Ero yinhîrî takî tî Ixaw Yana komo yemetanmekî xe tî xakn̂e Satanas. Ero ke Tapi tî n̂iir̂akn̂e Ixaw Yana komo yukuknomacho ponaro, iyakenon komo yukuknomacho ponaro.

2 Ero ke on wara tî kekn̂e Tapi Xoabe ya, antomano rin̂e komo ya ahnoro, Ai, oyakno komo, etocoko Ixaw Yana komo yukuknomaxi ahnoro. Behseba pona rorono komo yukuknomacoko, Taan pona rorono komo marha. Ero yinhîrî iyakenon yukuknomacho ehcoko on̂enîrî, kekn̂e tî yîwya so.

3 On wara tko tî kekn̂e Xoabe Tapi ya, Ixaw Yana komo yepamnopu xe rma re was ow Kporin komo ya. Oroto naxe mer̂pora ero yopo ro mak epamnopu xe so wasî yîwya, 100 ro wicakî cehsoro. Wara rma apa, ahnoro rma naxe amaywen komo me. Ahce kacho yukuknoma xe mai ha ke? Ahce kacho Ixaw Yana komo kiciciren̂e me mai okwe, kekn̂e tî yîwya.

4 Xoabe yopo rma tko tî nîmtapowakn̂e Tapi. Ero ke cekn̂e takî tî Xoabe. Ixaw Yana komo chere tî cekn̂e. Yukuknomatîkache so takî tî Xerusaren pona n̂etîramekn̂e hara.

5 Tapi ya tî n̂ekatîmyakn̂e yukuknon komo. 1.100.000 tî xatken̂e Ixaw Yana komo kuknon sowtatu me cehsom komo kuknon mak. 470.000 tî xatken̂e Xuta komo kuknon hara, sowtatu me cehsom komo kuknon mak.

6 Repi yepamtho komo tko tî yukuknomara xakn̂e Xoabe, Benxamin yepamtho komo marha tî yukuknomara xakn̂e. Poxumra ro makî tî xakn̂e kayaritomo mtapotachonho yîwya. Ero ke tî n̂examro yukuknomara xakn̂e.

7 Poxumra marha tî xakn̂e yukuknomacho komo Kaan ya. Ero ke Ixaw Yana pen komo takî tî n̂emetanmekyakn̂e.

8 Ero ke on wara tî kekn̂e Tapi Kaan ya, Kicicme xa wehxe ham kica Apa Ixaw Yana komo yukuknomacho poko. Ero ke kicicme oyehtoponho cma re mîhcamnoyasî. Akpîra ro mak wehxe ham kica, kekn̂e tî.

9-10 Ero yinhîrî Kace yakro takî tî nîmtapowakn̂e Kaan. Kaan n̂enporî yenîn̂e ro tî mîk xakn̂e Kace. Tapi ya tî n̂ekatîmyakn̂e roro tîn̂enîthîrî mko hara. On wara tî kekn̂e Kaan yîwya, Ai Kace, etoko Tapi yaka. On wara kasko yîwya, On wara kesî Kporin komo awya apa, Osorwaw wekatîmyas awya anmen̂ekarî. Ahce warai katî wekmexpe awemetanmecho komo awya? Amoro ha tko, kasko yîwya, kekn̂e tî.

11 Ero ke Tapi yaka tî cekn̂e Kace. On wara tî kekn̂e yîwya, Ai apa, on wara kesî Kporin komo awya, Awemetanmecho komo men̂ekakî awanme ro.

12 Anarimaw rooma poko kiir̂atu so 3 cimn̂ipu pahkînon. Anarimaw aaxatî pîn komo wiir̂a ayopono komo me, awapahton̂e komo me ha. 3 nuun̂i wicakî wekpe aaxatî pîn komo awaparî komo me, kacipara imo ke aparaxkan̂e komo me? Anarimaw Kporin komo kaciparan warai ke kîwîrîmetu so 3 kaamo mak? Eper̂a mîn Kporin komo kaciparan. Oyancun wen̂epe Ixaw Yana komo chere ro awaikan̂e komo me. Ero ke ahce wa wîîke oyen̂epen̂enho ya? Amoro ka men̂ekakî, kekn̂e tî yîwya.

13 On wara tî kekn̂e Tapi Kace ya, Keserepokesî ro mak. Kporin komo n̂emetanmekrî me mak oyexi xe wasî. Kîpînîn yawno ro Mîk Kporin komo. Tooto komo n̂emetanmekrî me oyexi xera ro mak wasî, kekn̂e tî.

14 Ero ke Ixaw Yana komo yeper̂an takî tî n̂ekmexpekn̂e Kporin komo. Mer̂pora ro makî tî waihyatken̂e okwe Ixaw Yana pen komo 70.000 ha tî. Ero wicakî tî waihyatken̂e okwe.

15 Xerusaren pona marha tî ancu n̂en̂epekn̂e Kporin komo iitono komo poyinonho waihkachome hara. Waihkano ciir̂ataw waihkarî tî n̂een̂akn̂e Kporin komo. Ero ke tî ahwora xakn̂e waihkano cirirî ke. Ero ke on wara tî kekn̂e ancu ya, waihkano rin̂e ya, N̂eexi tak ha, waihkano cirihra tak esko, kekn̂e tî. Ero ke iito rma tî n̂ecececekn̂e Kporin komo yancun. Ohnan yeken po tî n̂ecececekn̂e Xebusew yeken po. Yînatîrî yatho yîpîpîtîkacho mîtwo tî n̂ecececekn̂e.

