Ero yinhîrî takî tî poritomo me xa takî xakn̂e Tapi. Ero ke tumumuru takî tî n̂iir̂akn̂e Ixaw Yana komo kayaritomon me, Saromaw ha.

2 On wara marha tî xakn̂e Tapi, Ixaw Yana komo yantoman̂e komo tî nan̂ikpekn̂e, tîmsom pokono komo marha, Repita komo marha.

3 Ero yimaw takî tî Repita komo nukuknometken̂e. On wicakî tî xatken̂e n̂examro kîrkomo, 30 cimn̂ipu ehxapu komo, ero yopono komo marha, 38.000 tî mîkyam xatken̂e.

4 Tîraconkaxi tko tî xatken̂e, 24.000 tî xatken̂e tîmsom pokono me. 6.000 tî xatken̂e tîyanan komo yantoman̂e me reha, en̂ekano rin̂e me marha.

5 4.000 tî xatken̂e metata yenîn̂e me, 4.000 marha tî xatken̂e Kporin komo poko tahwotaxmu me ratî poko. On wara tî kekn̂e Tapi noro yipu komo ya, Raatî wakîhtopekn̂e yaake Kporin komo poko kahwotacho komo me, kekn̂e tî. Ero yipu pokono komo tî mîkyam xatken̂e.

6 Ero yimaw takî tî Repita komo nîraconkekn̂e Repi pen mumutho komo yepamtho me exirî komo poko. Xehson, Koace, Merari, ero wa tî xakn̂e Repi pen mumutho komo yosotî.

7 Xehson yepamtho komo yantoman̂e tî xakn̂e asakî, Raatan, Simei, ero wara.

8 On wara tî xatken̂e Raatan mumuru komo, Xeiew, potuthîrî. Ponan kom hara, Setan, Xoew, ero wa tî xatken̂e, osorwaw ha.

9 On wara tî xatken̂e Simei mumuru komo, Seromice, Asiew, Aran, ero wara, osorwaw marha tî xatken̂e. Ero wa tî xatken̂e Raatan yepamtho komo yantoman̂e komo.

10 Taa, on wara tî xatken̂e Simei mumuru kom hara, Xaace, Sisa, Xeus, Berias, ero wara. Ero wara tî xatken̂e Simei mumuru komo, 4 me tî xatken̂e.

11 Xaace tî xakn̂e, potuthîrî. Sisa takî tî xakn̂e ponan hara. Asakî makî tî xatken̂e Xeus mumuru, Berias mumuru marha. Ero ke noro re me tî n̂examro nukuknometken̂e.

12 Taa, on wara tî xatken̂e Koace mumuru kom hara, Anhaw, Isa, Ebron, Usiew, ero wara. 4 tî xatken̂e n̂examro.

13 On wara tî xatken̂e Anhaw mumuru komo, Araw, Moises, ero wara. Tîwyanî ro pokono me tî Araw nantomekn̂e Kaan, yumumuru komo marha tî nantomekn̂e tîwyanî ro pokono me miya roro eroromero. Kaan yamtakponî ro yaka tîtosom me tî n̂iir̂akn̂e, kotoporem yakn̂in̂e me marha Kporin komo yamtakpon mîtkoso, tîwya tîmsom yakn̂in̂e me marha, Kaan yosotî yanme akronomano cirpon̂e me marha, ero warai me tî Araw komo n̂iir̂akn̂e.

14 Repita komo yakro rma tî Moises mumuru komo nukuknometken̂e, Kaan yentan̂e ro mumuru kom ha.

15 On wara tî xatken̂e Moises mumuru komo, Kaan yakrono ro mumuru komo, Xehson, Eriese, ero wara.

16 Sebuew tî xakn̂e Xehson mumuru komo potutho.

17 On wara tî xatken̂e Eriese yepamtho kom hara, Heabias, takno komo yantoman̂e ha. Anarî tko exihra ro makî tî xakn̂e Eriese mumuru. Mer̂pora tko tî xatken̂e Heabias mumuru komo reha.

18 Seromice tî xakn̂e Isa mumuru komo yantoman̂e me.

19 On wara tî xatken̂e Ebron mumuru komo, Xerias, potuthîrî, 2-înhîrî tî Amarias, 3-înhîrî tî Xaasiew, 4-nhîrî Xekameaw, ero wara tî xatken̂e.

