Ero yinhîrî takî tî amna yekaci n̂encetken̂e xa hara amna xatî pîn komo. Sambarace, Tobias, Xesen, Arabia pono mîkî, ero wara xatken̂e entan̂e komo. Amna xatî pîn komo ahnoro tî n̂encetken̂e. On wara kacho tî n̂encetken̂e, Xerusaren wacan takî tî n̂iitîketu Neemias komo. Ewtara n̂he takî tî nai okwe, kacho tî mîn n̂encetken̂e. Waaca metatanî tko ka akrira wîxakn̂e ero yimaw, ewto potarî yahruru ha.

2 Ero ke tîmtapotarî komo yekatîmn̂e n̂en̂epetken̂e Sambarace, Xesen komo, ohyaka. On wara tî ketken̂e, Amna yakro cma re mîmokyasî esentaxi Ono Woskaran pona. Iito cma re cesencesî ewto po, ketken̂e tî. Oyemetanmekî xe makî tko xatken̂e ham okwe.

3 Ero ke on wara kacho yekatîmn̂e wen̂epekn̂e ow hara, Cemyarke ro mak wasî tan yiixe amna yehtopo poko omokrî yarohra thakwa. Ahce kacho on waaca nahsîpînke amna ahyaka so omohtome? Mokuhra men was ha, kacho yekatîmn̂e wen̂epekn̂e.

4 Ketken̂e rma tko emapona. Amohcoko ha men, kacho yekatîmn̂e komo n̂en̂epetken̂e xa hara ohyaka. 4 ro mokyatken̂e. Yihcirî me weyukyakn̂e ero wa xa marha weyukyakn̂e roro.

5 Ero yinhîrî tak tanton n̂en̂epekn̂e xa hara Sambarace. Tîkaritan n̂ekpekn̂e ohyaka mîk hak n̂enîrî. 5-nhîrî tak mîn xakn̂e tîmtapotarî yekatîmtopo.

6 On wara kekn̂e noro karitan, On wara awehtopo n̂esencesî mîk hak rowon pono komo ya. Xesen marha tî n̂ekatîmmya. On wara tî mai, metowya takî tî kayaritomo maywenînho. Xutew komo yakro rma tî metowyatu. Ero ke tî Xerusaren wacan miir̂atu iitono komo kayaritomonî ro me awecitome hara.

7 Weronomano rin̂e komo marha tî mantomai. Xuta pono komo kayaritomon me tak nas okre Neemias, kacoko amn̂e, mîîkai tî yîwya so. Ero wa kacho men n̂ence amn̂e kayaritomo kopi. Ero ke amok ha men amna yakro esentaxi, kekn̂e karita yaka.

8 Omtapotarî yekatîmn̂e tko wen̂epekn̂e yîhyaka, Ero wara kahra ro mak nas amna. Awanme ro mak ero wa omtapotarî makîhcesî, kacho yekatîmn̂e wen̂epekn̂e.

9 Ero wa amna yeraspe xe xatken̂e kica. Kîmtapotarî komo yanme n̂ekar̂ketîkexe waaca ciitîkara rma, ketken̂e tî amna poko. Ero ke kîmtapowakn̂e tak Kaan yakro, Apa kah yawno, oyamorî cma re mîkaricesî, wîîkekn̂e Kaan ya.

10 Ero yinhîrî tak Semaias yaka kîwcekn̂e, Teraias mumuru yaka. Meetabew mumuru tî mîk xakn̂e Teraias. Tîmîn yawno ro me makî tî mîk xakn̂e etarin. On wara kekn̂e noro owya, Kaika Kaan mîn yaka. Amna marha mokyas iina. Iina kewomuche so metata tahrucerî. Aaxatî pîn komo men mokyaxe awaihkaxi. Kosope rma wa mokyaxe awaikaxi okwe. Ero ke iina kaika, kekn̂e owya.

11 On wara tko noro weyukyakn̂e hara, Erasînî ro mak ow. Ahce kacho re kemahciya hara kica? Owarai komo ma re nîîce Kaan mîn yaka cetkurunpetome? Iina tohra ro mak wasî, wîîkekn̂e yîwya.

12 Ero yimaw tak noro yehtopo wîhtînoyakn̂e. Kaan n̂en̂epetho pînî ro mak moso ham kica, wîîkekn̂e. Tobias yanme mak ero wa nîmtapowakn̂e oyeraspetopo poko, Sambarace komo yanme ha. Epethîrî nîmce ham yîwya ero wa kachome owya.

13 On wara ori xe mak xatken̂e ham Tobias komo, N̂eraswa tak Neemias, kicicme marha na nai. Ero ke kicicme nai N̂eemias kica, enko n̂emahciya, kacho yekaipore xe mak xakn̂e. Ero ke ero warai poko noro nantomekn̂e.

14 On wara tak wîîkekn̂e Kaan ya, Apa kah yawno, kicicme n̂examro yehtoponho cma re yîhcamnopîra masî. Sambarace, Tobias komo. Noacia marha nasî oyeraspe xatî me, weronomano rin̂e mîk noro wooxam ha, anarî komo marha weronomano rin̂e komo ero wara naxe opoko. Ero ke kicicme n̂examro yehtoponho cma re yîhcamnopîra masî. Oyeraspe xe mak naxe okwe, wîîkekn̂e Kaan ya. Ero wa wîîkekn̂e.

15 Taa, ero yinhîrî tak ciitîkaxi xa tak xakn̂e ewto wacan. Eruw nuun̂i po amna n̂iitîkekn̂e, 25-nhîrî kaamo po ha. 52 kaamo mak xakn̂e ciitoponhîrî.

16 Ero yinhîrî tak tî waaca ciitîkacho n̂encetken̂e amna xatî pîn komo. Mîk hak rowon pono komo tî n̂encetken̂e amna mîtwono komo. Ero ke on wara ketken̂e, Cehn̂axmutho mak kîwyam kica, ketken̂e thakwa mak. Kaan yanme mak n̂iice ham, ponaro cehtopo komo yanme mak, ketken̂e marha tîhnaw so.

17 Ero yimaw on wara marha tî xatken̂e Xuta pono komo yantoman̂e kom hara kica, emapona roro tîkaritan komo tî narpetken̂e Tobias yaka. Noro karitan marha tî n̂een̂atken̂e hara emapona roro.

18 Mer̂pora xatken̂e, Kakronomesî ooxe awexitaw, kan̂e komo yîwya. Xuta pono komo rma mîkyam xatken̂e. Sekanias yemsîrî rma xakn̂e Tobias pici me okwe. Ara mumuru tî mîk xakn̂e Sekanias. On wara marha xakn̂e Tobias mumuru hara, Xoanan, Mesuraw yemsîrî nahsîyakn̂e cipici me okwe. Berekias mumuru mîk xakn̂e Mesuraw.

19 Kir̂wan mîk Tobias, kwakren̂e ro okre, ketken̂e n̂examro owya. Ero wara noro yehtoponho n̂ekatîmyatken̂e owya. Omtapotachonho marha tî n̂ekatîmyatken̂e yîwya hara. Emapona roro marha tîkaritan n̂ekpekn̂e Tobias ohyaka oyeraspetome. Ero wara xakn̂e okwe.