16 Ero yimaw takî tî n̂esewyar̂akn̂e takî tî Tapi. Kporin komo yancun tî n̂een̂akn̂e, cececetoso tî xakn̂e tohnai xa. Tapockaw rma tî xakn̂e ancu Xerusaren pono komo yepoi. Ero ke Tapi takî tî n̂esewnapekn̂e, Ixaw Yana komo poritomon komo marha tî n̂esewnapetken̂e noro yakro. Kumixitho yaw so makî tî xatken̂e poonotho yaw.

17 On wara tî kekn̂e Tapi Kaan ya, Apa, ow mak wukuknomapoi Ixaw Yana komo. Ow xa kicicme wehxe, kicicitho me ro mak ham. Moxam reha naxe oper̂a wara mak. Ahce ma re nai kicicme n̂examro yehtoponho? Ero ke on wara wîîkes awya Apa, ponaro oyehtopo xa Amoro, ow mak emetanmeko, apapa yanan komo marha. Moxam reha ayanan komo eper̂antora cma re masî, kekn̂e tî.

18 Ero ke on wara tî kekn̂e Kporin komo yancun, Kace ya, Etoko Tapi yaka. On wara kasko yîwya, Ai apa, etoko amoro Ohnan yaka, Xebusew mîk noro yaka. Noro natîrî yatho yîpîpîtîkacho pona akîhtoko Kporin komo ya tîmsom yakn̂itopo, kasko yîwya, kekn̂e tî.

19 Ero ke iina tî cekn̂e Tapi Kace mtapotachonho yaw roro rma. Kporin komo mtapotachonho rma tî n̂entamexpekn̂e yîwya ero yaw roro tî xakn̂e.

20 Iito rma tî xakn̂e Ohnan puruma yatho yîpîpîtîkacho poko. Ero yimaw tî n̂esewkor̂mekn̂e, ancu takî tî n̂een̂akn̂e kopi. Ohnan mumuru komo marha tî xatken̂e iito, 4 ha. N̂examro takî tî n̂eseyamyatken̂e enîche.

21 Ero yimaw tî Ohnan yaka cekn̂e Tapi. N̂esewyar̂akn̂e xa hara Ohnan. Tapi tî n̂een̂akn̂e. Enîche yîpîpîtîkacho poi tî cekn̂e. Nutupenwakn̂e takî tî Tapi mamakan me. N̂esewnapekn̂e xa tî.

22 Ero ke on wara tî kekn̂e Tapi Ohnan ya, Onî cma re mîmyasî owya anatîrî yatho yîpîpîtîkacho. Oona akîhto xe wasî Kporin komo ya tîmsom yakn̂itopo. Epethîrî pona mak wahsîyasî ecenarîno pona mak ha. Oona akn̂ipu xe wasî Kporin komo ya tîmsom opoyino komo yeper̂an yîtîtmamnotome, kekn̂e tî.

23 On wara tko tî n̂eyukyakn̂e Ohnan, Apa, ahsîko rma onatîrî yeperîrî yîpîpîtîkachonho. Awanme ro mak cirko. Oyokutho marha wîmyas awya paaka, takn̂isom me. Naatî yatho yîpîpîtîkachonho mko marha wîmyas awya wehto kamerî me, puruma yatho marha wîmyas awya Kaan ya tîmsom me. Ahnoro rma wîmyas awya epeman me ro makî, kekn̂e tî.

24 On wara tko tî n̂eyukyakn̂e Tapi, Pîra oyakno, epethîrî pona mak wahsîyasî ecenarîno pona mak. Awemyawnonhîrî yahsî xera wasî Kporin komo ya tîmsom me. Epethîmnî yakn̂ipîra wasî Kporin komo ya tîmsom me, kekn̂e tî.

25 Ero ke Ohnan ya tî nîmyakn̂e puranta yînatîrî yatho yîpîpîtîkachonho yepetho me. Ooru tî nîmyakn̂e yîwya 600 sikru wicakî. Ero wa tî Ohnan n̂epemekn̂e.

26 Ero yinhîrî takî tî iina Kporin komo ya tîmsom yakn̂itopo nakîhcekn̂e Tapi. Ero pona tî Kaan ya tîmsom nakn̂iyakn̂e takn̂itîkaxmu yaake, Aaxe xa wasî, kacho marha, yaake. Ero yimaw marha tî Kporin komo yakro tî nîmtapowakn̂e. Yîmtapotarî takî tî n̂eyukyakn̂e Kporin komo wehto ke mak. Takn̂isom yapon pona tî nar̂mekn̂e oco.

27 Ero ke takî tî ancu yakro nîmtapowakn̂e Kporin komo. Ero ke tkaciparan takî tî n̂enkayakn̂e hara een yaka. Ero wa tî xakn̂e ancu.

28 Ero yinhîrî tî on wara kekn̂e Tapi, Taa, omtapotarî n̂eiku ham Kporin komo. Tanî rma oyexitaw Ohnan yeken po, yînatîrî yatho yîpîpîtîkacho po rma ka oyexitaw oyeiku ham, kekn̂e tî. Ero ke iina takî tî Kaan ya tîmsom nakn̂iyakn̂e.

29 Xibeon po tî xakn̂e Kaan mîn ero yimaw, îh po ha. Iito marha tî xakn̂e takn̂itîkaxmu yakn̂itopo. Moises pen nakîhtopotho mîn xakn̂e, axawa imo po exitaw so nakîhtopekn̂e eronhîrî rma.

30 Ero ke iina tohra thakwa tî xakn̂e Tapi Kporin komo mîn yaka Noro yakro esentaxi. N̂eraswakn̂e ro makî tî kacipara imo pona, Kporin komo yancun yemyawno pona ha. Ero ke tî iina tohra ro mak xakn̂e. Ero wa tî xakn̂e Tapi.