20 On wara tî xakn̂e Usiew mumuru, Mika tî xakn̂e potuthîrî, Isias tî xakn̂e 2-înhîrî, ero wara tî.

21 On wara tî xatken̂e Merari mumuru kom hara, Mari, Musi, ero wara. On wara tî xatken̂e Mari mumuru kom hara, Ereasa, Kis, ero wara.

22 Waihyakn̂e takî tî okwe Ereasa pen. Yumumuru exihra ro makî tî xakn̂e, emsîrî komo makî tî xatken̂e. Ero ke n̂examro tî nahsîyatken̂e yîîm pen yaknonho mumuru komo, Kisi mumuru kom ha. Ereasa yemsîrî komo tî nahsîyatken̂e cipici komo me.

23 On wara tî xatken̂e Musi mumuru komo, Mari, Ete, Xeremoce, ero wara. 3 tî xatken̂e.

24 Ero wa tî xatken̂e Repita komo, tîyanan komo yantoman̂e kom ha. Osotî komo tî mewretken̂e yukuknometaw. Kaan mîn yenîrî poko tî xatken̂e, ero yawno poko ha. 20 cimn̂ipu ehxapu komo ewrutoponhîrî, ero yopono komo marha, ero warai komo tî nukuknometken̂e ero pokono me.

25 On wara tî kekn̂e Tapi, Yiixatî pîn komo n̂emetanmekîtho mera ro mak takî tî tîyanan komo n̂iire Kporin komo, ponaro kehtopo kom ha. Ero ke Xerusaren pono ro me mak tak naxe eroromero, kekn̂e tî.

26 Ero ke Kaan mîn yewyarihra tak nat ham Repita komo, ero yawno mko marha arîhra natu, kekn̂e tî. Ero wa tî kekn̂e Tapi.

27 Eromanhîrî tî mîn xakn̂e Tapi mtapotacho, Repita komo yukuknomacho poko kekn̂e. 20 cimn̂ipu ehxapu komo tî nukuknomapekn̂e, ero yopono komo marha, ero warai komo tî nukuknomapekn̂e.

28 On pokono me tî xatken̂e Repita komo, Araw yepamtho komo yakronoman̂e me tî xatken̂e. Kaan mîn yawno poko nakronometken̂e, Kaan mîn roron yenîn̂e me tî xatken̂e, Kaan mîn yamtakpon yenîn̂e me marha, Kaan ya tîmsom pokono mko yakir̂waman̂e me, mîn hak pokono me tî xatken̂e Kaan mîn yawno pokono me ha.

29 Cuure warai yenîn̂e me marha tî xatken̂e apon pona ciisom yenîn̂e me, puruma aposokaxapu pokono me marha, Kaan ya tîmsom pokono me, wahrututpamnî pokono me marha, wahrai pokono me, Ero yipu yain̂e me, ero yipu yesman̂e me, ahce na yukuknoman̂e me, ero wicakî mak cirko, kacho yukuknoman̂e me ha. Ero yipu poko tî Araw yepamtho komo nakronometken̂e.

30 Pahxaxaro so tî n̂ecececetken̂e Kporin komo poko tahwotachome so, Kir̂wan̂he xa nai ham Kporin kom okre, kachome. Kokon̂i roro marha ero wa ketken̂e.

31 Kepokaretopo po roro marha tî tokuthîrî komo pun yakn̂iyataw Kporin komo ya tîmsom me tîyanan komo nakronometken̂e, nuun̂i yepatakache roro marha tîmsom yakn̂iyataw, ahwotacho komo yimaw roro marha, yukuknomaxapu yimaw roro ha. Ero pokono me tî xatken̂e Repita komo reha. Tukunoi so makî tko tî xatken̂e ero yipu poko. Ero poko esko amoro, kachonho yaw roro rma tî xatken̂e ero poko. Kporin komo mîtwono me roro tî xatken̂e.

32 Kesentacho yawno pokono me tî xatken̂e, kotoporem yakn̂itopo yamtakpon yawno pokono me ha. Tîyanan yakronoman̂e me tî xatken̂e, Araw yepamtho komo yakronoman̂e me. Kaan mîn yawno poko n̂examro nakronometken̂e. Ero pokono me tî xatken̂e Repita komo.