitono komo ya. Yaake okno marha arîhra wîxakn̂e. Yîmkaw owtotopo mak waar̂akn̂e.

13 Kosope kîwcekn̂e metata yaro, Woskara Yesamarî yakan yaro. Tuuna kwaka kîwcekn̂e ahtoxapu kwaka. Okoyi Tunarî, kacho tî mîn xakn̂e. Yukpurukpuruntho yaatopo yaro marha kîwcekn̂e metata yaro. En̂exa rma tak Xerusaren wacantho ween̂akn̂e. Tmoruhrakatîkaxi thakwa xakn̂e okwe. Cecahso marha ween̂akn̂e metatanthîrî okwe.

14 Ero yinhîrî tak Tuuna Pîtho Metatan yaka kîwcekn̂e hara. N̂ikitho yenso marha kîwcekn̂e, kayaritomo tunarî me tî xakn̂e ero yenso. Tahruso thakwa tak xakn̂e esamatho okwe. Oyoku torî yarohra thakwa xakn̂e okwe.

15 Ero yinhîrî tak aporî yecihtari kîwcekn̂e hara. Kosope rma kîwcekn̂e. En̂exa ewto wacantho ween̂akn̂e xa hara. Ero yinhîrî tak ketîramekn̂e hara ewto pona. Woskara Yesamarî yakan yaro kepatakekn̂e ewto pona hara.

16 Owtotopo yenîhra ro mak xatken̂e antomano rin̂e komo. Ewtotho yenso tomo noro, kacho yentara marha xatken̂e opoko. Xutew komo ya owtotopo yekatîmra ro makî ka wîxakn̂e. Tîmsom pokono komo ya ekatîmra wîxakn̂e, kayaritomo me cehsom komo ya, sowtatu yantoman̂e komo ya, cetapickaxmu komo ya, noro yipu komo ya ekatîmra ro mak wîxakn̂e owtotopo.

17 Ero yinhîrî tak on wara wîîkekn̂e yîwya so iitono komo ya, Oyakno komo, on wara wîîkes awya so, cesemetanmekyaxe ro mak tan okwe. Yixirorî ro me mak nas okwe on Xerusarentho, ewtotho okwe. Cecahso marha nas waaca metatantho. Ero ke on wara cma re wîîkes awya so, ciicerî hara ewto wacan. Ciriche tak kîîxatî pîn komo nîwîrîyakarî me exihra tak taxe, wîîkekn̂e yîwya so.

18 Kaan ya oyakronomachonho marha wekatîmyakn̂e yîwya so, kayaritomo mtapotachonho marha. Ero ke on wara ketken̂e owya, Taa, ero wa ham, ciir̂at haram, ketken̂e owya. Ero ke tak ewto wacan ciitopo ponaro xa tak xatken̂e, ero poko cekaritotopo komo ponaro ha.

19 Ero yinhîrî takî tî amna mîtwono komo n̂encetken̂e ewto wacan ciitopo. Ero ke amna poko tî n̂ewretken̂e. Sambarace Oronita, Tobias Amonita, Xesen Arabe, ero wara tî xatken̂e amna poko cewresom komo. Amna nîwîrîyaketken̂e ro mak. On wara ketken̂e amna ya, Ai, ahce poko kyam matu iito? Kayaritomo kyam na manwekyat hara amn̂e? ketken̂e amna ya.

20 On wara mak tko weyukyakn̂e, Kaan xa nas amna yakronoman̂e me, kah yawno ha. Ehn̂an me amna n̂iir̂asî. Noro yanton xa amna. Ero ke tak on waaca poko nas amna mak ha. Awewton komo mera ro mak nas on Xerusaren, aporin pen komo exihra ro makî tî xatken̂e on po, wîîkekn̂e mak yîwya so. Ero wara wîîkekn̂e.