Ero yinhîrî takî tî on wara kekn̂e Tapi, Tan tak nas amn̂e Kporin komo Kaan mîn. Tan marha nas amn̂e yîwya tîmsom yakn̂itopo, Ixaw Yana komo nîmrî yakn̂itopo ha, kekn̂e tî.

2 Ero ke anarî yana komo takî tî nan̂ikpekn̂e Tapi Ixaw Yana chewno kom ha. Noro yipu komo tî nantomekn̂e toopu yenporirî poko, Kaan mîn me ciisom yenporirî poko ha.

3 Pehu marha tî n̂enmekyakn̂e Tapi mer̂pora ro mak ha potupoture me ciisom, waaca metatan wotopo me ciisom ha, weewe wotopo me ciisom marha. Bronse marha tî n̂enmekyakn̂e mer̂pora ro mak, yukuknomarî yopo ro mak ha.

4 Setru yepu marha tî n̂enmekyakn̂e. Ero tî n̂ekyatken̂e Siton pono komo, Ciru pono komo marha. Mer̂pora tî n̂ekyatken̂e yîhyaka.

5 On wara tî kekn̂e Tapi, Kar̂pamxan me makî ka nai omumuru Saromaw. Ahce na poko ka ehcamhokara nai. Kir̂wan̂he ro xa mak cirpore nai Kporin komo mîn. Cekacaxmu me xa ehtome mîk hak rowon pono komo n̂entarî me. Ero ke ero me ciisom ka wenmekyasî, kekn̂e tî. Ero ke mer̂pora ro makî tî ero yipu n̂enmekyakn̂e Tapi twaipîrarî ka.

6 Ero yinhîr̂î takî tî tumumuru nan̂ikyakn̂e Tapi, Saromaw. Noro tî nantomekn̂e Kporin komo mîn ciitopo poko, ponaro Ixaw komo yehtopo mîn ciitopo poko ha.

7 On wara tî kekn̂e Tapi yîwya, Okopuci, on wara wîîkes awya, Kporin komo mîn ciri xe cma re wîxakn̂e ow, ponaro oyehtopo mîn. Noro yosotî yeken me ciri xe wîxakn̂e.

8 On wara tko wencekn̂e Kporin komo mtapotarî, Mer̂pora ro mak metar̂mekn̂e amoro, mer̂pono pîn pen komo waihkan̂enho amoro. Ero ke omîn cirihra esko amoro mer̂pora kamxuku yen̂epen̂enho me awexirî ke. Owero ro rma men̂epekn̂e kamxukuthîri komo.

9 Amn̂e tak amumuru n̂ewruyasî anarî hara. Noro tak nasî etar̂man me reha. Yiixatî pîn komo wiir̂asî twerî noro poko. Saromaw me osohtocoko. Ero wa osohtocoko ahwokan me Ixaw Yana komo cirirî ke owya, etar̂man me cirirî ke marha. Kayaritomo me exitaw noro ero wa Ixaw Yana komo wiir̂asî.

10 Noro tak omîn n̂iir̂asî, Kporin komo mîn, kacho ha. Omumuru me xa nasî, noro yîîm me was Ow hara. Noro yepamtho komo wiir̂as hara amn̂e Ixaw Yana komo kayaritomon me miya roro eroromero, kekn̂e owya.

11 Ero ke on wara wîîkes awya okopuci, awakronoman̂e me exi xe wasî Kporin komo ehn̂an me ro mak awehtome. Kporin komo mîn ciri xe was awya, ponaro awehtopo mîn. Yîmtapotachonhîrî yaw roro rma ciri xe was awya.

12 Kporin komo ya xa awiri xe wasî takîhso, yuhnari yîhtînon̂e me marha. Ero ke Ixaw Yana komo kayaritomon me awiriche yîwya Kporin komo ya kpanatanmetopo mewehcasî, ponaro awehtopo mtapotachonho ha.

13 Ero yewehcataw awya ehn̂an me masî. Ero ke kpanatanmetopo men ewetko. Kporin komo kekn̂e Moises pen ya Ixaw Yana komo ya yîn̂entamexporî ero men ewetko. Kar̂pe esko, ahwokan me marha. Erasîn me mak esko, ahwokara ro mak ha.

14 Kporin komo mîn me ciisom wenmekye mer̂pora ro mak. Ooru wenmekye 100 miw tarentu wicakî. Prata marha wenmekye 100.000 tarentu wicakî. Bronse marha wenmekye, pehu marha. Yukuknomarî yopo ro mak ero yipu wenmekye. Sahsamaxapu marha wenmekye, toopu marha. Ero yipu na mîhremetîke hara amn̂e.

15 Cetapickaxmu komo marha naxe mer̂pono pîn, anantomarî komo. Toopu pokono komo naxe, weewe pokono komo marha. Mîn hak ciin̂e komo naxe, yaana me ciin̂e kom ha.

16 Ooru naxe, prata marha, bronse marha, pehu marha. Ero yipu komo nai ahyaw mer̂pono pîn. Yukuknomarî yopo ro mak nasî. Ero ke ero poko tak esko. Awakronoma xe wasî Kporin komo ya, kekn̂e tî. Ero wa tî kekn̂e Tapi tumumuru ya, Saromaw ya.

17-18 Ero yinhîrî Ixaw Yana komo yantoman̂e komo tî nantomekn̂e Tapi Saromaw yakronomacho poko. On wara tî kekn̂e yîwya so, Kporin komo xa nas awakro so, ponaro awehtopo komo. Awapathîrî komo tak nîtîtmamnoyakn̂e ahnoro. Tantono komo nar̂mapekn̂e Kporin komo owya. Tîtken̂e tak naxe anarî yana komo ahnoro Kporin komo yanme, Noro yanan komo yanme marha.

19 Ero ke Kporin komo yanme awehtopo ponaro men ehcoko. Noro yenî xe ro mak wasî, kacoko. Taa, Kporin komo mîn tak ciicoko, ponaro awehtopo komo mîn. Noro yamatan mîn me ciicoko, yîmtapotarî yen mîn me ha. Mîn hak mîn me ciicoko Kaan ya tîmxapu mîn me. Ero yipu mîn me nasî, Kporin komo yosotî yeken on mîîmo, kacho ha. Ero ke ero yipu mko mîn me ciicoko, kekn̂e tî. Ero wa tî kekn̂e Tapi Ixaw Yana yantoman̂e komo ya.